ފާއިތުވި ތިން އަހަރު ދުވަހުގެ ތެރޭގައި ރާއްޖޭގެ ތާރީހުގައިވެސް ކުރު މުއްދަތެއްގެ ތެރޭގައި އަތުލައިގަނެވުނު އެންމެ ގިނަ އަދަދެއްގެ މަސްތުވާތަކެތި އަތުލައިގަނެވިފައިވާ ކަމަށް ހޯމް މިނިސްޓަރު އަލީ އިހްސާން ހާމަކުރައްވައިފިއެވެ. އެގޮތުން ޖުމްލަ 13,027 ކިލޯގެ މަސްތުވާތަކެތި އަތުލައިގަނެވިފައިވާއިރު، މީގެ މަގުމަތީ އަގު 1.4 ބިލިއަން ރުފިޔާއަށް އަރާ ކަމަށް މިނިސްޓަރު ވިދާޅުވިއެވެ.

އާ ގާނޫނުގެ ދަށުން ލިބިދީފައިވާ ބާރުތަކުގެ ބޭނުންކޮށްގެން، މަސްތުވާތަކެތި ބަހައި ވިއްކަމުންދިޔަ 11 ތަނެއް (އައްޑާ) މިހާތަނަށް ވަނީ މުޅިން ބަންދުކޮށްފައެވެ. މީގެ ތެރޭގައި މާލޭގައި ހިންގަމުންދިޔަ 6 ތަނަކާއި، އައްޑޫ ސިޓީގެ 4 ތަނެއްގެ އިތުރުން ފުވައްމުލައް ސިޓީގައި ހިންގި 1 ތަން ހިމެނެއެވެ. މިނިސްޓަރު ވިދާޅުވީ މިއަހަރުގެ ނޮވެމްބަރު މަހުގެ ނިޔަލަށް ރާއްޖޭގައި މަސްތުވާތަކެތި ވިއްކާ ހުރިހާ ތަންތަނެއް މުޅިން ބަންދުކޮށް ނިންމުމަކީ ސަރުކާރުގެ ބޮޑު އަމާޒެކެވެ.

މި އޮޕަރޭޝަންތަކުގެ ތެރެއިން އުމުރުން 18 އަހަރުން ދަށުގެ 50 ކުދިން ހައްޔަރުކޮށް، ފަރުވާއަށް ފޮނުވިފައިވާ ކަންވެސް މިނިސްޓަރު ފާހަގަކުރެއްވިއެވެ. މިއީ ޒުވާން ޖީލު މަސްތުވާތަކެތީގެ ވަބާއިން ސަލާމަތްކުރުމަށްޓަކައި ހާއްސަ އިސްކަމެއް ދީގެން ކުރިއަށްގެންދެވޭ މުހިންމު މަސައްކަތެކެވެ.

ރާއްޖެއަށް މަސްތުވާތަކެތި އެތެރެވާ މަގުތައް ބަންދުކުރުމަށްޓަކައި ދިވެހި ފުލުހުންގެ ހިދުމަތާއެކު "ނޭޝަނަލް ޓާގެޓިންގ ސެންޓަރެއް" ވަނީ ގާއިމުކޮށްފައެވެ. މި ސެންޓަރުގެ މައިގަނޑު މަގުސަދަކީ މަސްތުވާތަކެތި އެތެރެކުރަނީ ކޮންބައެއްކަމާއި އެކަން ކުރާ ގޮތްތައް ދެނެގަނެ، އެކަންކަން ހުއްޓުވުމެވެ. މިހާރު އެއާލައިންތަކާއި ޕޯސްޓް މެދުވެރިކޮށް އެތެރެވާ ކާގޯތައް ވަރަށް ތަފްސީލީކޮށް ޗެކްކުރެވެމުންދާ ކަމަށް މިނިސްޓަރު ވިދާޅުވިއެވެ.