ހުރްމުޒް ކަނޑުއޮޅިން ހުއްދަނެތި އަދި ކަނޑައެޅިފައިވާ އުސޫލުތަކާ ޚިލާފަށް ދަތުރުކުރަމުންދިޔަ ތިން ތެޔޮ ޓޭންކަރެއް ގޮވައި، ބޮޑެތި ގެއްލުންތަކެއް ވެއްޖެ ކަމަށް އީރާނުގެ އިސްލާމިކް ރިވޮލިއުޝަނަރީ ގާޑް ކޯޕްސް (އައިއާރްޖީސީ) އިން ހާމަކޮށްފިއެވެ.
މަސްދަރުތަކުން ރިޕޯޓްކޮށްފައިވާ ގޮތުގައި، މި ހާދިސާ ހިނގާފައި ވަނީ ބައިނަލްއަޤްވާމީ ކަނޑުދަތުރުފަތުރުގެ ގަވާއިދުތަކާއި ސަލާމަތީ މިންގަނޑުތަކާއި ޚިލާފަށް، ހުއްދަ ނޫން މަގަކުން އެ އުޅަނދުތައް ހުރްމުޒް ކަނޑުއޮޅި ހުރަސްކުރަން އުޅުމުގެ ތެރޭގައެވެ. އައިއާރްޖީސީގެ ކަނޑުގެ ސިފައިންނާ ހަވާލާދީ ބުނެފައިވަނީ، މި ތިން ޓޭންކަރަކީ ވެސް އެ ސަރަހައްދުގެ ސަލާމަތީ އުސޫލުތަކަށް ބޯނުލަނބައި، ޣައިރުޤާނޫނީ ގޮތެއްގައި ދަތުރުކުރަމުންދިޔަ އުޅަނދުތަކެއް ކަމަށެވެ.
މި އުޅަނދުތައް ގޮވަން މެދުވެރިވި ކަނޑަށް އަޅާފައިވާ މައިންތަކުގެ ތެރެއިން މައިނެއްގައި ޖެހިގެން ކަމަށާއި އުޅަނދުތަކަށް ބޮޑެތި ގެއްލުންތަކެއް ލިބިފައިވާ ކަމަށް ރިޕޯޓްތައް ބުނެއެވެ.
Advertisement
މި ހާދިސާ ހިނގި ސަރަހައްދަކީ ދުނިޔޭގެ ތެލުގެ ބޮޑު އިންސައްތައެއް ދަތުރުކުރާ އެންމެ މުހިންމު އަދި އެހާމެ ނާޒުކު އެއް ކަނޑުއޮޅިއެވެ. އައިއާރްޖީސީން ވަނީ ކަނޑުދަތުރުފަތުރުގެ ސަލާމަތާއި ރައްކާތެރިކަން ދެމެހެއްޓުމަށްޓަކައި އެ ސަރަހައްދުން ދަތުރުކުރާ ހުރިހާ އުޅަނދުތަކަކުން ވެސް ބައިނަލްއަޤްވާމީ ގަވާއިދުތަކަށާއި އެ ސަރަހައްދުގެ އުސޫލުތަކަށް ފުރިހަމައަށް އިޙްތިރާމްކުރުމަށް ގޮވާލާފައެވެ.
