އެކުވެރި ޢަރަބި ޢިމާރާތް (ޔޫއޭއީ) ގެ އުންމުލް ޤުވައިން ގެ ގޮނޑުދޮށްތަކަށާއި ކަނޑުގެ ސަރަހައްދަށް ތެޔޮ އެޅި، ތިމާވެށީގެ ބޮޑު ކާރިސާއެއް ކުރިމަތިވެއްޖެއެވެ. މި ޙާދިސާ ހިނގާފައިވަނީ އެ ސަރަހައްދުން ދަތުރުކުރި ބޮޑު ތެޔޮ ޓޭންކަރަކުން ދިމާވި ޓެކްނިކަލް މައްސަލައަކާ ގުޅިގެން ކަމަށް ރިޕޯޓުތައް ބުނެއެވެ.
މިކަމާ ގުޅިގެން އުންމުލް ޤުވައިންގެ ސަރުކާރުން ވަނީ ސަލާމަތީ ފިޔަވަޅުތަކެއް އަޅާފައެވެ. އެގޮތުން، އާންމު ރައްޔިތުންނާއި ފަތުރުވެރިންގެ ސަލާމަތަށްޓަކައި އެ ސިޓީގެ ހުރިހާ ގޮނޑުދޮށްތަކާއި، މޫދަށް އެރޭ ސަރަހައްދުތައް ވަގުތުން ބަންދުކޮށް، ކަނޑުގެ ދިރުންތަކަށް ލިބެމުންދާ ގެއްލުންތައް ބެލުމުގެ ތަޙުޤީޤެއް ވަނީ ފަށާފައެވެ. ހަމައެހެންމެ، ކަނޑުގެ ކާނާއާއި މަސްތައް ތަޣައްޔަރުވެދާނެތީ، އެ ސަރަހައްދުގައި މަސްވެރިކަން ކުރުންވެސް ވަނީ މުޅިން މަނާކޮށްފައެވެ.
ޔޫއޭއީގެ ތިމާވެއްޓާ ބެހޭ އިދާރާތަކުން ބުނާ ގޮތުގައި، މި ތެޔޮގަނޑު ކަނޑުގެ ސަރަހައްދުން ސާފުކުރުމަށްޓަކައި ޚާއްޞަ ޓީމުތަކެއް ދަނީ މަސައްކަތް ކުރަމުންނެވެ. ނަމަވެސް ތެޔޮ ފެތުރިފައިވާލެއް ބޮޑުކަމުން، ކަނޑުގެ ދިރުންތަކަށާއި މުރަކަތަކަށް މީގެ ނޭދެވޭ އަސަރު ވަރަށް ބޮޑަށް ކުރާނެ ކަމަށް ތިމާވެށީގެ ތަޖުރިބާކާރުން ދަނީ ބުނަމުންނެވެ.
