އީރާނާއި މެދު ގޮތެއް ނިންމާނީ ވޯޓަށް ފަހު: ޓްރަމްޕް

އީރާނާއި މެދު ގޮތެއް ނިންމާނީ ވޯޓަށް ފަހު ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެއެވެ.

އެމެރިކާގެ ކުރިއަށް އޮތް މިޑްޓާމް އިންތިޚާބަށްފަހު އީރާނަށް އިތުރު އަސްކަރީ ހަމަލާތަކެއް ދީފާނެތޯ ނޫސްވެރިން ސުވާލުކުރުމުން، އޭނާ ވިދާޅުވީ "ކޮންމެ ފަދަ ކަމެއްވެސް ވެދާނެ” ކަމަށެވެ. ޓްރަމްޕް މިހެން ވިދާޅުވީ އީރާނާއެކު ހިނގަމުންދާ ހަނގުރާމައަށް އަށް މަސް ފުރިފައިވާއިރު، ދެ ގައުމުގެ މެދުގައި ސުލްހައިގެ އެއްބަސްވުމަކަށް ނާދެވި މަޝްވަރާތައް ހުއްޓިފައިވާ ދަނޑިވަޅެއްގައެވެ. އެމެރިކާގެ އަސްކަރިއްޔާއިން މިހާރުވެސް ދަނީ މެދުއިރުމައްޗަށް އިތުރު އަސްކަރީ ވަސީލަތްތައް ފޮނުވައި، އިންތިޚާބަށްފަހު ވަރުގަދަ އޮޕަރޭޝަނެއް ފެށުމަށް ތައްޔާރުވަމުންނެވެ.

މީގެ ކުރިން ސޯޝަލް މީޑިއާގައި ޓްރަމްޕް ޔަގީންކަން ދެއްވާފައިވަނީ ނޮވެމްބަރު 3 ގައި ބާއްވާ މިޑްޓާމް އިންތިޚާބުގެ ކުރިން އީރާނަށް އެއްވެސް ހަމަލާއެއް ނުދޭނެ ކަމަށެވެ. މީގެ މައިގަނޑު ސަބަބަކީ މިހާރުވެސް ހިނގަމުންދާ ހަނގުރާމައިގެ ސަބަބުން އެމެރިކާގެ އާންމުންގެ މެދުގައި ހިތްހަމަނުޖެހުން ބޮޑުވެފައިވުމާއެކު، އިންތިޚާބުގެ ކުރިން ހަނގުރާމަ ވަރުގަދަކޮށްފިނަމަ ޓްރަމްޕްގެ ރިޕަބްލިކަން ޕާޓީއަށް އިންތިޚާބުން ނާކާމިޔާބީއާ ކުރިމަތިލާން ޖެހިދާނެތީއެވެ.

އެމެރިކާގެ ޖާސޫސީ ރިޕޯޓުތަކާއި އަސްކަރީ ތައްޔާރުވުންތަކަށް ބަލާއިރު، އީރާނުގެ ނިއުކްލިއަރ މަރުކަޒުތަކާއި ހަތިޔާރު ގުދަންތަކަށް ބޮންއަޅަން ފަށާނީ އިންތިޚާބަށް ފަހުގައެވެ. އެމެރިކާއިން ވަނީ ގަލްފުގެ ބައެއް ގައުމުތަކަށް އިންތިޚާބަށްފަހު އީރާނާ ދެކޮޅަށް ވަރުގަދަ އަދި ކުރު އަސްކަރީ ކެމްޕޭނެއް ފެށިދާނެ ކަމުގެ އިންޒާރުވެސް ދީފައެވެ. ޓްރަމްޕް ވިދާޅުވަނީ އީރާނުން ނިއުކްލިއަރ ހަތިޔާރު އުފެއްދުން ދާއިމީކޮށް ހުއްޓުވުމަށްޓަކައި، އެ ގައުމާއެކު ވަރުގަދަ އެއްބަސްވުމަކަށް ނާދެވިއްޖެނަމަ، އަސްކަރީ ބާރުގެ ބޭނުންކޮށްގެން މިކަން "އެއްކޮށް ނިންމާލަން" އެމެރިކާ އޮތީ ތައްޔާރަށް ކަމަށެވެ.