އެމެރިކާގެ އަސްކަރިއްޔާ އީރާނު ކަނޑުގެ ސަރަޙައްދަށް ވަނުން އީރާނުން އެއްކޮށް މަނާކޮށްފި

އެމެރިކާގެ އަސްކަރިއްޔާގެ އެއްވެސް އުޅަނދެއް ޚަލީޖު (ޕާޝިއަން ގަލްފް) ގެ ސަރަޙައްދަށް ވަނުން އެއްކޮށް މަނާކޮށްފައިވާ ކަމަށް އީރާނުގެ ސަރުކާރުން އިޢުލާނުކޮށްފިއެވެ.

އީރާނުގެ ވެރިރަށް ތެހެރާނުން މި ނިންމުން ނިންމާފައިވަނީ މެދުއިރުމަތީގެ މަސްރަޙު އިންތިހާއަށް ގޯސްވެ، އިސްރާއީލާއި އެ ސަރަޙައްދުގެ އެކި ޤައުމުތަކާ ދެމެދު ހިނގަމުންދާ ނުތަނަވަސްކަމުގެ ތެރޭގައެވެ. އީރާނުގެ އަސްކަރީ އިސް އޮފިޝަލުންނާ ޙަވާލާދީ ޚަބަރު ފަތުރާފައިވާ ގޮތުގައި، އެމެރިކާގެ އެއްވެސް މަނަވަރަކަށް ނުވަތަ އަސްކަރީ އެހެން އުޅަނދަކަށްވެސް މި ސަރަޙައްދުގެ ކަނޑުގެ ސަރަޙައްދަށް ވަނުމުގެ ފުރުޞަތެއް ދެން ނޯންނާނެއެވެ.

އީރާނުން މިފަދަ ހަރުކަށި ފިޔަވަޅެއް އަޅަން ނިންމީ، އެ ސަރަޙައްދުގައި އެމެރިކާގެ އަސްކަރީ ހަރަކާތްތައް އިތުރުކޮށް، ޚާއްޞަކޮށް ޣައްޒާއާއި ހުޅަނގު އައްސޭރި އަދި މުޅި ސަރަޙައްދުގައި އިސްރާއީލުން ހިންގަމުންދާ ޢުދުވާނުތަކަށް އެމެރިކާއިން ދެމުންދާ އެއްބާރުލުމާ ގުޅިގެން ކަމަށް ބެލެވެއެވެ. އީރާނުން ދެކޭ ގޮތުގައި ޚަލީޖުގެ ސަރަޙައްދުގެ ސަލާމަތާއި ރައްކާތެރިކަން ބަލަހައްޓަން ވާނީ އެ ސަރަޙައްދުގެ ޤައުމުތަކުންނެވެ. އަދި ބޭރުގެ ބާރުތައް، ޚާއްޞަކޮށް އެމެރިކާ ފަދަ ޤައުމުތަކުން އެ ސަރަޙައްދަށް ވަނުމަކީ ހަމަޖެހުން ގެއްލި، ހަނގުރާމައިގެ ހުޅުގަނޑު އިތުރަށް ފުޅާވެގެންދާނެ ކަމެކެވެ.

އެމެރިކާގެ އަސްކަރިއްޔާއިން މިހާތަނަށް އީރާނުގެ މި އިޢުލާނާ ގުޅޭގޮތުން ރަސްމީކޮށް ވަކި އެއްޗެއް ހާމަކޮށްފައެއް ނުވެއެވެ.