ބައިނަލްއަގްވާމީ ދަތިކުރުމުގެ ފިޔަވަޅުތަކާއި ގައުމީ ފައިސާގެ އަގު ވެއްޓުމުގެ ސަބަބުން ކުރިމަތިވެފައިވާ އިގްތިސާދީ ފިއްތުންތަކާ ގުޅިގެން، އީރާނުގެ ބޭންކުތަކާއި މަނީ އެކްސްޗޭންޖުތައް މެދުވެރިކޮށް އަމިއްލަ ފަރުދުންނަށް އެމެރިކާ ޑޮލަރު ގަނެވޭނެ މިންވަރު އީރާނުގެ ސަރުކާރުން މަދުކޮށްފިއެވެ.
އީރާނުގެ ފާރްސް ނިއުސް އޭޖެންސީން ރިޕޯޓުކޮށްފައިވާ ގޮތުގައި، އަލަށް އެކުލަވާލި އުސޫލުގެ ދަށުން ކޮންމެ މީހަކަށްވެސް ދުވާލަކު ގަނެވޭނީ ގިނަވެގެން 1،000 އެމެރިކާ ޑޮލަރެވެ. އަދި ޖުމުލަ ގަނެވޭނެ އެންމެ މަތީ މިންވަރަކީ 10،000 ޑޮލަރެވެ. ކުދި އަދަދުތަކުން (100 އާއި 1،000 ޑޮލަރާ ދެމެދު) ޑޮލަރު ގަންނަން އެދޭ ފަރާތްތަކުން ބޭންކު ކާޑާއި ގައުމީ އައިޑީ ކާޑު ބޭނުންކޮށްގެން ހުށަހަޅަންޖެހެއެވެ.
މި ފިޔަވަޅު އަޅާފައިވަނީ އީރާނުގެ ފައިސާ ކަމަށްވާ ރިއާލްގެ އަގު ވަރަށް ބޮޑަށް ވެއްޓި، އާންމުންގެ ތަނަވަސްކަން ކުޑަވެ، މުދާ އެތެރެކުރުމުގެ ހަރަދުތައް އިންތިހާއަށް އުފުލެމުންދާ ދަނޑިވަޅެއްގައެވެ. އޮކްޓޫބަރު 22 ގައި އީރާނުގެ އޯޕަން މާކެޓުގައި އެމެރިކާ ޑޮލަރެއްގެ އަގު އުޅެނީ ގާތްގަނޑަކަށް 2.62 މިލިއަން ރިއާލްގައެވެ.
Advertisement
މީގެ އިތުރުން، އެމެރިކާގެ ޓްރެޝަރީ ޑިޕާޓްމަންޓުން ވަނީ އީރާނުން ދަތިކުރުމުގެ ފިޔަވަޅުތަކުން ރެކުމަށް ބޭނުންކުރާ މާލީ ވިއުގަތަކާއި، ބޭރުގެ މާލީ އިދާރާތަކާއި ޝެލް ކުންފުނިތަކަށް އަމާޒުކޮށް އިތުރު ދަތިކުރުމުގެ ފިޔަވަޅުތަކެއް އަޅާފައެވެ. އެމެރިކާއިން ބުނާ ގޮތުގައި މި ފިޔަވަޅުތަކުގެ މަގުސަދަކީ އީރާނުގެ އަސްކަރީ ހަރަކާތްތަކަށް ލިބޭ މާލީ އެހީތެރިކަން ހުއްޓުވުމެވެ.
އީރާނުން ޑޮލަރު ގަނެވޭނެ މިންވަރު ކޮންޓްރޯލް ކުރި ނަމަވެސް، އެމެރިކާގެ އެންމެ ފަހުގެ ފިޔަވަޅުތަކާއި މި ނިންމުމާ ސީދާ ގުޅުމެއް އޮތްކަން ކަށަވަރުވެފައެއް ނުވެއެވެ. ނަމަވެސް، ރިއާލްގެ އަގު ދަށަށް ދިއުމުގެ ސަބަބުން ކުރިއަށް އޮތް ތަނުގައި އީރާނުގެ ވިޔަފާރިތަކަށާއި އިގްތިސާދަށް އިތުރު ގޮންޖެހުންތަކާ ކުރިމަތިލާންޖެހޭނެ ކަމަށް ބެލެވެއެވެ.
