ގައުމީ ހިދުމަތުގައި އެކިއެކި ދާއިރާތަކުން އަންހެނުން ކުރާ މަސައްކަތްތަކާއި، ގައުމީ ތަރައްގީއަށާއި މުޖުތަމައު ބިނާކުރުމަށް އަންހެނުން އަދާކުރާ ދައުރުގެ އަގު ގައުމީ ފެންވަރެއްގައި ވަޒަންކުރުމުގެ މަގަސަދުގައި ސިއްހަތާއި، އާއިލާއާއި އިޖްތިމާއީ އެހީއާ ބެހޭ މިނިސްޓްރީން ދޭ "ރެހެންދި އެވޯޑު 2027" އަށް ނަން ހުށަހެޅުމުގެ ފުރުސަތު ހުޅުވާލާފިއެވެ.
މި އެވޯޑަކީ އަންހެނުންގެ ހައްގުތައް ރައްކާތެރިކޮށް، އަންހެނުން ބާރުވެރިކުރުމުގެ ގޮތުން ދެވޭ އެވޯޑެކެވެ. ނަން ހުށަހެޅުމުގެ ސުންގަޑިއަކީ 2026 ޑިސެންބަރު 10 ވާ ބުރާސްފަތި ދުވަހުގެ މެންދުރުފަހު 14:00 އެވެ.
މި އެވޯޑަށް ނަން ހުށަހެޅުމުގެ ފުރުސަތު ދެ ކެޓަގަރީއަކުން ހުޅުވާލެވިފަވެއެވެ. އެއީ ވަކިވަކި އަންހެނުންނަށާއި ޖަމުއިއްޔާ/ޖަމާއަތްތަކަށް ހުށަހެޅޭ ކެޓަގަރީގެ އިތުރުން އަންހެނުންގެ ތަރައްގީއަށް މަސައްކަތްކުރާ ކޮމިޓީތަކަށް ހުށަހެޅޭ ކެޓަގަރީއެވެ. ވަކިވަކި އަންހެނުންނާއި ޖަމުއިއްޔާތަކަށް 4 ދާއިރާއަކުން ނަން ހުށަހެޅޭނެއެވެ. އެއީ ލީޑަރޝިޕް އަދި ގަވަރނަންސް، އިގްތިސާދީގޮތުން ބާރުވެރިކުރުވުން، އިޖްތިމާއީގޮތުން ބާރުވެރިކުރުވުން، އަދި އަންހެނުން އާންމުކޮށް ކޮށްނޫޅޭ މަސައްކަތްތައް ނުވަތަ "ނޮން-ޓްރެޑިޝަނަލް ރޯލްސް" އެވެ.
Advertisement
ރެހެންދި އެވޯޑަށް ވަކިވަކި އަންހެނުންނާއި، ޖަމުއިއްޔާ ޖަމާއަތްތަކުންނާއި، އަންހެނުންގެ ތަރައްގީއަށް މަސައްކަތް ކުރާ ކޮމިޓީތަކުން އަމިއްލައަށް ނަން ހުށަހެޅުމުގެ ފުރުސަތުވެސް ދީފަވެއެވެ. ދެވިފައިވާ ފުރުސަތުތަކުގެ ތެރޭގައި އަމިއްލައަށް ނަން ހުށަހެޅުމުގެ އިތުރުން، އެހެން ފަރާތަކުން ނަން ހުށަހެޅުން ނުވަތަ ނޮމިނޭޓް ކުރުމުގެ ފުރުސަތު ހުޅުވާލާފަވެއެވެ. މިއީ ގިނަ ފަރާތްތަކަކަށް މި އެވޯޑުގައި ބައިވެރިވުމުގެ މަގު ފަހިކޮށްދިނުމުގެ ގޮތުން ކުރެވިފައިވާ ކަމެކެވެ.
ރެހެންދީ އެވޯޑް 2025-2026 ގެ ތެރެއިން / ފޮޓޯ: ހެލްތު މިނިސްޓްރީ
ހެލްތު މިނިސްޓްރީއިން 2014 ވަނަ އަހަރުން ފެށިގެން 2025 ވަނަ އަހަރާ ހަމައަށް ބައިނަލްއަގްވާމީ އަންހެނުންގެ ދުވަހާ ގުޅުވައިގެން ކޮންމެ އަހަރަކުވެސް މި އެވޯޑަށް ނަން ހުށަހެޅުމުގެ ފުރުސަތު ހުޅުވާލައެވެ. މީގެ އިތުރުން، ވޭތުވެދިޔަ 13 އަހަރު ތެރޭގައި އެވޯޑު ދެމުން އަންނަ ދާއިރާތަކަށާއި، އެވޯޑު ދިނުމުގެ އުސޫލަށް މިނިސްޓްރީއިންއެކި ބަދަލުތައް ގެންނެވިއެވެ. މިހާތަނަށް ޖުމުލަ 77 ފަރާތަކަށް މި އެވޯޑު ދެވިފައިވާއިރު، އޭގެ ތެރޭގައި އަންހެނުންގެ އިތުރުން ޖަމިއްޔާތަކާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީތަކާއި މުއައްސަސާތައް ހިމެނެއެވެ.
ކުރިއަށް އޮތް ތަނުގައި އެވޯޑު ދިނުމަށް ނިންމާފައިވާ ގޮތަށް ބަލާއިރު، މި އަހަރުން ފެށިގެން މި އެވޯޑު ދެން ދެމުންގެންދާނީ ކޮންމެ ދެ އަހަރަކުން އެއް އަހަރު ކަމަށް މިނިސްޓްރީއިން ހާމަކުރިއެވެ. މިފަދަ ބަދަލުތަކެއް އުސޫލަށް މީގެ ކުރިންވެސް ގެނެސްފައިވަނީ އަދި ކުރިއަށް އޮތް ތަނުގައިވެސް ގެންނާނީ، އެވޯޑު އެންމެ ފުރިހަމަ ގޮތުގައި ގިނަ ފަރާތްތަކެއްގެ ބުރަ މަސައްކަތުގެ އަގު ވަޒަންކުރެވޭނެ ގޮތަކަށް ބައްޓަންކުރުމުގެ މަގްސަދުގައެވެ.
