ރަސްމާލެ ތަރައްޤީ ކުރުމުގެ ބިޔަ މަޝްރޫއުގެ ދަށުން ޔޫއޭއީގެ އީގަލް ހިލްސް ކުންފުންޏާ ހަވާލުކޮށްފައިވާ ޕްރޮޖެކްޓަކީ ރަނގަޅު މަޝްރޫއެއް ކަމަށާއި، އެ ކުންފުނީގެ ޗެއާމަން މުހައްމަދު އަލްއައްބާރާ ޒަޔަނިޒަމްއާ ގުޅުވަންޖެހޭ އެއްވެސް ސަބަބެއް ނެތް ކަމަށް ކުރީގެ ރައީސް އަދި އެމްޑީޕީގެ ޗެއާޕާސަން މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު މިހެން ވިދާޅުވީ އެމްޑީޕީގެ ގައުމީ މަޖިލީހުގެ ވަޓްސްއެޕް ގްރޫޕަށް ރޭ ފޮނުއްވި މެސެޖެއްގައެވެ.
ރައީސް ނަޝީދުގެ މެސެޖުގައި ވިދާޅުވީ، އެމަނިކުފާނަށް ފެންނަ ގޮތުގައި އީގަލް ހިލްސް ޕްރޮޖެކްޓަކީ ވަރަށް ރަނގަޅު ޕްރޮޖެކްޓެއް ކަމަށެވެ. އަދި އަލްއައްބާރަކީ ޔުނައިޓެޑް އަރަބް އެމިރޭޓްސް (ޔޫއޭއީ) ބިނާ ކުރުމުގެ އެންމެ އިސް އެއް ހިއްސާދާރުކަން ފާހަގަކުރައްވައި ނަޝީދު ވިދާޅުވީ، އޭނާއާ ޒަޔަނިޒަމް ގުޅުވަންޖެހޭ އެއްވެސް ސަބަބެއް ނެތް ކަމަށެވެ. މީގެ އިތުރުން، އަލްއައްބާރުގެ އިސްރާއީލް ރަހުމަތްތެރިން ތިބި ނަމަވެސް، އޭނާއަކީ ޒަޔަނިޒަމް ކުރިއަރުވާ މީހެއް ނޫން ކަމަށް ވެސް ނަޝީދު ވިދާޅުވިއެވެ.
Advertisement
މި މަޝްރޫއު ދިފާއުކުރައްވައި ނަޝީދު އިތުރަށް ވިދާޅުވީ، އެ މަޝްރޫއުއާ ގުޅިގެން އަލްއައްބާރަށް ފުރައްސާރަ ކުރުމަކީ ރާއްޖެއަށް އޭގެ ސަބަބުން ބޮޑެތި ގެއްލުންތަކެއް ލިބިގެންދާނެ ކަމެއް ކަމަށެވެ. އަދި އެފަދަ ކަންކަމުގެ ސަބަބުން މިހާރު ވެސް ރާއްޖޭގައި ހުރި ޔޫއޭއީގެ އިންވެސްޓްމަންޓްތަކަށް ހުއްޓުން އައުމުގެ ފުރުސަތު އޮތް ކަމުގެ ކަންބޮޑުވުން ވެސް އެމަނިކުފާނު ފާޅުކުރެއްވިއެވެ.
މީގެ އިތުރުން، އީގަލް ހިލްސްގެ މި މަޝްރޫއާ ގުޅޭގޮތުން އެމްޑީޕީން މީގެ ކުރިން ބަޔާނެއް ނެރެފައިވާނެ ކަމަށް ނަޝީދުގެ މެސެޖުގައި ފާހަގަކުރެއްވިއެވެ.
ހަމައެއާއެކު، ކުރިން ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަލީ އާޒިމް އެމްޑީޕީން ވަކިކުރީ ވެސް އެ ޕާޓީގެ ސިޔާސަތާ ދެކޮޅަށް ވާހަކަ ދެއްކެވުމުންކަން ހަނދާންކޮށްދެއްވައި، ޕާޓީގެ ރަސްމީ ސިޔާސަތުތަކާ ދެކޮޅަށް އެމްޑީޕީގެ މެމްބަރުން ވާހަކަ ނުދެއްކެވުމަށް ނަޝީދު ވަނީ ނުސީދާ އިބާރާތުން އެ މެސެޖުގައި އިލްތިމާސް ކުރައްވާފައެވެ.
