ރަސްމާލޭގައި ތަރައްގީކުރުމަށް ހަމަޖެހިފައިވާ "ވޯޓަރފްރަންޓް އެންޑް މެރީނާ" މަޝްރޫޢުގެ ތެރެއިން ދިވެހި ވިޔަފާރިވެރިންނަށް ވިޔަފާރިތައް ގާއިމުކުރުމާއި، ފިހާރަތައް ހިންގުމުގެ ފުރުސަތު ފުޅާދާއިރާއެއްގައި ލިބިގެންދާނެ ކަމަށް އީގަލް ހިލްސް ކުންފުނީގެ ޗެއާމަން މުހައްމަދު އަލްއައްބާރު ވިދާޅުވެއްޖެއެވެ.
އަލްއައްބާރު ވިދާޅުވީ، ރަސްމާލެ މަޝްރޫއަކީ ހަމައެކަނި ދިވެހިންނަށް ވަޒީފާގެ ފުރުސަތުތައް ފަހިކޮށްދޭނެ މަޝްރޫއެއް ނޫން ކަމަށެވެ. އޭގެ ބަދަލުގައި، މި މަޝްރޫއުގެ ސަބަބުން ރާއްޖޭގެ ތަރައްގީގައި އަމަލީ ގޮތުން ބައިވެރިވުމުގެ ފުރުސަތު ރާއްޖޭގެ ވިޔަފާރިވެރިންނަށް ހުޅުވިގެންދާނެ ކަމަށް އޭނާ ފާހަގަކުރެއްވިއެވެ.
އަލްއައްބާރު އިތުރަށް ވިދާޅުވީ، ރަސްމާލޭގެ ވޯޓަރފްރަންޓް އަދި މެރީނާ ސަރަހައްދުގައި ރީޓެއިލް ފިހާރަތައް ހިންގުމަށާއި ތަފާތު ވިޔަފާރީގެ ހަރަކާތްތައް ހިންގުމުގެ ފުރުސަތު ދިވެހިންނަށް ލިބިގެންދާނެ ކަމަށެވެ. މީގެ މައިގަނޑު ބޭނުމަކީ ބޭރުގެ އިންވެސްޓްމަންޓްތަކުގެ ތެރެއިން ވެސް ދިވެހި ވިޔަފާރިތަކަށް ސީދާ މަންފާ ލިބޭނެ މަގު ތަނަވަސްކޮށްދިނުމެވެ.
Advertisement
މި ވާހަކަތަކުން ހާމަވެގެންދަނީ، މި ބޮޑު މަޝްރޫއުން ދިވެހިންނަށް ލިބެނީ ހަމައެކަނި ވަޒީފާ އަދާކުރާ މީހެއްގެ ދައުރު ނޫން ކަމާއި، މިއީ ވިޔަފާރީގެ މިލްކުވެރިންގެ ގޮތުގައި އިގްތިސާދީ ބޮޑު މަންފާއެއް ހޯދުމަށް ދިވެހިންނަށް ލިބޭނެ ވަރަށް ރަނގަޅު ފުރުސަތެއް ކަމެވެ.
ދުނިޔޭގެ ފެންވަރުގެ މަޝްހޫރު ކުންފުނި ކަމަށްވާ އީގަލް ހިލްސްއިން ރަސްމާލޭގެ ވޯޓަރފްރަންޓް އަދި މެރީނާ ތަރައްގީކުރުމަށް ރާވަމުން އަންނައިރު، ޗެއާމަން އަލްއައްބާރުގެ މި ވާހަކަތަކުން ދައްކުވައިދެނީ މި މަޝްރޫއުގެ ވިޔަފާރީގެ މައިދާނުގައި ދިވެހިންގެ ހިއްސާ ބޮޑުކުރުމަށް އެ ކުންފުނިން ދޭ އަހައްމިއްޔަތުކަމެވެ.
