ޕާކިސްތާނުގެ އިންޓަރނޭޝަނަލް އިސްލާމިކް ޔުނިވަރސިޓީ އިސްލާމްއާބާދުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއަށް އޮނަރަރީ ޑޮކްޓަރޭޓްގެ ޝަރަފު އަރުވައިފިއެވެ. އެމަނިކުފާނަށް އަރުވާފައިވަނީ "އޮނަރަރީ ޑިގްރީ އޮފް ޑޮކްޓަރ އޮފް ޕޮލިޓިކްސް އެންޑް އިންޓަރނޭޝަނަލް ރިލޭޝަންސް" ގެ ޝަރަފެވެ.
މި ޝަރަފު އެމަނިކުފާނަށް އަރުވާފައިވަނީ ޕާކިސްތާނުގެ ބޮޑުވަޒީރު މުޙައްމަދު ޝެހެބާޒް ޝަރީފާއެކު ބޭއްވެވި ރަސްމީ މަޝްވަރާތަކަށްފަހު، ދެ ޤައުމުގެ ވެރިން ގުޅިގެން ދެއްވި ނޫސްބަޔާނަށްފަހުގައެވެ. މިކަމަށްޓަކައި ޚާއްޞަކޮށް ބޭއްވި ރަސްމިއްޔާތު ޝަރަފުވެރިކޮށްދެއްވައި، ރައީސުލްޖުމްހޫރޔާއަށް މި ސަނަދު ރަސްމީކޮށް ހަވާލުކޮށްދެއްވީ ބޮޑުވަޒީރު ޝެހެބާޒް ޝަރީފެވެ.
މި ޝަރަފަކީ، އެ ޔުނިވަރސިޓީގެ ގަވާއިދުތަކުގެ ދަށުން، ބޯޑް އޮފް ޓްރަސްޓީސްގެ ޗެއާމަން އަދި ޔުނިވަރސިޓީގެ ޗާންސެލަރގެ ހައިސިއްޔަތުން ޕާކިސްތާނުގެ ރައީސް އާސިފް ޢަލީ ޒަރުދާރީއަށް ލިބިވަޑައިގަންނަވާ އިޚްތިޔާރާއި ބާރުގެ ދަށުން، އެމަނިކުފާނުގެ ފަރާތްޕުޅުން އެރުވި ޝަރަފެކެވެ.
Advertisement
ރައީސުލްޖުމްހޫރިއްޔާއަށް މި ޝަރަފު އަރުވާފައިވަނީ، ދިވެހިރާއްޖޭގެ ޢާންމު ޚިދުމަތްތައް ކުރިއެރުވުމަށާއި، ދައުލަތުގެ މުއައްސަސާތައް ހަރުދަނާކޮށް ތަރައްޤީކުރެއްވުމަށް އެމަނިކުފާނު އިސްނަންގަވައިގެން ކުރައްވާފައިވާ އަގުހުރި މަސައްކަތްޕުޅުތަކާއި، ވެރިކަން ހިންގުމުގެ ދާއިރާއިން ހޯއްދަވާފައިވާ ފާހަގަކޮށްލެވޭ ކާމިޔާބީތަކުގެ އަގުވަޒަންކުރުމުގެ ގޮތުންނެވެ. އެމަނިކުފާނަކީ ދައުލަތުގެ އެކި ފަންތީގެ އިސް ފަންނީ މަޤާމުތަކާއި ސިޔާސަތު ކަނޑައެޅުމުގެ މުހިންމު މަސްއޫލިއްޔަތުތައް ފުރުއްވައި، ޤައުމަށް ނުހަނު މަތިވެރި ޚިދުމަތްތަކެއް ކޮށްދެއްވާފައިވާ ލީޑަރެކެވެ.
މީގެއިތުރުން، މާތްވެގެންވާ އިސްލާމްދީނުގެ އުޞޫލުތައް ނެގެހެއްޓެވުމަށާއި، ޢަދުލުއިންޞާފާއި ހަމަހަމަކަން ޤާއިމުކުރެއްވުމަށް އެމަނިކުފާނު ކުރައްވަމުން ގެންދަވާ މަސައްކަތްޕުޅުތައް ޔުނިވަރސިޓީން ވަނީ ފާހަގަކޮށްފައެވެ. އަދި ދިވެހި ރައްޔިތުންގެ މިނިވަންކަމާއި، ޞުލްޙަވެރިކަމާއި، ޤައުމީ ދުޅަހެޔޮކަން ކަށަވަރުކުރެއްވުމަށް ރައީސުލްޖުމްހޫރިއްޔާ ދެއްވާ ޚާއްޞަ އަހައްމިއްޔަތުކަމަކީ، ޤައުމީ ތަރައްޤީއަށާއި ޢާންމު ޚިދުމަތަށް އެމަނިކުފާނުގެ ހިތްޕުޅުގައިވާ އިޚްލާޞްތެރިކަމުގެ ހެއްކެއް ކަމުގައިވެސް ބަޔާންކޮށްފައިވެއެވެ.
ޕާކިސްތާނުގެ އިސްލާމިކް ޔުނިވަރސިޓީން ރައީސުލްޖުމްހޫރިއްޔާއަށް މި ޝަރަފު އަރުވާފައިވާއިރު، މީގެކުރިން މެލޭޝިއާގެ އިންޓަރނޭޝަނަލް އިސްލާމިކް ޔުނިވަރސިޓީންވެސް އެމަނިކުފާނަށް ވަނީ އޮނަރަރީ ޑޮކްޓަރޭޓްގެ ޝަރަފު އަރުވާފައެވެ.
