ކުރިއަށް އޮތް ދެ އަހަރު ދުވަހުގެ ތެރޭގައި ރާއްޖެއާއި ޕާކިސްތާނާ ދެމެދު ކުރެވޭ ވިޔަފާރީގެ މިންވަރު 13 މިލިއަން ޑޮލަރުން 200 މިލިއަން ޑޮލަރަށް އިތުރުކުރުމަށް ގުޅިގެން އެންމެ ފުރިހަމައަށް މަސައްކަތް ކުރައްވާނެ ކަމަށް ޕާކިސްތާނުގެ ބޮޑުވަޒީރު މުހައްމަދު ޝެހްބާޒް ޝަރީފް ވިދާޅުވެއްޖެއެވެ.
ބޮޑުވަޒީރު މިހެން ވިދާޅުވީ، ރައީސުލްޖުމްހޫރިއްޔާ ޑރ. މުޙައްމަދު މުއިއްޒު ޕާކިސްތާނަށް މިހާރު ކުރައްވަމުން ގެންދަވާ ފުރަމާނަ ދަތުރުފުޅުގެ ތެރެއިން، ދެ ގައުމުގެ ދެމެދުގައި އެކި ދާއިރާތަކުން މުހިންމު 20 ފަހުމުނާމާއެއް (އެމްއޯޔޫ) ގައި ސޮއިކުރުމަށް ބޭއްވި ރަސްމިއްޔާތަށްފަހު ދެއްވި ބަޔާނުގައެވެ.
ޕާކިސްތާނުގެ ޕްރައިމް މިނިސްޓަރސް ހައުސްގައި ވާހަކަފުޅު ދައްކަވަމުން ބޮޑުވަޒީރު ޝެހްބާޒް ޝަރީފް ވިދާޅުވީ، ވިޔަފާރީގެ މި އަމާޒަށް ވާސިލުވުމަށް އެއްބަސްވެފައިވަނީ ރައީސް ޑރ. މުޢިއްޒުގެ ފުރިހަމަ ތާއީދާއެކު ކަމަށެވެ. އަދި މިހާރު ދެޤައުމުގެ ދެމެދުގައި ހިނގާ 13.9 މިލިއަން ޑޮލަރުގެ ވިޔަފާރިއަކީ ދެ ގައުމުގެ އިގްތިސާދީ ގާބިލުކަމާ އަޅާބަލާއިރު ވަރަށް ކުޑަ މިންވަރެއް ކަމަށް އެމަނިކުފާނު ފާހަގަކުރެއްވިއެވެ.
Advertisement
ރައީސް ޑރ. މުއިއްޒު ދެއްކެވި ވާހަކަފުޅުގައި، ދެ އަހަރުގެ ތެރޭގައި ވިޔަފާރި 200 މިލިއަން ޑޮލަރަށް އިތުރުކުރުމުގެ އަމާޒަށް ފުރިހަމައަށް ތާއީދުކުރައްވާ ކަމަށް ވިދާޅުވިއެވެ. އަދި އެއްބަސްވުންތަކުގެ މާނަ ހުންނާނީ އޭގެއިން އަމަލީ ނަތީޖާ ފެނިގެން ކަމަށާއި، މި ފަހުމުނާމާތަކުގެ ސަބަބުން ދެ ގައުމުގެ ރައްޔިތުންނަށް ފައިދާހުރި ފުރުސަތުތަކެއް ތަނަވަސްވެގެންދާނެ ކަމަށް ވިދާޅުވިއެވެ.
މި ދަތުރުފުޅަކީ 11 އަހަރަށްފަހު ރާއްޖޭގެ ރައީސަކު ޕާކިސްތާނަށް ކުރެއްވި ފުރަތަމަ ފުރަމާނަ ދަތުރުފުޅެވެ. އަދި މިއީ ދެ ގައުމުގެ ދެމެދުގައި ހާރިޖީ ގުޅުން ގާއިމުކުރިތާ 60 އަހަރު ފުރޭ މުނާސަބަތާ ވެސް ދިމާވި މުހިންމު ދަތުރުފުޅެކެވެ. ޕްރައިމް މިނިސްޓަރސް ހައުސްއަށް ވަޑައިގަތުމުން ރައީސް ޑރ. މުއިއްޒަށް ވަނީ ޝަރަފުގެ ގާޑެއް އަރުވާފައެވެ.
ދެ ލީޑަރުންގެ ދެމެދުގައި ބޭއްވުނު ރަސްމީ މަޝްވަރާތަކުގައި ވިޔަފާރިއާއި، ސިއްހަތު، ތައުލީމު، ޑިފެންސް، މަސްވެރިކަން، ފަތުރުވެރިކަން އަދި އައިޓީގެ ދާއިރާއިން ގުޅުން ބަދަހިކުރުމާ ގުޅޭގޮތުން ވަނީ ފުޅާ ދާއިރާއެއްގައި މަޝްވަރާކުރައްވާފައެވެ. ހާއްސަކޮށް ރާއްޖެއަށް ސިއްޙީ ދާއިރާއިން ޕާކިސްތާނުގެ ޑޮކްޓަރުން އެހީތެރިކަން ފޯރުކޮށްދިނުމާއި، ރާއްޖޭގެ ދަރިވަރުންނަށް އެމްބީބީއެސް ފުރުސަތުތައް އިތުރުކުރުމާއި، ދެގައުމުގެ ދެމެދު ސީދާ ދަތުރުތައް ފެށުމާ ގުޅޭގޮތުން ވާހަކަދެކެވުނެވެ.
މީގެއިތުރުން، ރާއްޖޭގައި ފަސް މިލިއަން ގަސް އިންދުމަށް ސަރުކާރުން ކުރިއަށްގެންދާ މަޝްރޫޢަށް އެހީތެރިވުމުގެ ގޮތުން ޕާކިސްތާނުން 100،000 ޒައިތޫނި ގަހުގެ ކަފް އަދި އެކި ބާވަތުގެ 100،000 ގަހުގެ އޮށް ހަދިޔާކުރާނެ ކަމަށް ބޮޑުވަޒީރު ޝެހްބާޒް އިއުލާނު ކުރެއްވިއެވެ.
ބައިނަލްއަގްވާމީ މަސްރަހަށް އަލިއަޅުއްވާލައްވަމުން، ފަލަސްޠީނުގެ މިނިވަންކަމަށާއި އަމިއްލަ އިހްތިޔާރުގެ ޙައްޤަށް ރާއްޖެއިން ކުރާ ވަކާލާތާއި ދޭ އެއްބާރުލުމަށް ބޮޑުވަޒީރު ޝެހްބާޒް ވަނީ ތައުރީފު ކުރައްވާފައެވެ. ރައީސް މުޢިއްޒު ވެސް ވަނީ 1967 ގެ ކުރީގެ ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސްއަކީ ވެރިރަށް ކަމުގައި ކަނޑައަޅައިގެން ފަލަސްތީނުގެ މިނިވަން ދައުލަތެއް ގާއިމުކުރުމަށް ރާއްޖެއިން އަބަދުވެސް ތާއީދުކުރާނެ ކަމަށް ވިދާޅުވެފައެވެ. އަދި ސާކް ހަރަކާތްތެރި ކުރުމަށް ރާއްޖެއިން އިސްނަގާނެ ކަމަށްވެސް އެމަނިކުފާނު ވިދާޅުވިއެވެ.
މި ދަތުރުފުޅުގެ ތެރެއިން ދެ ޤައުމުގެ ދެމެދުގައި ސޮއިކުރެވުނު 20 ފަހުމުނާމާގެ ތެރޭގައި ޓެކްނޮލޮޖީ، މަސްތުވާތަކެއްޗާ ދެކޮޅަށް މަސައްކަތްކުރުން، ސިއްހީ ދާއިރާ، ކާބޯތަކެތީގެ ރައްކާތެރިކަން އަދި އެސްޓީއޯ އާއި ޕާކިސްތާނުގެ ޓީސީޕީއާ ދެމެދު ވިޔަފާރީގެ އެއްބަސްވުންތައް ހިމެނެއެވެ.
ޕާކިސްތާނުގެ އިންޓަނޭޝަނަލް އިސްލާމިކް ޔުނިވަރސިޓީން ރައީސް ޑރ. މުއިއްޒަށް އޮނަރަރީ ޑޮކްޓަރޭޓް އެރުވުމަށް ހަމަޖެހިފައިވާތީ ބޮޑުވަޒީރު ވަނީ އެމަނިކުފާނަށް މަރުހަބާ ވިދާޅުވެފައެވެ. އަދި ދެ ޤައުމުގެ ގުޅުން އައު އުސްމިންތަކަކަށް ގެންދިއުމަށް ދެ ލީޑަރުން ވަނީ އިގުރާރުވެވަޑައިގެންފައެވެ.
