ފާއިތުވި ދިހަވަރަކަށް އަހަރުގެ ތެރޭގައި ރާއްޖޭގެ ވެރިއަކު ޕާކިސްތާނަށް ކުރައްވާ ފުރަތަމަ ރަސްމީ ދަތުރުފުޅުގައި، ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެ ގައުމަށް ވަޑައިގަތުމަށް ވަނީ ހަމަޖެހިފައެވެ.
މި ދަތުރުފުޅުގައި، ވިޔަފާރި، އިންވެސްޓްމަންޓް، ސިއްހަތު، ތައުލީމު، މޫސުމަށް އަންނަ ބަދަލުތައް، ފަތުރުވެރިކަން އަދި ވައިގެ ދަތުރުފަތުރު ހިމެނޭހެން ދެ ގައުމުގެ ދެމެދުގައި ގުޅުން ބަދަހިކުރެވޭނެ މުހިންމު ދާއިރާތަކާ ގުޅޭގޮތުން މަޝްވަރާކުރައްވާފައިވާ ކަމަށް ޕާކިސްތާނުގެ ހާރިޖިއްޔާއިން ހާމަކުރެއެވެ.
ރައީސް ޑރ. މުއިއްޒު މި މަހުގެ 20 އިން 22 އަށް ކުރައްވާ މި ދަތުރުފުޅުގައި، ޕާކިސްތާނުގެ ރައީސް އާސިފް އަލީ ޒަރްދާރީ އަދި ބޮޑުވަޒީރު ޝެހްބާޒް ޝަރީފާ ބައްދަލުކުރައްވާނެއެވެ. ކެބިނެޓް ވަޒީރުން ހިމެނިވަޑައިގަންނަވާ މަތީ ފަންތީގެ ވަފުދަކާއެކު ކުރައްވާ މި ދަތުރުފުޅުގައި، ދެ ގައުމުގެ ދެމެދުގައި 12 އެއްބަސްވުމަކާއި ފަހުމުނާމާއެއްގައި ސޮއިކުރުމަށް ވަނީ ހަމަޖެހިފައެވެ. މީގެ ތެރޭގައި ސީދާ ވައިގެ ދަތުރުތައް ފެށުމާއި ދިފާއީ ދާއިރާއިން ގުޅުން ބަދަހިކުރުން ހިމެނެއެވެ.
Advertisement
މީގެއިތުރުން، ސާކް ގެ ހަރަކާތްތައް އަލުން ފެށުމާ ގުޅޭގޮތުންނާއި، އދ. އަދި އޯއައިސީ ފަދަ ބައިނަލްއަގްވާމީ މައިދާންތަކުގައި އެއްބާރުލުން ދިނުމާ ގުޅޭގޮތުން ވެސް މި ދަތުރުފުޅުގައި ފުޅާ ދާއިރާއެއްގައި މަޝްވަރާކުރެވޭނެއެވެ.
