ދިވެހިރާއްޖޭގެ ހިޔުމަން ރައިޓްސް ކޮމިޝަން (އެޗްއާރުސީއެމް) އާއި ފިލިޕީންސްގެ ކޮމިޝަން އޮން ހިޔުމަން ރައިޓްސްއާ ދެމެދު ހާއްސަ ފަހުމުނާއެއްގައި ސޮއިކޮށްފިއެވެ. ފިލިޕީންސްގެ ކުއެޒޯން ސިޓީގައި ބޭއްވި މި ރަސްމިއްޔާތުގައި އެޗްއާރުސީއެމްގެ ފަރާތުން ސޮއިކުރެއްވީ ކޮމިޝަނުގެ ރައީސް ޑރ. އާއިޝަތު ރަމީލާއެވެ. އަދި ފިލިޕީންސްގެ ކޮމިޝަނުގެ ފަރާތުން ސޮއިކުރެއްވީ އެ ކޮމިޝަންގެ ޗެއަރޕާސަން ރިޗަރޑް ޕީ. ޕަލްޕަލް-ލަޓޮކްއެވެ.
މި ރަސްމިއްޔާތުގެ ތެރެއިން ދެ މުއައްސަސާއިންވެސް ވަނީ މުހިންމު ކަންތައްތަކެއް ކޮށްފައެވެ. އެގޮތުން އެޗްއާރުސީއެމްގެ މެންޑޭޓާއި، ކުރިއަށްގެންދާ ޕްރޮގްރާމްތަކާއި އިސްނެގުންތަކާ ގުޅޭގޮތުން ޕްރެޒެންޓޭޝަނެއް ހުށަހެޅުއްވިއެވެ. އަދި ފިލިޕީންސްގެ ކޮމިޝަނުންވެސް އިންސާނީ ހައްގުތައް ހިމާޔަތްކުރުމާއި، ސިޔާސަތުތައް އެކަށައެޅުމާއި، ހޭލުންތެރިކަން އިތުރުކުރުމުގެ ދާއިރާއިން ކުރަމުންދާ މަސައްކަތްތަކާ ގުޅޭގޮތުން ޕްރެޒެންޓޭޝަންތައް ހުށަހެޅިއެވެ.
މި އެއްބަސްވުމުގެ ދަށުން ދެ މުއައްސަސާ ގުޅިގެން ކުރުމަށް ނިންމާފައިވާ ކަންތައްތަކުގެ ތަފްސީލުވެސް ހާމަކުރެއްވިއެވެ. އެގޮތުން، ގުޅިގެން ހިންގާ ތަމްރީނުތަކާއި، ދިރާސާ ދަތުރުތައް ކުރުމުގެ އިތުރުން މައުލޫމާތު ހިއްސާކުރުމުގެ ދާއިރާތަކުން އެއްބާރުލުން ދިނުމުގެ ހާއްސަ އޮނިގަނޑެއް އެކުލަވާލުމަށް ނިންމިއެވެ. މިއީ ދެ މުއައްސަސާގެ މެދުގައި އުނގެނުމުގެ ފުރުސަތުތައް ފަހިކޮށްދޭނެ ކަމެކެވެ.
Advertisement
ޑރ. އާއިޝަތު ރަމީލާ ފާހަގަކުރެއްވި ގޮތުގައި މި އެއްބަސްވުމަކީ ދެ ގައުމުގައި އިންސާނީ ހައްގުތައް ހިމާޔަތްކުރުމުގެ މަސައްކަތް އިތުރަށް ހަރުދަނާކުރުމަށް ލިބުނު ފުރުސަތެކެވެ. އަދި މި އެއްބަސްވުމުގެ ޒަރިއްޔާއިން ރަނގަޅު ނަތީޖާތަކެއް ހާސިލުކުރެވޭނީ ދެމެހެއްޓެނިވި ގޮތެއްގައި ގުޅުން ބަދަހިކޮށް، އަމަލީ މަސައްކަތްތަކެއް ކޮށްގެން ކަމަށްވެސް އެކަމަނާ ވިދާޅުވިއެވެ.
