ފިލިޕީންސްގެ މިންޑަނާއޯ އައްސޭރިފަށަށް އިއްޔެ އައި ބާރުގަދަ ބިންހެލުމާ ގުޅިގެން، އެ ގައުމުގެ ރައީސް ފަރޑިނަންޑް ރޮމުއަލްޑޭޒް މާކޯސް ޖޫނިއަރއަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތައުޒިޔާގެ މެސެޖެއް ފޮނުއްވައިފިއެވެ.

ރައީސުލްޖުމްހޫރިއްޔާ ފޮނުއްވި މެސެޖުގައި، މިންޑަނާއޯއަށް އައި މި ބާރުގަދަ ބިންހެލުމުގެ ސަބަބުން ގިނަ ބައެއްގެ ފުރާނަ ގެއްލި، އެތައް ބަޔަކަށް އަނިޔާވި ހަބަރު އެއްސެވީ ވަރަށް ފުން ހިތާމަޔާއެކު ކަމަށް ވިދާޅުވެފައިވެއެވެ.

ދިވެހި ސަރުކާރާއި ރައްޔިތުންގެ ނަމުގައި ރައީސުލްޖުމްހޫރިއްޔާ ވަނީ ފިލިޕީންސްގެ ސަރުކާރަށާއި ރައްޔިތުންނަށް، އަދި ވަކިން ހާއްސަކޮށް މި ހާދިސާގައި ފުރާނަ ގެއްލުނު އާއިލާތަކަށް ނުހަނު އިހްލާސްތެރިކަމާއެކު ތައުޒިޔާ ފޮނުއްވާފައެވެ.

ރައީސުލްޖުމްހޫރިއްޔާގެ މެސެޖު ނިންމަވާލައްވާފައިވަނީ، ބިންހެލުމާ ގުޅިގެން ހާލުގައި ޖެހުނު ފަރާތްތަކަށް އެހީތެރިވުމަށާއި، ލިބުނު ގެއްލުންތަކުން އަރައިގަތުމަށް ކުރަމުންދާ މަސައްކަތްތަކަށް ކާމިޔާބީއަށް އެދިވަޑައިގަންނަވަމުންނެވެ.

ބިންހެލުމާ ގުޅިގެން އުފެދުނު ސުނާމީގެ ރާޅުތައް އިންޑޮނޭޝިއާ، ޕަލާއޫ އަދި ޖަޕާނުގެ ދެކުނު ސަރަހައްދުތަކާ ހަމައަށް ފޯރާފައިވާއިރު، ފިލިޕީންސްގެ ބައެއް އައްސޭރިފަށުގެ އަވަށްތަކަށް ސުނާމީގެ ސަބަބުން ގެއްލުންތައް ލިބިފައިވެއެވެ.

ހާދިސާއާ ގުޅިގެން ފިލިޕީންސްގެ ރައީސް ފަރޑިނަންޑް މާކޯސް ޖޫނިއަރ ވަނީ ސްކޫލްތަކުގެ ކިޔެވުން މެދުކަނޑާލުމަށް އަމުރުކުރައްވައި، ކަމާބެހޭ އިދާރާތަކުން ހާލުގައި ޖެހިފައިވާ ފަރާތްތަކަށް އެހީތެރިކަން ފޯރުކޮށްދިނުމުގެ މަސައްކަތް ވަގުތުން ފެށުމަށް އިރުޝާދު ދެއްވާފައެވެ. ފަރޑިނަންޑް ވިދާޅުވީ ގައުމީ ސަރުކާރުން މިންޑަނާއޯގެ ރައްޔިތުންނަށް ފުރިހަމަ އެހީތެރިކަން ފޯރުކޮށްދޭނެ ކަމަށެވެ.

މި ކާރިސާއާ ގުޅިގެން އެމެރިކާ، ފްރާންސް، ޖަޕާން އަދި ނިއުޒީލަންޑުން ވަނީ ފިލިޕީންސަށް އެހީތެރިކަން ފޯރުކޮށްދިނުމަށް ތައްޔާރަށް ތިބިކަން ހާމަކޮށްފައެވެ. ބިންހެލުމުގައި މަރުވި މީހުންގެ ތެރެއިން ގިނަ މީހުން މަރުވެފައިވަނީ އިމާރާތްތައް ވެއްޓުމާއި، މިސްކިތެއްގެ ފާރު ވެއްޓުމުގެ ސަބަބުން ކަމަށް ރިޕޯޓުތައް ބުނެއެވެ.