ދިވެހިރާއްޖޭގެ ޖުމްހޫރިއްޔާގެ ގާނޫނުއަސާސީގެ 190 ވަނަ މާއްދާގެ (ށ) އާއި، ހިއުމަން ރައިޓްސް ކޮމިޝަނުގެ ގާނޫނުގެ 5 ވަނަ މާއްދާގެ (ހ) ގެ ދަށުން، ހިއުމަން ރައިޓްސް ކޮމިޝަން އޮފް ދަ މޯލްޑިވްސް (އެޗް.އާރް.ސީ.އެމް) ގެ މެންބަރުކަމުގެ މަގާމަށް ހ. މީނާޒް، އަލްފާޟިލް ޝަމްއޫން ހަމީދު، ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު އައްޔަންކުރައްވައިފިއެވެ.
މިއަދު ހެނދުނު ރައީސުލްޖުމްހޫރިއްޔާގެ އޮފީހުގައި ބޭއްވެވި ހާއްސަޗރަސްމިއްޔާތެއްގައި ޝަމްއޫން ހަމީދަށް މެންބަރުކަމުގެ ހުވައި ލައިދެއްވީ، ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު ޑރ. މުހައްމަދު އިބްރާހީމެވެ. މި ރަސްމިއްޔާތުގައި، މަގާމަށް އައްޔަންކުރެއްވި ކަމުގެ ލިޔުން ރައީސުލްޖުމްހޫރިއްޔާ ވަނީ އެމަނިކުފާނާ ހަވާލުކުރައްވާފައެވެ.
އަލަށް އައްޔަންކުރެއްވި ޝަމްއޫން ހަމީދަކީ މީގެ ކުރިންވެސް އެޗް.އާރް.ސީ.އެމް ގައި އަގުހުރި ހިދުމަތްތަކެއް ކުރައްވާފައިވާ ބޭފުޅެކެވެ. އެގޮތުން 2010 އިން 2012 އަށް އެ ކޮމިޝަނުގެ އިންވެސްޓިގޭޝަން ޑިޕާޓްމަންޓުގެ ޑިރެކްޓަރުކަން، އަދި 2012 އިން 2016 އަށް ސެކްރެޓަރީ ޖެނެރަލްގެ މަގާމު އެމަނިކުފާނު ވަނީ ފުރުއްވާފައެވެ. މީގެއިތުރުން ޔޫ.ޕީ.އާރް ރިޕޯޓު ކުރުމުގެ ފޯކަލް ޕޮއިންޓެއްގެ ގޮތުގައި މަސައްކަތްކުރެއްވުމުގެ އިތުރަށް، "ނުކުޅެދުންތެރިކަން ހުންނަ ކުދިންނަށް ތައުލީމު ހާސިލުކުރުމަށް ހުރި ފުރުސަތުތަކާއި ކުޑަކުދިންގެ ހައްގުތައް ރައްކާތެރިކުރުމާ ގުޅޭގޮތުން" ކުރިއަށްގެންދިޔަ ގައުމީ ދިރާސާތަކުގައިވެސް އެމަނިކުފާނު ވަނީ މުހިންމު ދައުރެއް އަދާކުރައްވާފައެވެ.
Advertisement
އިންސާނީ ހައްގުތަކުގެ ދާއިރާއިން ފާހަގަކޮށްލެވޭ ފަދަ ގިނަ ހިދުމަތްތަކެއް ކުރައްވާފައިވާ ޝަމްއޫން ހަމީދު އެންމެ ފަހުން އަދާކުރައްވާފައިވަނީ މިނިސްޓްރީ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖްގެ ޕާމަނަންޓް ސެކްރެޓަރީގެ މަގާމެވެ. އެމަނިކުފާނުގެ ތަޖުރިބާއާއެކު އެޗް.އާރް.ސީ.އެމްގެ މަސައްކަތްތަކަށް އިތުރު ހަލުވިކަމަކާއި ކުރިއެރުމެއް ލިބިގެންދާނެ ކަމަށް ބެލެވެއެވެ.
