އަމިއްލަ ހަރަދުގައި ބޭސްފަރުވާއަށް ރާއްޖެއިން ބޭރަށް ދާ ދިވެހިންނަށް ދޫކުރާ 1،000 އެމެރިކާ ޑޮލަރު، ދިވެހިން އާންމުކޮށް ބޭސްފަރުވާއަށް ދާ ހާއްސަ 6 ގައުމަކަށް އެކަނި ދޫކުރާ ގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ހަމަޖައްސައިފިއެވެ.
މަރުކަޒީ ބޭންކް، އެމްއެމްއޭއިން ނިންމާފައިވާ ގޮތުގައި މި ފައިސާ ދެން ދޫކުރެވޭނީ އިންޑިއާ، ސްރީލަންކާ، ތައިލެންޑް، މެލޭޝިއާ، ސިންގަޕޫރު އަދި ޔުނައިޓެޑް އަރަބް އެމިރޭޓްސް (ޔޫ.އޭ.އީ) އަށް ބޭސްފަރުވާއަށް ދާ ފަރާތްތަކަށް އެކަންޏެވެ.
އުސޫލަށް މިފަދަ ބަދަލެއް ގެނައުމުގެ މައިގަނޑު ބޭނުމަކީ ބޭސްފަރުވާގެ ބޭނުންތަކަށް ފޯރުކޮށްދޭ ބޭރު ފައިސާއަކީ ސީދާ އެ ބޭނުމަށް ހަރަދުކުރެވޭ އަދަދުތަކެއްކަން ކަށަވަރުކުރުމެވެ. އެމްއެމްއޭއިން ހާމަކުރި ގޮތުގައި، 2025 ވަނަ އަހަރުގެ އޮގަސްޓް މަހުން ފެށިގެން އަމިއްލަ ހަރަދުގައި ބޭސްފަރުވާއަށް ދާ މީހުންނަށް 1،000 ޑޮލަރު ވިއްކަން ފެށުމާއެކު، ބޭސްފަރުވާއަށް ވިއްކި ޖުމުލަ ޑޮލަރުގެ އަދަދު ވަނީ ވަރަށް ބޮޑަށް އިތުރުވެގެން ގޮސްފައެވެ.
Advertisement
ތަފާސްހިސާބުތަކުން ދައްކާ ގޮތުގައި، 2026 ވަނަ އަހަރުގެ ސެޕްޓެންބަރު މަހުގެ ނިޔަލަށް ބޭސްފަރުވާގެ ބޭނުންތަކަށް މުޅި ޖުމްލަ 41.1 މިލިއަން އެމެރިކާ ޑޮލަރު ވަނީ ވިއްކާފައެވެ. މިއީ 2025 ވަނަ އަހަރުގެ މި މުއްދަތާ އަޅާބަލާއިރު ތިން ގުނަ އިތުރު އަދަދެކެވެ. އަދި މީގެ ތެރެއިން އެންމެ ބޮޑު ބަޔެއް ހިއްސާކުރަނީ އަމިއްލަ ހަރަދުގައި ބޭސްފަރުވާއަށް ދިޔަ ދިވެހިންނަށް ވިއްކި 29.2 މިލިއަން އެމެރިކާ ޑޮލަރެވެ.
މި ބަދަލާއެކުވެސް، އަމިއްލަ ހަރަދުގައި މި 6 ގައުމަށް ބޭސްފަރުވާއަށް ދާ ފަރާތްތަކަށް ކުރިއެކޭވެސް އެއްގޮތަށް ބޭންކުތައް މެދުވެރިކޮށް 1،000 ޑޮލަރު ދޫކުރަމުންދާނެއެވެ. މީގެއިތުރުން، އާސަންދަ މެދުވެރިކޮށް ބޭސްފަރުވާއަށް ދާ ފަރާތްތަކަށް ދޫކުރާ 2،000 އެމެރިކާ ޑޮލަރަށް އެއްވެސް ބަދަލެއް ނާންނާނެ ކަމަށާއި، އެ ފަރާތްތަކަށް ކުރިއެކޭ އެއްގޮތަށް އެ ފައިސާ ލިބެމުންދާނެ ކަމަށް އެމްއެމްއޭއިން ވަނީ ކަށަވަރުކޮށްދީފައެވެ.
މި އައު އުސޫލުގެ ސަބަބުން ބޭރު ފައިސާ ނަހަމަ ގޮތުގައި ބޭނުންކުރުން ހުއްޓުވި، ސީދާ ބޭސްފަރުވާއަށް ބޭނުންވާ ދިވެހި ރައްޔިތުންނަށް ބޭރު ފައިސާ ފަސޭހަކަމާއެކު ލިބޭނެ ހަރުދަނާ ނިޒާމެއް ގާއިމުވެގެންދާނެއެވެ. އަދި ރާއްޖެއިން ބޭރުން ސިއްހީ ހިދުމަތް ހޯދާ ފަރާތްތަކަށް މާލީ ގޮތުން ލުއިފަސޭހަތައް ފޯރުކޮށްދިނުމުގެ އިންތިޒާމުތައް އިތުރަށް ހަރުދަނާކުރުމަށް ސަރުކާރާއި އެމްއެމްއޭއިން ދަނީ ގިނަ މަސައްކަތްތަކެއް ކުރަމުންނެވެ.
