މިދިޔަ ސެޕްޓެންބަރު މަހު މިފްކޯއަށް ކިރުވި މަހަށް 27 މިލިއަނަށް ވުރެ ގިނަ ރުފިޔާ މަސްވެރިންނަށް ދޫކޮށްފައިވާ ކަމަށް މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ (މިފްކޯ) އިން ހާމަކޮށްފިއެވެ.
އެ ކުންފުނީގެ ތަފާސްހިސާބުތައް ދައްކާ ގޮތުގައި، މިދިޔަ މަހު 453 ދޯންޏަކުން ޖުމްލަ 1،288 ޓަނުގެ މަސް ކިރުވާފައިވެއެވެ. އަދި އެ މަހަށް ވާ ފައިސާގެ ގޮތުގައި 27،323،275 (ހަތާވީސް މިލިއަން ތިން ލައްކަ ތޭވީސް ހާސް ދުއިސައްތަ ހަތްދިހަ ފަސް) ރުފިޔާ މަސްވެރިންނަށް ވަނީ ދޫކޮށްފައެވެ.
ކިރުވި މަހުގެ ތަފުސީލަށް ބަލާއިރު:
Advertisement
- 451 ދޯންޏަކުން ކިރުވި 1،281 ޓަނުގެ ކަޅުބިލަމަހަށް: 27،226،555 ރުފިޔާ
- 10 ކިލޯއިން މަތީގެ 0.5 ޓަނުގެ ކަންނެއްޔަށް: 900 ރުފިޔާ
- 5 ދޯންޏަކުން ކިރުވި، 15 ކިލޯއިން މަތީގެ 3.8 ޓަނުގެ ކަންނެއްޔަށް: 95،825 ރުފިޔާ
ރާއްޖޭގެ މަސްވެރިކަމުގެ ސިނާއަތް އިތުރަށް ތަރައްގީކޮށް، އިގްތިސާދަށް އެންމެ ބޮޑު އާމްދަނީއެއް ވައްދައިދޭ އެއް ދާއިރާއަށް ހެދުމަށް ސަރުކާރުން އަންނަނީ ހާއްސަ އިސްކަމެއް ދީގެން ގިނަ މަސައްކަތްތަކެއް ކުރަމުންނެވެ. އެގޮތުން، މަސްވެރިން ކިރުވާ މަހަށް 48 ގަޑިއިރުގެ ތެރޭގައި ފައިސާ މިފްކޯއިން ދަނީ ދޫކުރަމުންނެވެ.
މީގެއިތުރުން، މަސްވެރިކަމުގެ ހަރަދުތައް ކުޑަކުރުމުގެ ގޮތުން، ހާއްސަ ހެޔޮ އަގެއްގައި ތެޔޮ ފޯރުކޮށްދިނުމުގެ މަސައްކަތް ވެސް ސަރުކާރުން އަންނަނީ ކުރަމުންނެވެ. އެގޮތުން މިހާރު ރާއްޖޭގެ 9 ސަރަޙައްދަކުން މި ހާއްސަ އަގުގައި މަސްވެރިންނަށް ތެޔޮ ލިބޭނެ އިންތިޒާމު ހަމަޖައްސާފައިވާ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވުޒާރާއިން ވިދާޅުވެފައިވެއެވެ.
