ރައްޔިތުންނަށް ސީދާ މަންފާ ލިބޭނެހެން ސަރުކާރުން 10 ރިސޯޓު ތަރައްގީކުރުމަށް ނިންމާފައިވާ ނިންމުމަކީ، ދިވެހިރާއްޖޭގެ ފަތުރުވެރިކަމުގެ ސިނާއަތަށް އިންގިލާބީ ބަދަލެއް ގެނުވާނެ ކަމެއް ކަމުގައި ކްރައުން ގްރޫޕުގެ ޗެއާމަން އަދި މި ދާއިރާގެ އިސް ވިޔަފާރިވެރިޔާ އަލްފާޟިލް ހުސައިން އަފީފް (ޗަމްޕާ އަފީފް) ވިދާޅުވެއްޖެއެވެ.
ގައުމީ ފަތުރުވެރިކަމުގެ ދުވަސް ފާހަގަކުރުމަށް ބޭއްވި ހާއްސަ ރަސްމިއްޔާތުގައި ވާހަކަފުޅު ދައްކަވަމުން އަފީފް ވިދާޅުވީ، މި އިސްނެގުމުގެ ސަބަބުން ރާއްޖޭގެ އިގްތިސާދުގެ މައިބަދަ ކަމުގައިވާ ފަތުރުވެރިކަމުގެ މަންފާ، އާންމު ރައްޔިތުންގެ ބޮޑު އާބާދީއަކަށް ސީދާ ގޮތެއްގައި ލިބިގެންދާނެ ކަމަށެވެ.
ސަރުކާރުގެ އަމާޒަކީ ކުރިއަށް އޮތް ތިން އަހަރު ދުވަހުގެ ތެރޭގައި، ސަރުކާރު ހިއްސާވާ ކުންފުންޏެއް މެދުވެރިކޮށް 10 ރިސޯޓު ތަރައްޤީކުރުމެވެ. މި މަޝްރޫޢުގެ ދަށުން ތަރައްގީކުރެވޭ ރިސޯޓުތަކުގެ ހަގީގީ ހިއްސާދާރުންނަކީ ދިވެހި ރައްޔިތުންނެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު މީގެކުރިން ހާމަކުރައްވާފައިވާ ގޮތުގައި، މި މަޝްރޫއު ފުރިހަމަވެ ހިނގައިގަތުމުން ކޮންމެ ދިވެހި ރައްޔިތަކަށް އަހަރަކު މަދުވެގެން 400 އެމެރިކާ ޑޮލަރުގެ ސީދާ މާލީ މަންފާއެއް ލިބިގެންދާނެއެވެ.
Advertisement
މި މަޝްރޫޢަށް ތަޢުރީފު ކުރައްވަމުން ޢަފީފް ވިދާޅުވީ، މިއީ ނުހަނު އުންމީދީ މަޝްރޫޢެއް ކަމަށާއި، މިއީ ކާމިޔާބުވާނެ ކަމެއް ކަމުގެ ފުރިހަމަ ޔަގީންކަން އެބައޮތް ކަމަށެވެ. އަދި މި މަސައްކަތުގައި އެހީތެރިކަން ފޯރުކޮށްދެއްވުމަށް ތައްޔާރަށް ހުންނެވި ކަމަށްވެސް އޭނާ ވިދާޅުވިއެވެ. މީގެއިތުރުން، ރާއްޖޭގެ ފަތުރުވެރިކަން މިއަދު ދެކެމުންމިދާ ކާމިޔާބީގެ އަސްލަކީ ސަރުކާރާއި އަމިއްލަ ވިޔަފާރިވެރިންގެ މެދުގައި އޮތް ބަދަހި ގުޅުންކަން ފާހަގަކުރައްވައި، ކުރިއަށް އޮތް ތަނުގައިވެސް އެ އެއްބާރުލުން ދެމެހެއްޓުމުގެ މުހިންމުކަމުގެ މައްޗަށް އަލިއަޅުއްވާލެއްވިއެވެ.
ފަތުރުވެރިކަން އިތުރަށް ފުޅާކުރަމުންދާއިރު، ފާއިތުވި ދިހަވަރަކަށް އަހަރުގެ ތަޖުރިބާތަކުން އިބުރަތް ހާސިލުކުރުމަކީ ކޮންމެހެން ބޭނުންތެރި ކަމެއްކަން ޢަފީފް ފާހަގަކުރެއްވިއެވެ. ސަރުކާރުން މިހާރު ވަނީ މި 10 ރިސޯޓު ތަރައްގީކުރުމަށް މާލެ އަތޮޅާއި ކައިރި އެހެން ސަރަޙައްދުތަކުން ރަށްތަކާއި ފަޅުތައް ކަނޑައަޅާފައެވެ. އަދި އަންނަ ނޮވެމްބަރު މަހުގެ ތެރޭގައި މީގެތެރެއިން ބައެއް މަޝްރޫޢުތަކުގެ ޢަމަލީ މަސައްކަތް ފެށޭނެ ކަމަށް ރައީސުލްޖުމްހޫރިއްޔާ ވަނީ ވިދާޅުވެފައެވެ.
ރައީސް ޑރ. މުއިއްޒު ވިދާޅުވި ގޮތުގައި، ފަތުރުވެރިކަމުގެ ނަފާ މަދު ބައެއްގެ މެދުގައި އެކަނި ހިފެހެއްޓިފައި އޮތުމުގެ ބަދަލުގައި، އޭގެ މުއްސަނދިކަން ކޮންމެ ދިވެހި ރައްޔިތަކަށްވެސް އިންސާފުވެރިކަމާއެކު ފޯރުކޮށްދިނުމަކީ ސަރުކާރުގެ މައިގަނޑު ސިޔާސަތެކެވެ.
މި ރަސްމިއްޔާތުގައި ޢަފީފް ވަނީ ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންގެ އަގުވަޒަންކުރައްވައި، ޤައުމީ އިގްތިސާދު ބިނާކުރުމުގައި އެ ފަރާތްތަކުން އަދާކުރާ މުހިންމު ދައުރު ފާހަގަކުރައްވާފައެވެ. ހާއްސަކޮށް، އާއިލާއާ ދުރުގައި ރިސޯޓުތަކުގައި ތިބެގެން މުވައްޒަފުން ވަމުންދާ ގުރުބާނީތައް އޭނާ ފާހަގަކުރެއްވީ ނުހަނު ޝުކުރުވެރިކަމާއެކުގައެވެ.
