ދިވެހި ރައްޔިތުންނަކީ ދައުލަތަށް އެންމެ ފައިދާހުރި، ގައުމަށް އެންމެ ލާބަހުރި، އަދި ރާއްޖެއަށް ތަރައްގީއާއި ކުރިއެރުން ހޯދައިދިނުމުގައި ކުރިއަށްދާ ލާމަސީލު ނަމޫނާ ބައެއް ކަމަށް ޖުމްހޫރީ ދުވަހުގެ މުނާސަބަތުގައި ބޭއްވި ހާއްސަ ރަސްމީ ޖަލްސާގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. ގައުމުގެ ތާރީހާއި ތަރައްގީގެ މަރުހަލާތަކުގެ މައްޗަށް އަލިއަޅުއްވާލައްވަމުން ރައީސް ވިދާޅުވީ، ރާއްޖެއިން ކުރިއެރުމުގެ މަގުތައް ހޯދައި، ޒަމާނީ ބަދަލުތަކާއެކު ކުރިއަށް ދިއުމުގައި ދިވެހިންގެ ވިސްނުމާއި އަމަލުތައް އަބަދުވެސް ފާހަގަކުރެވޭ ކަމަށެވެ.
ދީނީ ގޮތުން ބަލާއިރު، މާތްވެގެންވާ އިސްލާމްދީން ދުނިޔޭގެ އެކި ކަންކޮޅުތަކަށް ފެތުރިގެންދިޔަ ކުރީކޮޅު ދިވެހިން އެ މާތް ދީން ހިޔާރުކުރީ، އެއީ އެންމެ ފުރިހަމަ ހައްގު ދީން ކަމުގައި ވާތީ ކަމަށް ރައީސް ވިދާޅުވިއެވެ. ވަށައިގެންވާ މާހައުލުގައި ހުރި ކުލަތަކަށް ފަރުވާލެއް ނުބަހައްޓައި، ދިވެހިން ލިބިގަތީ އާލަމްތަކުގެ ވެރި ﷲގެ ރިއާޔަތްތެރިކަން ކަމަށް ފާހަގަކުރައްވައި، އިސްލާމީ އުސޫލުތަކާއި ވަހްދަތު ދެމެހެއްޓުމަށް ސަރުކާރުން އަބަދުވެސް އިސްކަންދޭނެ ކަމުގެ ޔަގީންކަން ދެއްވިއެވެ.
ގާނޫނު އަސާސީއަށް ބަލާއިރުވެސް މި ސަރަހައްދުގައި އެންމެ ފުރަތަމަ ލިޔެވިގެންވާ ފުރިހަމަ ގާނޫނު އަސާސީއެއް ގަބޫލުކުރީ ދިވެހިން ކަމަށާއި، އޭރު އޮތް ރަސްކަމާއި ސަގާފަތާއެކުވެސް އެ ގާނޫނު އަސާސީން ދިވެހިންނަށް އެތައް ހައްގެއް ކަށަވަރުކުރެވުނު ކަމަށް ރައީސް ވިދާޅުވިއެވެ. އަދި އޭގެ ފަހުން ވެރިކަމުގެ ނިޒާމަށް އިންގިލާބީ ބަދަލުތަކެއް ގެނެސް، ރައްޔިތުން އިންތިހާބުކުރާ ވެރިޔަކާއެކު ދައުލަތް ހިންގާ ބަޔަކަށް ދިވެހިން ވެގެންދިޔަކަން އެމަނިކުފާނު ފާހަގަކުރެއްވިއެވެ.
ތާރީހީ މަރުހަލާތަކަށް ބަލާއިރު، ރަސްކަމަކުން އިންތިހާބީ ރަސްކަމަކަށް، އަދި އިންތިހާބީ ރަސްކަމަކުން ޖުމްހޫރީ ވެރިކަމަކަށް ބަދަލުވެ، މިހާރު ޒަމާނީ ޑިމޮކްރަސީގެ އުސޫލުތައް ދިވެހިން ލިބިގެންފައިވާކަން ރައީސް ފާހަގަކުރެއްވިއެވެ.
"ދިވެހި ރައްޔިތުންނަކީ، ދިވެހި ދައުލަތަށް އެންމެ ފައިދާ ހުރި، ދިވެހި ގައުމަށް އެންމެ ލާބަހުރި، އަދި ދިވެހި ރާއްޖެއަށް ތަރައްގީއާއި ކުރިއެރުން ލިބި އެންމެހާ މަގުތައް ހޯދާ އެމަގުތަކުގައި ކުރިޔަށް ދިއުމަށް ލާމަސީލު ނަމޫނާ ރައްޔިތުންތަކެއް"
ދިވެހިންގެ ތާރީހީ މި ހާސިއްޔަތަށް އަލިއަޅުއްވާލައްވަމުން ރައީސުލްޖުމްހޫރިއްޔާ ވިދާޅުވިއެވެ.
މި ތާރީހީ ހަގީގަތްތަކުން ސާބިތުވަނީ ދިވެހި ރައްޔިތުންނަކީ ގައުމުގެ ކުރިއެރުމާއި ތަރައްގީއަށް އެންމެ ފައިދާހުރި، އަދި އަމާންކަމާއި ކުރިއެރުމުގެ މަގުތައް ހޯދައި އެ މަގުގައި ކުރިއަށް ދިއުމުގައި ލާމަސީލު ނަމޫނާއެއް ކަމަށް ރައީސް ވިދާޅުވިއެވެ. އެގޮތުން ގައުމީ މަސްލަހަތު ހިމާޔަތްކޮށް، ގައުމުގެ ދެމެހެއްޓެނިވި ތަރައްގީއަށްޓަކައި ސަރުކާރުން ފަށާފައިވާ މަޝްރޫއުތަކާއި އިސްލާހީ މަސައްކަތްތައް ފުރިހަމަކޮށް، ގައުމުގެ މުސްތަގްބަލް އުޖާލާކުރުމަށް ސަރުކާރުން ދެމިތިބޭނެ ކަމުގެ ޔަގީންކަން ރައީސް ޑރ. މުޢިއްޒު ދެއްވިއެވެ.





