ހުޅުމާލޭގައި ދިރިއުޅޭ އިސްރަށްވެހިންގެ ދުޅަހެޔޮކަން އިތުރުކޮށް، އިޖުތިމާއީ ގުޅުންތައް ބަދަހިކުރުމުގެ މަގުސަދުގައި "ދުޅަހެޔޮ އިސްރަށްވެހިން"ގެ ނަމުގައި ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އާއި މިނިސްޓްރީ އޮފް ހެލްތު ގުޅިގެން ހާއްސަ ޕްރޮގްރާމެއް ފަށައިފިއެވެ.
މިއަހަރުގެ އިސްރަށްވެހިންގެ ދުވަސް ފާހަގަކުރުމުގެ ގޮތުން މިއަދު ހެނދުނު ހުޅުމާލޭ ސެންޓްރަލް ޕާކުގައި ބޭއްވި ހާއްސަ ރަސްމިއްޔާތެއްގައި މި ޕްރޮގްރާމު ރަސްމީކޮށް އިފްތިތާހުކޮށްދެއްވީ މިނިސްޓަރ އޮފް ހެލްތު، ވެލްފެއާ އެންޑް ފެމިލީ، ޑރ. ޢާއިޝަތު ރަމީލާގެ ބަދަލުގައި، މިނިސްޓްރީގެ އިސް ވެރިއެއްގެ ގޮތުން ޚާއްސަ ދައުރެއް އަދާކުރައްވާ ގީލާ އަލީއެވެ.
މި ޕްރޮގްރާމަކީ ގިނަ އިސްރަށްވެހިން އަބަދު ގޭގައި ތިބެންޖެހޭ ޖެހުމާއި، އިޖުތިމާއީ ހަރަކާތްތަކުން އެކަހެރިވުން ނައްތާލައި، އެފަރާތްތަކަށް އުފާވެރި އަދި ހަރަކާތްތެރި މާހައުލެއް ގާއިމުކޮށްދިނުމުގެ މަގްސަދުގައި ފެށި ޕްރޮގްރާމެކެވެ. އެގޮތުން، މި ޕްރޮގްރާމްގައި ބައިވެރިވާން އެދޭ ހުރިހާ އިސްރަށްވެހިންނަށްވެސް ރަޖިސްޓްރޭޝަނާއި ސެޝަންތަކުގައި ބައިވެރިވުން މުޅިން ހިލޭ ވަނީ ހަމަޖައްސައިދީފައެވެ.
Advertisement
މި ހަރަކާތުގެ ދަށުން ކޮންމެ ހަފްތާއަކު ތިން ދުވަހު، އިސްރަށްވެހިންގެ އުމުރާ ގުޅޭގޮތަށް ފަރުމާކޮށްފައިވާ ލުއި ކަސްރަތުތަކާއި، ހިނގުމާއި، ސްޓްރެޗިންގ އަދި ނޭވާލުމުގެ ކަސްރަތުތައް ކުރިއަށްގެންދިއުމަށް ވަނީ ހަމަޖެހިފައެވެ. މީގެއިތުރުން "ގޯލްޑަން އަވާ"ގެ ނަމުގައި ހަފްތާއަކު އެއްފަހަރު ނުވަތަ ކޮންމެ ދެ ހަފްތާއަކުން އެއް ދުވަހު، އިސްރަށްވެހިންގެ މެދުގައި އެކުވެރިކަން ބަދަހިކުރުމަށް ހަވީރުގެ ސައެއް ބޭއްވުމަށްވެސް ވަނީ ނިންމާފައެވެ.
ހަމައެއާއެކު، މަހަކު އެއްފަހަރު ކުޑަގިރި ނުވަތަ އެނޫންވެސް ހިތްފަސޭހަ ކައިރި ރަށަކަށް ދަތުރުގޮސް މަޖާ މާހައުލެއްގައި ވަގުތު ހޭދަކުރުމާއި، އަހަރުގެ ކޮންމެ ކުއާޓަރަކު އެއްފަހަރު ލޭގެ ޕްރެޝަރު ބެލުން ފަދަ މެޑިކަލް ޗެކަޕްތައް ހެދުމުގެ އިންތިޒާމުވެސް ހަމަޖެހިގެންދާނެއެވެ. އަދި ޒުވާނުންނާއި ކުޑަކުދިންނަށް އިސްރަށްވެހިންގެ ފަރާތުން ސަގާފީ މައުލޫމާތާއި ތަޖުރިބާ ހިއްސާކުރުމުގެ ހަރަކާތްތައްވެސް މި ޕްރޮގްރާމުގެ ތެރެއިން ކުރިއަށްދާނެއެވެ.
މި ޕްރޮގްރާމްގެ ހުރިހާ ހަރަކާތެއްގައިވެސް ބައިވެރިންގެ ރައްކާތެރިކަމާއި ސިއްހީ ހާލަތަށް ހާއްސަ ސަމާލުކަމެއް ދިނުމުގެ ގޮތުން ދަތުރުފަތުރުގެ އިންތިޒާމުތަކާއި، ސެޝަންތައް ކުރިއަށްދާ ވަގުތު ފަސްޓްއެއިޑްގެ ޚިދުމަތާއި، ބޯފެނާއި އަރާމުކުރާނެ ވަސީލަތްތައް ފޯރުކޮށްދިނުމަށް ވަނީ ހަމަޖެހިފައެވެ.
މި ޕްރޮގްރާމަކީ އެޗްޑީސީއާއި މިނިސްޓްރީ އޮފް ހެލްތުގެ އިތުރުން، ހުޅުމާލެ ހޮސްޕިޓަލާއި، ދިވެހި ފުލުހުންގެ ޚިދުމަތާއި، ފިޒިއޯ ސޮލިއުޝަންސް، މޯލްޑިވްސް ޕެންޝަން އެޑްމިނިސްޓްރޭޝަން އޮފީސް، އެމްޓީސީސީ، އުރީދޫ މޯލްޑިވްސް އަދި އެކިއެކި ޖަމިއްޔާތަކުގެ އެއްބާރުލުމާއެކު ކުރިއަށްގެންދާ ހަރަކާތެކެވެ.
އެޗްޑީސީގެ މައިގަނޑު އަމާޒަކީ މިފަދަ ޕްރޮގްރާމްތަކުގެ ޒަރީއާއިން އިސްރަށްވެހިންގެ ސިއްހީ އަދި ނަފްސާނީ ދުޅަހެޔޮކަން ކަށަވަރުކޮށް، ހުޅުމާލެއަކީ ހުރިހާ އުމުރެއްގެ ރައްޔިތުންނަށްވެސް އުފަލާއި ހިތްހަމަޖެހުމާއެކު ދިރިއުޅެވޭނެ ފަހި މާހައުލަކަށް ހެދުމެވެ.
