މާލޭ ވިޔަފާރި ބަނދަރު ތިލަފުއްޓަށް ބަދަލުކުރުމުގެ މަޝްރޫއަކީ 2040 ވަނަ އަހަރު އަންނައިރު ދިވެހިރާއްޖެ ތަރައްގީވެފައިވާ ގައުމަކަށް ހެދުމަށްޓަކައި އެޅޭ އެންމެ ވަރުގަދަ އެއް ބިންގާ ކަމަށް އިކޮނޮމިކް މިނިސްޓަރު މުހައްމަދު ސައީދު ވިދާޅުވެއްޖެއެވެ.
ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ އަރިހުގައި ތިލަފުއްޓަށް ވަޑައިގެން، އެ ސަރަހައްދުގައި ކުރިއަށްދާ މަސައްކަތްތައް ބައްލަވާލެއްވުމަށްފަހު މިނިސްޓަރ ވިދާޅުވީ، މިއީ މި ސަރުކާރުން ހާއްސަ އިސްކަމެއް ދީގެން ކުރިއަށްގެންދާ މުހިންމު މަޝްރޫއެއް ކަމަށެވެ. އަދި ވިޔަފާރި ބަނދަރު ބަދަލުނުކުރެވި ގިނަ އަހަރުތަކެއް ވޭތުވެދިޔުމަކީ ރާއްޖޭގެ އިގްތިސާދަށް ކުރިމަތިވެފައި އޮތް ބޮޑު ހުރަހެއްކަން ވެސް މިނިސްޓަރ ފާހަގަކުރެއްވިއެވެ.
މި މަޝްރޫއުގެ ތަފްސީލު ހާމަކުރައްވަމުން މިނިސްޓަރ ވިދާޅުވީ، އަންނަ އަހަރުގެ ނޮވެމްބަރު މަހުގެ ނިޔަލަށް މަޝްރޫއުގެ ފުރަތަމަ ފިޔަވަހި ނިންމުމަށާއި، 2028 ވަނަ އަހަރުގެ ނޮވެމްބަރާ ހަމައަށް މުޅި މަޝްރޫއު އެއްކޮށް ނިންމުމަކީ ސަރުކާރުގެ މައިގަނޑު އަމާޒު ކަމަށެވެ. މީގެއިތުރުން، މި ބަދަލާއެކު މާލޭ ބާޒާރުމަތީގައި ހުރި އަތޮޅު ފިހާރަތައް ފަދަ ވިޔަފާރި އޮޕަރޭޝަންތައްވެސް ތިލަފުއްޓަށް ބަދަލުކުރެވިގެންދާނެ ކަމަށް ވިދާޅުވިއެވެ.
Advertisement
"މި މަޝްރޫޢު ނިމޭއިރު ބައިނަލްއަގްވާމީ ފެންވަރުގެ ކީވޯލްއާއި ޒަމާނީ ބަނދަރެއް ޤާއިމުވެ، ސްޓޯރޭޖް ވެއަރހައުސްތަކާއި ބާޒާރުމަތީގެ އޮޕަރޭޝަންތައް ބަދަލުކުރެވި، ފްރީޒޯންތަކާއި ގުދަންތައް ގާއިމުވެގެންދާނެ. އަދި ބްރިޖް މެދުވެރިކޮށް މުދާ އުފުލުމުގެ އިންތިޒާމު ހަމަޖެހި، ހުޅުމާލެއިން އިންބައުންޑް ކާގޯ ދޫކުރުމާއި، އެއަރޕޯޓަށް ސީ-ޓު-އެއަރ ކާގޯގެ ހިދުމަތް ލިބޭނެ ފުރިހަމަ ޙައްލެއް ލިބިގެންދާނެ."
އިކޮނޮމިކް މިނިސްޓަރ މުހައްމަދު ސައީދު
ރާއްޖޭގެ އަމިއްލަ ވިޔަފާރިތަކުގެ ތެރެއިން އިމާރާތްކުރުމުގެ ދާއިރާގައި އެކަނިވެސް 11 ބިލިއަން ޑޮލަރުގެ އިންވެސްޓްމަންޓް ހިނގަމުންދާއިރު، މުދާ ފޯރުކޮށްދިނުމުގައި ދިމާވާ ދަތިތަކަށް މިހާރު އަމަލީ ހައްލުތަކެއް ހޯދެމުންދާކަން މިނިސްޓަރ ފާހަގަކުރެއްވިއެވެ. މި ބަދަލާއެކު، ކުރިން މުދާ ބާލައި ކްލިއަރކުރުމަށް ހޭދަވާ 7 ދުވަހުގެ މުއްދަތު ކުރުވެ، ހާއްސަކޮށް ކާބޯތަކެތީގެ ބާވަތްތައް އެންމެ ދުވަހެއްގެ ތެރޭގައި ބޯޓުން ބާލައި ވިޔަފާރިވެރިންނާ ހަމައަށް ފޯރުކޮށްދެވޭނެ އިންތިޒާމު ހަމަޖެހިގެންދާނެއެވެ.
2040 ވަނަ އަހަރަށް އަމާޒުހިފައިގެން ކުރިއަށްގެންދާ މި ބިޔަ މަޝްރޫއުގެ އެންމެ ބޮޑު މަންފާއެއް ކުރާނީ ވިޔަފާރިވެރިންނަށާއި އިންވެސްޓަރުންނަށް ކަމަށާއި، މިކަމުގެ ސަބަބުން މުޅި އިގްތިސާދީ ނިޒާމަށް ބޮޑު ލުޔެއް ލިބި، ރާއްޖޭގެ އުފެއްދުންތެރިކަމަށާއި ވިޔަފާރިތަކަށް އައު ދިރުމެއް ލިބިގެންދާނެ ކަމަށް މިނިސްޓަރ ސައީދު ވިދާޅުވިއެވެ.
