މާލޭގެ މައި ވިޔަފާރި ބަނދަރު ތިލަފުއްޓަށް ބަދަލުކުރުމުގެ ބޮޑު މަޝްރޫއު ކުރިއަށްދާ ގޮތް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ބައްލަވާލައްވައިފިއެވެ. މަސައްކަތްތައް ބައްލަވާލެއްވުމަށްފަހު ރައީސް ވިދާޅުވީ، މި މަޝްރޫއުގެ ސަބަބުން ރާއްޖޭގެ މުޅި އިގްތިސާދަށް އިންގިލާބީ ބޮޑު ކުރިއެރުމެއް ލިބިގެންދާނެ ކަމަށެވެ. އަދި މިހާތަނަށް ކުރެވިފައިވާ މަސައްކަތްތަކާއި މަޝްރޫއު ރޭވިފައިވާ ފުރިހަމަ ގޮތާމެދު އެމަނިކުފާނު ވަނީ ނުހަނު ބޮޑަށް ހިތްޕުޅުހަމަޖެހުން ފާޅުކުރައްވާފައެވެ.
މި މަޝްރޫއާ ގުޅޭގޮތުން މީޑިއާތަކަށް މައުލޫމާތު ދެއްވަމުން ރައީސް ވިދާޅުވީ، މިހާރު ބޭނުންކުރަމުންދާ ވިޔަފާރި ބަނދަރަކީ ހަލުވި ދުވެލީގައި ކުރިއަރަމުން އަންނަ ރާއްޖޭގެ އިޤްތިޞާދަށް އެކަށޭނަ ތަނެއް ނޫން ކަމަށެވެ.
"ހާއްސަކޮށް މިހާ ކުރު މުއްދަތެއްގެ ތެރޭގައި ތަރައްގީގެ ބޮޑެތި މަޝްރޫއުތަކެއް ރާއްޖެއަށް އަންނައިރު، އެކަމަށް މަގުފަހިކުރުމަށް މިއީ ނުހަނު މުހިންމު މަޝްރޫޢެއް. އެހެންކަމުން ބަނދަރުގެ ޖާގަ ބޮޑުކޮށް، ޒަމާނީ ފެންވަރަށް މި ބަނދަރު ތަރައްގީކުރެވެނީ،"
ރައީސުލްޖުމްހޫރިއްޔާ ޑރ. މުހައްމަދު މުއިއްޒު.
ސަރުކާރުން ހާމަކުރައްވާފައިވާ ގޮތުގައި، މިހާރު ކުރިއަށްދަނީ ޕޯޓުގެ ޑޮމެސްޓިކް ކީވޯލް ނުވަތަ އެތެރޭގެ އުޅަނދުފަހަރަށް ޚާއްޞަ މަގަތު ފާލަމުގެ މަސައްކަތެވެ. މި މަސައްކަތް މުޅިން ނިންމައި، މި ހިނގާ މަހުގެ ފަހުކޮޅު އެ ފާލަމުން ހިދުމަތް ދޭން ފެށޭނެއެވެ. މީގެއިތުރުން، ބަނދަރުގެ ބައެއް މަސައްކަތްތައް މާލޭ އިންޑަސްޓްރިއަލް ޒޯނަށް ބަދަލުކުރުމަށް ހަމަޖެހިފައިވާއިރު، އަންނަ އަހަރުގެ ނޮވެމްބަރު 11 ގެ ނިޔަލަށް ޕޯޓުގެ އެންމެހައި ހިދުމަތްތައް އެއްކޮށް ތިލަފުއްޓަށް ބަދަލުކުރުމަކީ ސަރުކާރުގެ މައިގަނޑު އަމާޒެވެ.
Advertisement
އައު ބަނދަރާއެކު ޕޯޓުގެ ޚިދުމަތްތަކުގެ ފެންވަރާއި ޖާގަ ހަތަރު ގުނައަށް ފުޅާވެގެންދާނެކަން ފާހަގަކުރައްވަމުން ރައީސް ވިދާޅުވީ، މިއީ އިގްތިސާދު އިތުރަށް ފުޅާކުރުމަށް ހުޅުވިގެންދާ މުހިންމު ދޮރެއް ކަމަށެވެ.
"މިއީ ރާއްޖޭގެ އުފެއްދުންތެރިކަމާއި ވިޔަފާރިތައް އައު އުސްމިންތަކަކަށް ގެންދިއުމަށް އެންމެ މުހިންމު މަޝްރޫޢު. ކަމާގުޅޭ ވުޒާރާތަކާއި، ކުންފުނިތައް އަދި ބޭރުގެ ފަރާތްތައް ގުޅިގެން މިހާތަނަށް މަސައްކަތް ގެންގޮސްފައިވާ ހިސާބާމެދު ވަރަށް ބޮޑަށް ހިތްހަމަޖެހޭ. އެހެންކަމުން އެ ހުރިހާ ފަރާތްތަކަށް ޝުކުރު އަދާކުރަން،"
ރައީސުލްޖުމްހޫރިއްޔާ ޑރ. މުހައްމަދު މުއިއްޒު.
މި މަޝްރޫއުގެ މަސައްކަތްތައް ބައްލަވާލެއްވުމަށް ރައީސުލްޖުމްހޫރިއްޔާ ކުރެއްވި މި ޒިޔާރަތުގައި އިކޮނޮމިކް މިނިސްޓަރ މުހައްމަދު ސައީދުގެ އިތުރުން ވަޒީރުންގެ މަޖިލީހުގެ ބައެއް މެންބަރުންނާއި، އެމްޕީއެލްގެ ސީއީއޯ ހުސައިން ޝަފީގް ބައިވެރިވެވަޑައިގެންނެވިއެވެ. މީގެއިތުރުން، އިންޓަރނޭޝަނަލް ކީވޯލްގެ މަސައްކަތް ކުރިއަށްގެންދާ ޗައިނާ ކުންފުނީގެ އިސް މަންދޫބުންވެސް މި ބައްލަވާލެއްވުމުގައި ބައިވެރިވެވަޑައިގެންނެވިއެވެ.
