މޯލްޑިވްސް ޒަކާތު ހައުސްއިން ވިދިވިދިގެން ތިންވަނަ އަހަރަށް އިންތިޒާމުކުރާ "އިންޓަރނޭޝަނަލް ޒަކާތު ކޮންފަރެންސް މޯލްޑިވްސް (އިންޒެކް) 2026″ ގައި ބައިވެރިވުމުގެ ފުރުސަތު އާންމުކޮށް ހުޅުވާލައިފިއެވެ.
މިއަހަރުގެ އޮކްޓޫބަރު މަހުގެ 28 ވަނަ ދުވަހު ބޭއްވުމަށް ހަމަޖެހިފައިވާ މި ކޮންފަރެންސަކީ، މާލީ އަދި އިޖުތިމާއީ ގޮތުން ދިމާވާ ގޮންޖެހުންތަކުން އަރައިގަނެ، ވިލުންވެރި މުޖުތަމައެއް ބިނާކުރުމުގައި ޒަކާތުގެ މުހިންމު ދައުރާ ގުޅޭގޮތުން ފުޅާ ދާއިރާއެއްގައި މަޝްވަރާކުރުމަށް ބާއްވާ ބައިނަލްއަގުވާމީ މުހިންމު ބައްދަލުވުމެކެވެ. މިއަހަރުގެ ކޮންފަރެންސްގެ ޝިއާރަކީ "ރެޒިލިއަންޓް ފައުންޑޭޝަންސް: ޑިސައިފަރިންގ ވަލްނަރަބިލިޓީ، އިކޮނޮމިކް އިމްޕެކްޓް، އެންޑް ކޮލާބޮރޭޓިވް ސޭފްޓީ ނެޓްސް އިން މޮޑަން ސޮސައިޓީޒް" އެވެ.
މި ކޮންފަރެންސްގެ ތެރެއިން އިލްމުވެރިންނާއި، އިގްތިސާދީ މާހިރުންނާއި، ޒަކާތުގެ ދާއިރާގައި ހަރަކާތްތެރިވާ ފަރާތްތަކުގެ އިތުރުން ސިޔާސަތު އެކަށައަޅާ ފަރާތްތަކާއި، މާލީ އިދާރާތަކާއި މަދަނީ ޖަމްއިއްޔާތަކުގެ މަންދޫބުން އެއްތަނަކުން ބައްދަލުވެ، ޚިޔާލު ބަދަލުކުރުމުގެ ފުރުސަތު ފަހިވެގެންދާނެއެވެ.
Advertisement
މި ބައްދަލުވުމުގައި ހިމެނޭ މުހިންމު ހަރަކާތްތަކުގެ ތެރޭގައި ޚާއްސަ ކީނޯޓް އެޑްރެސްތަކާއި، ކަމާބެހޭ މާހިރުންގެ ޕެނަލް ޑިސްކަޝަންތައް ހިމެނެއެވެ. މީގެއިތުރުން، ގޭބިސީތަކުގެ ނާޒުކު ހާލަތްތަކަށް އަންނަ ބަދަލުތަކާއި، މާލީ ދަތިތަކުގެ ސަބަބުން ކުރާ އިގްތިސާދީ އަސަރުތަކާ ގުޅޭގޮތުން އިލްމީ ދިރާސާތަކުގެ މައްޗަށް ބިނާކޮށް މަޝްވަރާތައް ކުރިއަށްދާނެއެވެ. އަދި ނާޒުކު ހާލަތްތަކުގައިވާ އާއިލާތަކަކީ އަމިއްލަ ފައިމައްޗަށް ތެދުވެ، މާލީ މިނިވަންކަން ލިބިފައިވާ ބަޔަކަށް ހެދުމަށްޓަކައި ބައިނަލްއަގުވާމީ ފެންވަރުގައި ބޭނުންކުރާ ކާމިޔާބު މޮޑެލްތަކާއި، ގުޅިފައިވާ ރައްކާތެރިކަމުގެ ނިޒާމުތައް ގާއިމުކުރުމާ ބެހޭގޮތުންވެސް ފުޅާދާއިރާއެއްގައި އަލިއަޅުވާލުމަށް ވަނީ ހަމަޖެހިފައެވެ.
އިންޒެކް 2026 ގައި ބައިވެރިވުމަށް ޝައުގުވެރިވާ ފަރާތްތަކަށް، ރަސްމީ ރަޖިސްޓްރޭޝަން ލިންކު https://forms.gle/BnrtbMVErg1GVyZaA މެދުވެރިކޮށް އޮންލައިންކޮށް ރަޖިސްޓަރީވުމުގެ ފުރުސަތު މިހާރު ވަނީ ހުޅުވާލެވިފައެވެ.
