މޯލްޑިވްސް ޒަކާތު ހައުސްއިން މިއަހަރު ބޭއްވުމަށް ހަމަޖެހިފައިވާ އިންޓަނޭޝަނަލް ޒަކާތު ކޮންފަރެންސް (އިންޒެކް 2026)ގެ ފުރަތަމަ ސެޝަންގެ ޕެނަލިސްޓުން އިއުލާނުކޮށްފިއެވެ. "ނާޒުކު ހާލަތަށް ވާސިލުކޮށްދޭ ކަންކަމުގެ ސިލްސިލާ ދެނެގަތުން: މާލީ ދަތިތަކުން އިޖުތިމާއީ އެކަހެރިކަމަށް ވާސިލުވާ ގޮތް ދިރާސާކުރުން" މި ނަމުގައި ކުރިއަށްގެންދާ މި ސެޝަން ބޭއްވުމަށް ހަމަޖެހިފައިވަނީ 28 އޮކްޓޫބަރު 2026 ވާ ދުވަހު އިސްލާމީ މަރުކަޒުގައެވެ.
މި ސެޝަންގައި، ކުއްލި ގޮތަކަށް ދިމާވާ ސިއްހީ ހާލަތްތަކާއި ދަރަނީގެ ދަންތުރަ ފަދަ ކަންކަމުގެ ސަބަބުން މެދުފަންތީގެ އާއިލާތައް ފަގީރުކަމުގެ ތެރެއަށް ގެނބިގެންދާ ސަބަބުތަކާ މެދު އިޖުތިމާއީ އަދި އިގުތިސާދީ މާހިރުން މަޝްވަރާކުރާނެކަމުގައި މޯލްޑިވްސް ޒަކާތު ހައުސިން ހާމަކުރިއެވެ. މި ޕެނަލްގައި އެންސްޕާގެ ޑިރެކްޓަރ ޖެނެރަލް ސުނީތާ އަބްދުﷲ އާއި، އެޗްޑީސީގެ އެކްޓިންގ ސީސީއޯ އަހްމަދު އަސްލަމް އަދި އެމްއެމްއޭގެ ފައިނޭންޝަލް އިންކްލޫޝަން ސެކްޝަންގެ ޑެޕިއުޓީ މެނޭޖަރ ތާއިފް އަހްމަދު ރުޝްދީ ހިމެނިވަޑައިގަންނަވާއިރު، މޮޑެރޭޓްކުރައްވާނީ ޒަކާތު އާމިލް މަރިޔަމް މާޝާ މުސްތަފާއެވެ.
އެކި ދާއިރާތަކުގެ ތަފާތު ތަސައްވުރުތައް އެއްތަންކޮށްދޭ މި ސެޝަންގައި މައިގަނޑު ގޮތެއްގައި އަލިއަޅުވާލާނީ މާލީ ދަތިކަމާއި އިޖުތިމާއީ ނާޒުކުކަމާ ދެމެދު އޮތް ގުޅުމުގެ މައްޗަށެވެ. މީގެއިތުރުން، މާލީ ދަތިތައް ތަހައްމަލުކުރަމުންދާ ފަރުދުންނާއި އާއިލާތަކަށް ކުރިމަތިވާ ގޮންޖެހުންތައް ދެނެގަތުމުގެ މުހިންމުކަން މި ސެޝަންގެ ޒަރީއާއިން ހާމަކޮށްދިނުމަށް ނިންމާފަވާކަމަށް ޒަކާތު ހައުސިން ހާމަކުރިއެވެ.
Advertisement
އިންޒެކް 2026ގެ ތެރެއިން ތަފާތު ތިން މައުލޫއަކަށް ސެޝަންތައް ކުރިއަށްދާއިރު، ކޮންމެ ސެޝަނެއްގައިވެސް ކީނޯޓް އެޑްރެހަކަށް ފަހު ޕެނަލް ޑިސްކަޝަނެއް އޮންނާނެއެވެ. މި ކޮންފަރެންސްގެ މަގުސަދަކީ ޒަކާތާއި އިސްލާމީ އިޖުތިމާއީ މާލިއްޔަތާ ގުޅުންހުރި މިޒަމާނުގެ ގޮންޖެހުންތަކާ މެދު މަޝްވަރާކޮށް އިލްމު ބަދަލުކުރުމަށް ބާރުއެޅުމެވެ.
މީގެ ތެރޭގައި ނާޒުކު ހާލަތްތަކަށް ހައްލު ހޯދުމާއި އިޖުތިމާއީ އަދި އިގްތިސާދީ ވިލުންތެރިކަން ވަރުގަދަކުރުމަށް އެޅިދާނެ ފިޔަވަޅުތައް ހިމެނެއެވެ. އިނާމުތަކާއި ސެޝަންތަކުގެ އިތުރު މައުލޫމާތުތައް ހާމަކުރަމުންދާއިރު، ދެން ހުރި ސެޝަންތަކުގެ ޕެނަލިސްޓުންވެސް ކުރިއަށް އޮތް ދުވަސްތަކުގައި ޒަކާތު ހައުސްއިން އިއުލާނުކުރުމަށް ހަމަޖެހިފަވެއެވެ.
