އަހްލާގް ރަނގަޅު ހަރުދަނާ ޒުވާން ޖީލެއް ބިނާކުރެއްވުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ފެއްޓެވި ދިވެހި ވަތަނީ ހިދުމަތުގެ ޕްރޮގްރާމަށް 1 އަހަރު ފުރިފައިވާއިރު 1000 ވުރެ ގިނަ ޒުވާނުން ތަމްރީނުކޮށްފަވާކަމުގައި ދިފާއީ އަދި ވަތަނީ ހިދުމަތާ ބެހޭ ވުޒާރާއިން ބުނެފިއެވެ. މި މަޝްރޫއުގެ ދަށުން ގިނަ ކަންތައްތަކެއް އިޢުލާނުކޮށް، އަމަލީ ގޮތުން ހާސިލުކޮށްފައިވެއެވެ. މި ޕްރޮގްރާމުގެ މައިގަނޑު މަގްސަދަކީ ދިވެހި ޒުވާނުންގެ މެދުގައި ގައުމިއްޔަތުގެ ރޫހާއި ފަހުރު ދިރުވައި، އިސްލާމްދީނަށް ލޯބިކުރާ އަދި ގައުމީ ކާރިސާތަކުގައި ސާބިތުކަމާއެކު ކުރިމަތިލާނެ ޒިންމާދާރު، އަހުލާގު ރަނގަޅު އުފެއްދުންތެރި ރައްޔިތެއް ބިނާކުރުމެވެ.
ސަރުކާރުން އިސްނަގައިގެން ކުރިއަށްގެންދިޔަ ކަންތައްތަކަށް ބަލާއިރު، އެމްއެންޑީއެފް ކޮމްޕޮސިޓް ޓްރޭނިންގ ސެންޓަރ، ޅ. މާފިލާފުށީގައި "ނޭޝަނަލް ސަރވިސް އިނީޝަލް ޓްރޭނިންގ" (އެންއެސްއައިޓީ) އަދި "ނޭޝަނަލް ސަރވިސް ސްކިލް ޓްރޭނިންގ" (އެންއެސްއެސްޓީ) ތަމްރީނުތައް ވަނީ ކާމިޔާބުކަމާއެކު ހިންގާފައެވެ. މިގޮތުން އެންއެސްއައިޓީގެ 3 ބެޗަކުން ޖުމުލަ 1,028 ދަރިވަރުން (842 ފިރިހެން އަދި 186 އަންހެން) ދަސްވެނިވެފައިވެއެވެ. އަދި އެންއެސްއެސްޓީގެ 1 ޕްރޮގްރާމް ނިންމައި 63 ދަރިވަރުން (48 ފިރިހެން އަދި 15 އަންހެން) ތަމްރީނު ފުރިހަމަކުރިއެވެ.
މީގެއިތުރުން، މިހާރުވެސް އަމަލީ ގޮތުން ކުރިއަށްދާ ތަމްރީނުތަކުގެ ތެރޭގައި 03 ޖޫން 2026 ގައި ފެށި އެންއެސްއެސްޓީގެ 2ވަނަ ބެޗް ހިމެނެއެވެ. މި ތަމްރީނުގައި މިވަގުތު 73 ދަރިވަރުން (60 ފިރިހެން އަދި 13 އަންހެން) ބައިވެރިވެފަވެއެވެ. މިހާތަނަށް ތަމްރީނު ފުރިހަމަކުރި ދަރިވަރުންނަކީ ރާއްޖޭގެ އެކި އަތޮޅުތަކަށް ނިސްބަތްވާ ޒުވާނުންކަމަށައި، އެންމެ ގިނަ ދަރިވަރުން ދަސްވެނިވެފައިވަނީ ކ. އަތޮޅުން (155 ދަރިވަރުން) އަދި ހދ. އަތޮޅުން (95 ދަރިވަރުން) ކަމުގައި ދިފާއީ އަދި ވަތަނީ ހިދުމަތާ ބެހޭ ވުޒާރާއިން ހާމްކުރިއެވެ.
Advertisement
ކުރިއަށް އޮތް ތަނުގައި ކުރުމަށް ރޭވިފައިވާ ކަންކަމުގެ ތެރޭގައި 2026 ވަނަ އަހަރުގެ އޮކްޓޫބަރު މަހު އިތުރު ދެ ތަމްރީނު ޕްރޮގްރާމެއް ފެށުން ހިމެނެއެވެ. އެގޮތުން 12 އޮކްޓޫބަރު 2026 ގައި އެންއެސްއެސްޓީގެ 3 ވަނަ ބެޗުގެ ތަމްރީނު ފެށުމަށް ހަމަޖެހިފައިވާއިރު، އެ ތަމްރީނުގައި 84 ދަރިވަރުން (64 ފިރިހެން އަދި 20 އަންހެން) ބައިވެރިވާނެއެވެ. އަދި 13 އޮކްޓޫބަރު 2026 ގައި އެންއެސްއައިޓީގެ 4 ވަަ ބެޗު ފެށުމަށް ރޭވިފައިވާއިރު، އެ ބެޗުގައި 352 ދަރިވަރުން (288 ފިރިހެން އަދި 64 އަންހެން) ތަމްރީނުވާނެއެވެ.
ޖުމުލަގޮތެއްގައި ދިވެހި ވަތަނީ ހިދުމަތުގެ ޕްރޮގްރާމުން ދަނީ ރާއްޖޭގެ ޒުވާނުންނަށް ބޭނުންވާ މުހިންމު ދިރިއުޅުމުގެ ހުނަރުތަކާއި ގައުމީ ރޫހު އުނގަންނައިދެމުންނެވެ. ސަރުކާރުން ރޭވި ގޮތަށް ތަމްރީނުތައް ކުރިއަށްގެންގޮސް، ސަތޭކައިން ގުނާލެވޭނެ ގިނަ ޒުވާނުންތަކެއް ވަނީ ސުލޫކީ އަދި މަސައްކަތުގެ މައިދާނަށް ތައްޔާރުކުރެވިފައެވެ. ކުރިއަށް ހުރި ތަމްރީނުތަކާއެކު މި މަޝްރޫއު އިތުރަށް ފުޅާވެ، މުޅި ރާއްޖެއަށް އޭގެ ފައިދާ ކުރާނެ ކަމުގައި އެ ވުޒާރާއިން ބުންޏެވެ.
