ފަލަސްތީނުގެ މިނިވަން ދައުލަތެއް ގާއިމުކުރުމަށް އެ ގައުމުގެ ރައްޔިތުން ކުރަމުންދާ މަސައްކަތްތަކަށް ދިވެހިރާއްޖެއިން އަބަދުވެސް ފުރިހަމައަށް ތާއީދުކުރާނެ ކަމުގެ ޔަގީންކަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވައިފިއެވެ.
ރައީސް މިކަން ހާމަކުރެއްވީ ފަލަސްތީނުގެ މިނިވަންކަން އިއުލާނުކުރިތާ 38 އަހަރު ފުރުމުގެ މުނާސަބަތުގައި، އެކްސްގައި ހިއްސާކުރެއްވި މެސެޖެއްގައެވެ.
ރައީސުލްޖުމްހޫރިއްޔާގެ މެސެޖުގައި، ފަލަސްތީނުގެ މިނިވަން ދުވަހުގެ ހެޔޮއެދުންތައް އެ ގައުމުގެ ރައީސް މަހްމޫދު އައްބާސް އަށާއި، ބޮޑުވަޒީރު އަދި ހާރިޖީ ވަޒީރު މުހައްމަދު މުސްތަފާގެ އިތުރުން އަހުވަންތަ ފަލަސްތީނުގެ އެންމެހައި ރައްޔިތުންނަށް ވަނީ ފޮނުއްވާފައެވެ.
Advertisement
މި ތާރީހީ މުނާސަބަތުގައި ރައީސް ވިދާޅުވީ، 1967 ވަނަ އަހަރުގެ ކުރިން އޮތް ބޯޑަރުތަކުގެ މައްޗަށް ބިނާކޮށް، އިރުމަތީ ގުދުސްއަކީ ވެރިރަށެއްގެ ގޮތުގައި ކަނޑައެޅިގެން އުފެދޭ މިނިވަން، މުސްތަގިއްލު ފަލަސްތީނުގެ ދައުލަތެއް ގާއިމުކުރުމަށް އެންމެން ދެކޭ ހުވަފެން ހަގީގަތަކަށް ހެދުމަށް ރާއްޖެއިން ސާބިތުކަމާއެކު ދެމިއޮންނާނެ ކަމަށެވެ. އަދި މިކަމުގައި ދިވެހިރާއްޖޭގެ އެއްބާރުލުމާއި ޝަރުތަކާ ނުލައި ދޭ ތާއީދު އަބަދުވެސް ލިބެމުންދާނެ ކަމަށް ރައީސް ވިދާޅުވިއެވެ.
ރައީސްގެ މެސެޖު ނިންމަވާލައްވާފައިވަނީ "ކޯރުން ފެށިގެން ކަނޑާ ހަމައަށް، ފަލަސްތީނު މިނިވަންވާނެ" ކަމަށް ވިދާޅުވެ، ފަލަސްތީނުގެ ހައްގުގައި އަޑުއުފުލަމުންދާ މަޝްހޫރު ޝިއާރުންނެވެ.
ދިވެހިރާއްޖެއަކީ އަބަދުވެސް ބައިނަލްއަގުވާމީ މައިދާނުގައި ފަލަސްތީނުގެ ހައްގުތައް ހިމާޔަތްކުރުމަށާއި، އިސްރާއީލުން ހިންގަމުންދާ ލާއިންސާނީ އުދުވާންތަކާ ދެކޮޅަށް ވަރުގަދައަށް ވަކާލާތުކުރަމުން އަންނަ ގައުމެކެވެ.
