ޕގައުމީ އެއަރލައިން، މޯލްޑިވިއަންގެ ސީޕްލޭން ހިދުމަތްތައް އިތުރަށް ތަރައްގީކޮށް ފުޅާކުރުމުގެ ގޮތުން، ވެލާނާ އިންޓަރނޭޝަނަލް އެއަރޕޯޓުގައި ޒަމާނީ ފެންވަރަށް ތަރައްގީކުރި އައު ސީޕްލޭން ޓަރމިނަލް ރަސްމީކޮށް ހުޅުވައިފިއެވެ. މި ޓަރމިނަލް ރަސްމީކޮށް ހުޅުއްވައިދެއްވީ އަންގާރަ ދުވަހުގެ ހަވީރު ބޭއްވި ހާއްސަ ރަސްމިއްޔާތެއްގައި މިނިސްޓަރ އޮފް ޓޫރިޒަމް އެންޑް ސިވިލް އެވިއޭޝަން މުހައްމަދު އަމީންއެވެ.
ފަސިންޖަރުންނަށް ދަތުރުފަތުރުގެ ކަންކަމުގައި ލުއިފަސޭހަތަކެއް ހޯދައިދީ، ދަތުރުގެ ފެށުން މާބޮޑަށްވެސް ފުރިހަމަކޮށްދިނުމުގެ މަގުސަދުގައި ގެނެވުނު މި ބަދަލުތަކުގެ ތެރެއިން އެންމެ ފާހަގަކޮށްލެވޭ އެއް ކަމަކީ ހުވަނދުމާ ލައުންޖްގެ ޖާގަ ބޮޑުކުރުމެވެ. އެގޮތުން ކުރިން 1،661 އަކަފޫޓުގެ ބޮޑުމިނެއްގައި އޮތް މި ލައުންޖް މިހާރު ވަނީ 3،606 އަކަފޫޓަށް ބޮޑުކޮށްފައެވެ. އަދި ޓަރމިނަލްގެ ބޭރުގެ ސަރަހައްދުވެސް ކުރީގެ 120 އަކަފޫޓުން 5،360 އަކަފޫޓަށް ވަނީ ފުޅާކޮށްފައެވެ.
މި ޒަމާނީ ފެސިލިޓީގައި އަލަށް ގާއިމުކުރި ތަންތަނުގެ ތެރޭގައި އައު އެންޓްރެންސްއަކާއި ކުޑަކުދިން ކުޅޭ ކޯނަރެއްގެ އިތުރުން، ވީއައިޕީ ފަސިންޖަރުންނަށް ސީދާ ލައުންޖުން ސީޕްލޭނަށް އެރުމުގެ އިންތިޒާމު ހަމަޖެހިގެންދާ އިތުރު ވީއައިޕީ ބޯޑިންގ ގޭޓެއް ހިމެނެއެވެ. މީގެ އިތުރުން، ޓަރމިނަލްގެ މަތީ ފަންގިފިލާގައި ދެ ޕްރައިވެޓް ލައުންޖް ގާއިމުކޮށްފައިވާއިރު، އެއްފަހަރާ އެތެރޭގައި 90 މީހުންނަށް އަދި ބޭރުގައި 40 މީހުންނަށް ތިބެވޭނެ ޖާގަ ވަނީ ތައްޔާރުކޮށްފައެވެ.
Advertisement
ހަމައެއާއެކު، މޯލްޑިވިއަންގެ ބްރޭންޑްގެ ހަނދާނީ ފަތްފޮތާއި ކާބޯތަކެތި ވިއްކާ ބޫތަކާއި، މުވައްޒަފުންނަށް ހާއްސަ ކެންޓީނެއްވެސް ވަނީ ގާއިމުކޮށްފައެވެ. އަދި ތިމާވެއްޓާ ރައްޓެހި ލުއިގޮތްތަކަށް ވިސްނައި، ކަނޑަށް ކުނި އެޅުން ހުއްޓުވުމުގެ ގޮތުން ޕްލާސްޓިކް ފުޅި ރީސައިކަލްކުރާ ނިޒާމެއްވެސް ވަނީ ގާއިމުކޮށްފައެވެ.
އައިލެންޑް އޭވިއޭޝަނުން ހާމަކުރިގޮތުގައި މިހާތަނަށް 1.2 މިލިއަނަށްވުރެ ގިނަ ފަސިންޖަރުން މި ސީޕްލޭން ޓަރމިނަލް މެދުވެރިކޮށް ދަތުރުކޮށްފައިވެއެވެ. މި ޒަމާނީ ޓަރމިނަލަކީ ރާއްޖޭގެ ޓޫރިޒަމް ސިނާއަތް ކުރިއެރުވުމަށް އެއަރލައިނުން ކުރަމުންދާ މަސައްކަތްތަކަށް ލިބުނު އިތުރު ކުރިއެރުމެކެވެ.
