މަސްތުވާތަކެތި ބޭނުންކުރުން ހުއްޓުވުމަށާއި ޑްރަގް ނެޓްވޯކްތައް އަތުލައިގަތުމަށް ސަރުކާރުން ބޮޑެތި ކާމިޔާބީތަކެއް ހޯދައިފި

ރާއްޖޭގައި މަސްތުވާތަކެތީގެ ވިޔަފާރިކުރާ 24 ޑްރަގް ނެޓްވޯކެއްގެ މައްސަލަ ބަލަމުންދާކަމަށާއި، މަސްތުވާތަކެތި ބޭނުންކުރާ ފަރާތްތަކަށް ފަރުވާދިނުމާއި ސަޕްލައި ހުއްޓުވުމަކީ ސަރުކާރުގެ މައިގަނޑު އަމާޒުކަން ދާހިލީ ސަލާމަތާއި މަސައްކަތްތެރިކަމާއި ފަންނިއްޔާތާބެހޭ ވަޒީރު އަލީ އިހުސާން ހާމަކުރައްވައިފިއެވެ. "އަހާ" ފޯރަމްގައި ވާހަކަފުޅުދައްކަވަމުން ވަޒީރު ވިދާޅުވީ، މިދިޔަ ދެ އަހަރާ ބައިގެ ތެރޭގައި 1.5 ބިލިއަން ދިވެހި ރުފިޔާގެ އަގުހުރި 1.3 ޓަނުގެ މަސްތުވާތަކެތި އަތުލައިގަނެވިފައިވާ ކަމަށެވެ. މިއީ ކުރީގެ ސަރުކާރުތަކުގެ ފުރަތަމަ 3 އަހަރާ އަޅާބަލާއިރު ރެކޯޑް އަދަދެކެވެ. މީގެއިތުރުން ޑްރަގް ވިޔަފާރިއާ ގުޅުންހުރި 3.6 މިލިއަން ރުފިޔާއާއި 48,000 ޑޮލަރުގެ ކޭޝްގެ އިތުރުން އެތައް ހާސް ޑޮލަރަކާއި ރުފިޔާއެއްގެ މުދާ ސަރުކާރުގެ ބެލުމުގެ ދަށަށް ވަނީ ގެނެސްފައެވެ.

ޑްރަގް ކެފޭތައް ހުއްޓުވުމަށް އެއް ތަނަކަށް 150 އަށްވުރެ ގިނަ ފަހަރު ރެއިޑްކޮށް، ގާނޫނަށް އިސްލާޙުތައް ގެނެސްގެން އެފަދަ ތަންތަން ބަންދުކުރުމުގެ މަސައްކަތް ސަރުކާރުން ދަނީ ކުރަމުންނެވެ. އެގޮތުން ފާއިތުވި 3-4 މަހުގެ ތެރޭގައި މާލޭގެ 12 ތަނަކާއި، އައްޑޫގެ 4 ތަނެއްގެ އިތުރުން ފުވައްމުލަކުގެ ތަނަކާއެކު ޖުމްލަ 17 ޑްރަގް ކެފޭއެއް ވަނީ ބަންދުކޮށްފައެވެ. ސަރުކާރުގެ ބޮޑު އަމާޒަކީ ކުރިއަށްއޮތް ނޮވެމްބަރު މަހާ ހަމައަށް މާލޭގައި އިތުރަށް ހުރި މިފަދަ ތަންތަން އެކީ ބަންދުކޮށް ނިންމާލުމެވެ.

ގޭންގް ހަރަކާތްތަކާއި ގްރޫޕް ހަދައިގެން ކުށްކުރުން ހުއްޓުވުމަށްޓަކައި ހާއްސަ ފިޔަވަޅުތަކެއް އަޅައި، ކުށުގެ މާހައުލު ފާހަގަކުރެވޭ ސަރަހައްދުތަކުގައި ފުލުހުންގެ ހުޅުވުންތައް އިތުރުކޮށް، ކުށްވެރިން އަނބުރާ މުޖުތަމައަށް ނެރުމަށް މަސައްކަތްތަކެއް ވަނީ ކުރެވިފައެވެ. ގޭންގްތަކަށް އަމާޒުކޮށްގެން ސަރުކާރުން ހިންގި 52 އޮޕަރޭޝަނެއްގެ ތެރެއިން 10,450 މީހުން ޗެކްކޮށް، 517 މީހަކު ފުލުހުންގެ ބެލުމުގެ ދަށަށް ވަނީ ގެންގޮސްފައެވެ. އަދި އެ މީހުންނާ ގުޅުންހުރި 770 ސައިކަލުވެސް ވަނީ ފުލުހުންގެ ބެލުމުގެ ދަށަށް ނަގާފައެވެ.

ސަރުކާރުން ދަނީ މަސްތުވާތަކެތީގެ ވަބާއިން މުޅި މުޖުތަމައު ސަލާމަތްކޮށް، ރައްޔިތުންނަށް ރައްކާތެރި މާހައުލެއް ކަށަވަރުކޮށްދިނުމަށްޓަކައި ފިޔަވަޅުތައް އިތުރަށް ވަރުގަދަކުރަމުންނެވެ.