"ބޯހިޔާވަހިކަން އެންމެންނަށް" ސިޔާސަތުގެ ދަށުން ހުށަހަޅާފައިވާ އެޕްލިކޭޝަންތައް ވެރިފައިކުރުމުގެ މަރުހަލާގައި ފޮނުވާ ނޯޓިސްތަކަށް ޖަވާބުދާރީވުމަށް ދީފައިވާ މުއްދަތު، ގެދޮރުވެރިކަމާއި ބިނާރާ ބެހޭ ވުޒާރާއިން އިތުރުކޮށްދީފިއެވެ.
ސަރުކާރުގެ މި ބޯހިޔާވަހިކަމުގެ މަޝްރޫޢަށް ޖުމްލަ 58،585 ފޯމު ހުށަހަޅާފައިވާއިރު، މިހާރު ކުރިއަށްދަނީ އެ ފޯމުތަކުގެ ސައްހަކަން ކަށަވަރުކުރުމުގެ މަސައްކަތެވެ. މިގޮތުން، އެޕްލިކޭޝަންތަކާ ގުޅޭ މައުލޫމާތު ކަށަވަރުކުރުމަށްޓަކައި، ރާއްޖޭގެ ހުރިހާ ރަށު އަދި ސިޓީ ކައުންސިލްތަކާއި ކަމާބެހޭ އެހެނިހެން އިދާރާތަކުގައި ހުރި ގޯތިގެދޮރުގެ ރަޖިސްޓްރީ މައުލޫމާތުތައް މިހާރު ވަނީ އެއްކުރެވިފައެވެ.
މުޅިން އޮޓޮމޭޓެޑް ޕްލެޓްފޯމެއް މެދުވެރިކޮށް މި މައުލޫމާތުތައް ޗެކްކުރުމަށްފަހު، ރަޖިސްޓްރީއާ ގުޅިގެން އެއްވެސް ފުށުއެރުމެއް ހުރިނަމަ، އެކަން ހާމަކޮށް ޖަވާބުދާރީވުމުގެ ފުރުސަތު އަންނަނީ ދެމުންނެވެ. މިގޮތުން، މީގެ ކުރިން "ބޯހިޔާވަހިކަން ޕޯޓަލް" މެދުވެރިކޮށް މައުލޫމާތު ސާފުކުރުމަށް ދެމުންދިޔަ 7 ދުވަހުގެ މުއްދަތު، އާންމުންނަށް ލުއިފަސޭހަކޮށްދިނުމުގެ ގޮތުން މިހާރު ވަނީ 21 ދުވަހަށް އިތުރުކޮށްދީފައެވެ.
Advertisement
އެ ވުޒާރާއިން ވިދާޅުވީ، ދެވިފައިވާ 21 ދުވަހުގެ ތެރޭގައި "ބޯހިޔާވަހިކަން ޕޯޓަލް" މެދުވެރިކޮށް މައުލޫމާތު ސާފުކުރުމުގެ އިތުރުން، ފުށުއެރުންތައް އިސްލާހުކުރުމަށް ބޭނުންވާ ލިޔެކިޔުންތައް ހުށަހެޅުމުގެ ފުރުސަތު އޮންނާނެ ކަމަށެވެ. އަދި މި މަޝްރޫއުގެ ހުރިހާ މުއާމަލާތެއްވެސް ކުރިއަށްދާނީ ހަމައެކަނި މި ޕޯޓަލް މެދުވެރިކޮށް ކަމަށާއި، ދީފައިވާ މުއްދަތުގައި ޖަވާބުދާރީ ނުވެއްޖެނަމަ، މައުލޫމާތު އިސްލާހުކުރުމުގެ އިތުރު ފުރުސަތެއް ނުލިބޭނެ ކަމަށްވެސް އެ ވުޒާރާއިން ހަނދާންކޮށްދެއްވައެވެ.
ސަރުކާރުގެ އަމާޒަކީ އަންނަ ޑިސެންބަރު މަހުގެ ނިޔަލަށް ފޯމުތަކުގެ ވެރިފިކޭޝަން މަރުހަލާ އެއްކޮށް ނިންމައި، އެ މަހުގެ ތެރޭގައި ފްލެޓާއި ގޯތި ލިބޭ މީހުންގެ ދާއިމީ ލިސްޓު އާންމުކުރުމެވެ. މި މަސައްކަތް މިހާރު ދަނީ ބާރު ސްޕީޑެއްގައި ކުރިއަށެވެ.
