އުމުރުން ދުވަސްވީ ނުކުޅެދުންތެރިކަން ހުންނަ އަންހެނަކު ކުލި ބޮޑުކުރުމުގެ ބޭނުމުގައި ގެއިން ނެރުނު ހާދިސާއާ ގުޅިގެން އާންމުން މަގުތަކަށް ނުކުމެ އިހުތިޖާޖު ކުރުމުން، ސްޕެއިން ސަރުކާރުން ކުއްޔަށް އުޅޭ މީހުން ހިމާޔަތްކުރުމަށް ކުއްލި ޤާނޫނެއް ފާސްކޮށް ކުލިތައް ކޮންޓްރޯލް ކޮށްފިއެވެ.
ބޮޑުވަޒީރު ޕެޑްރޯ ސަންޗޭޒްގެ ސަރުކާރުން ނިންމާފައި ވަނީ މާލީ ގޮތުންނާއި އިޖުތިމާއީ ގޮތުން ނާޒުކު ހާލަތްތަކުގައި ތިބި އާއިލާތައް 2030 ވަނަ އަހަރުގެ ނިޔަލަށް އެމީހުން ކުއްޔަށް ތިބި ތަންތަނުން (ކުލި ބޮޑުކޮށް)، ނެރުން މަނާކުރުމަށެވެ. މިއީ ގެދޮރުގެ އަގުތައް އިންތިހާއަށް އުފުލި، އާދައިގެ ރައްޔިތުން މަގުމަތިވަމުންދާ މައްސަލައަށް ހައްލެއް ހޯދުމަށް އެޅި ފިޔަވަޅެކެވެ.
މި އައު ޤާނޫނުގެ ދަށުން ކުލި ކޮންޓްރޯލް ކުރުމަށްޓަކައި، 2028 ވަނަ އަހަރުގެ ނިޔަލަށް މުއްދަތު ހަމަވާ ހުރިހާ ކުލީގެ އެގްރީމެންޓްތަކެއް، ބަދަލަކާ ނުލައި އިތުރު ދެ އަހަރަށް އޮޓޮމެޓިކުން އާވާގޮތަށް ވަނީ ހަމަޖައްސާފައެވެ. މީގެ އިތުރުން، އަހަރަކު އެއްފަހަރު ކުލި ބޮޑުކުރެވޭނެ އެންމެ މަތީ މިންވަރަކީ 2 އިންސައްތައާއި 3 އިންސައްތައާ ދެމެދުގެ މިންވަރެއް ކަމަށް ހިފަހައްޓާފައިވާއިރު، ކުލި ބޮޑު ސަރަހައްދުތަކުގައި ކުރީގެ ކުއްޔަށްވުރެ އަގު މަތިކުރުން ވަނީ މަނާކޮށްފައެވެ. މި ފިޔަވަޅުތަކުގެ ސަބަބުން ކުއްޔަށްދޭ ފަރާތްތަކުން ކުއްލިއަކަށް ކުލި ބޮޑުކުރުމުގެ ފުރުސަތު ބަންދުވެގެންދާނެއެވެ.
Advertisement
ސްޕެއިން ސަރުކާރުގެ މި ނިންމުމާއެކު، ބޭރުގެ އިންވެސްޓްމަންޓް ފަންޑުތަކުން ސްޕެއިންގެ ގެދޮރުގެ މާކެޓް ކޮންޓްރޯލް ކުރަމުންދާ ދިއުމަށް ބޮޑެތި ހުރަސްތަކެއް ވަނީ ކުރިމަތިވެފައެވެ. ޚާއްޞަކޮށް ފަތުރުވެރިކަމަށް ކުރު މުއްދަތަށް ދޫކުރާ އެޕާޓްމަންޓްތަކުގެ ސަބަބުން އާދައިގެ ރައްޔިތުންނަށް ބޯހިޔާވަހިކަން ގެއްލޭތީ، އެފަދަ ތަންތަން ރެގިއުލޭޓް ކުރުމުގެ އުސޫލުތައް ވެސް ވަނީ ހަރުދަނާކޮށްފައެވެ. ސްޕެއިން ސަރުކާރުން ބުނެފައިވަނީ އިންވެސްޓަރުންގެ ފައިދާއަށްވުރެ ރައްޔިތުންނަށް ރައްކާތެރި ބޯހިޔާވަހިކަމެއް ކަށަވަރުކޮށްދިނުން މާ މުހިންމު ކަމަށެވެ.
