ބޯހިޔާވަހިކަމުގެ ކުލީގެ އަގުތައް އުފުލި، ދިރިއުޅުމުގެ ޚަރަދުތައް ބޮޑުވުމާ ގުޅިގެން ސްޕޭނުގައި ފެށި ގައުމީ ހަޅުތާލާއި މުޒާހަރާތަކުގައި މިލިއަނަކަށްވުރެ ގިނަ މީހުން ބައިވެރިވެއްޖެއެވެ. ފާއިތުވި 14 އަހަރުގެ ތެރޭގައި އެ ގައުމުގައި ބާއްވާ މިފަދަ އެންމެ ބޮޑު އިހުތިޖާޖު 24 ގަޑިއިރަށް ކުރިއަށްދާއިރު، މެޑްރިޑާއި ބާސެލޯނާ ފަދަ ބޮޑެތި ސިޓީތަކުގެ އާންމު ދަތުރުފަތުރާއި، ސްކޫލްތަކާއި، ކާރުޚާނާތަކުގެ އިތުރުން ގިނަ ވިޔަފާރިތަކެއް ވަނީ ހުއްޓިފައެވެ.
ސްޕޭނުގައި ފާއިތުވި ދިހަ އަހަރުގެ ތެރޭގައި ގެދޮރުގެ ކުލި 80 އިންސައްތައަށް އުފުލިފައިވާއިރު، ޓޫރިސްޓުންނަށް ކުރު މުއްދަތަށް ގެތައް ކުއްޔަށް ދިނުން އިތުރުވުމުގެ ސަބަބުން އާންމު ރައްޔިތުންނަށް ވަނީ ބޯހިޔާވަހިކަމުގެ ބޮޑު ދަތިކަމެއް ކުރިމަތިވެފައެވެ. މަސައްކަތްތެރިންގެ ޖަމިއްޔާތަކުން ބުނާ ގޮތުގައި، ޒުވާނުންނަށް ލިބޭ އާމްދަނީގެ 98 އިންސައްތަ ހަމައެކަނި ކުއްޔަށް ޚަރަދުކުރަން ޖެހޭ ހާލަތަށް ކަންކަން ގޮސްފައިވާއިރު، މި ހަޅުތާލު ފެށުމަށް މެދުވެރިވި އެއް ސަބަބަކީ ކުލި ނުދެއްކިގެން ގެއިން ނެރެލި އުމުރުން ދުވަސްވީ އަންހެނަކު ދާދިފަހުން މަރުވި ހާދިސާއެވެ.
މުޒާހަރާތައް ކުރިއަށްދިޔަ ވަގުތު މެޑްރިޑާއި ބާސެލޯނާގެ ބައެއް ސަރަހައްދުތަކުގައި މުޒާހަރާގެ ބައިވެރިންނާއި ފުލުހުންނާ ދެމެދު ވަނީ ކުރިމަތިލުންތައް ހިނގާފައެވެ. މަގުތައް ބަންދުކުރަން އުޅުނު ބައިވެރިން ހުއްޓުވުމަށް ފުލުހުން ބާރުގެ ބޭނުންކުރުމުގެ ސަބަބުން ބައެއް މީހުންނަށް އަނިޔާވެ، ގިނަ އަދަދެއްގެ ބަޔަކު ވަނީ ހައްޔަރުކޮށްފައެވެ. އަދި ހަމަނުޖެހުންތަކުން ރައްކާތެރިވުމަށްޓަކައި ބޮޑެތި ސިޓީތަކުގެ ފިހާރަތައް ވަނީ ބަންދުކޮށްފައެވެ.
Advertisement
މި ބޮޑު ހަޅުތާލު ކުރިއަށް މިދަނީ އަންނަ ނޮވެމްބަރު 29 ވަނަ ދުވަހު ސްޕޭނުގައި އަވަސް އާންމު އިންތިޚާބެއް ބޭއްވުމަށް ތައްޔާރުވަމުންދާ ދަނޑިވަޅެއްގައެވެ. ބޯހިޔާވަހިކަމުގެ މައްސަލަ ހައްލުކުރުމަށް ސަރުކާރުން ހުށަހެޅި ކުއްލި ގާނޫނުތައް ޕާލަމެންޓުން ބޭރުކޮށްލުމާ ގުޅިގެން ބާއްވާ މި އިންތިޚާބުގެ ކުރިން، ކުލި ކޮންޓްރޯލް ކުރުމަށާއި މުސާރަ ބޮޑުކުރުމަށް ސަރުކާރަށް ވަނީ ވަރަށް ބޮޑަށް ޕްރެޝަރު ކުރިމަތިވެފައެވެ.
