މެލޭޝިއާގައި ތައުލީމު ހާސިލްކުރަމުންދާ ދިވެހި ދަރިވަރުންނަށާއި އެ ގައުމުގައި ދިރިއުޅޭ ދިވެހި އާއިލާތަކަށް ދިމާވާ އެކި ދަތިތަކަށް ހައްލު ހޯދައިދެއްވާނެކަމުގެ ފުރިހަމަ ޔަގީންކަން މެލޭޝިއާގެ ބޮޑުވަޒީރު އަންވަރު އިބްރާހީމް ދެއްވާފައިވާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ޕީއެސްއެމްގެ "ނޭޝަން ޗެޓް" ޕްރޮގްރާމްގައި ވާހަކަފުޅުދައްކަވަމުން ރައީސުލްޖުމްހޫރިއްޔާ ވިދާޅުވީ، ބޮޑުވަޒީރު އަންވަރު ދާދިފަހުން ރާއްޖެއަށް ކުރެއްވި ފުރަމާނަ ދަތުރުފުޅަކީ ދެ ގައުމުގެ ޒަމާންވީ ގުޅުމަށް މުހިންމު އަދި ފައިދާހުރި ނިންމެވުންތަކެއް ނިންމެވި ވަރަށް ކާމިޔާބު އުފާވެރި ދަތުރުފުޅެއް ކަމަށެވެ.
މެލޭޝިއާގައި ރާއްޖޭގެ 2,700 އެއްހާ ދަރިވަރުން ތައުލީމު ހާސިލުކުރަމުންދާއިރު، އެ ދަރިވަރުންގެ އާއިލާތަކާއެކު 6,000 އަށްވުރެ ގިނަ ދިވެހިން އެ ގައުމުގައި ދިރިއުޅެމުންދާކަން ރައީސް ފާހަގަކުރެއްވިއެވެ. ރައީސް ވިދާޅުވި ގޮތުގައި، އެ ފަރާތްތަކަށް ބޭނުންވާ ލުއިފަސޭހަ އިންތިޒާމުތައް ހަމަޖައްސައިދެއްވާނެކަމުގެ ޔަގީންކަން މެލޭޝިއާ ސަރުކާރުން ވަނީ ދެއްވާފައެވެ. މީގެ އިތުރުން މެލޭޝިއާގައި ހުންނަ ދިވެހި އެމްބަސީގެ މަސައްކަތްތަކަށް ދިމާވާ ދަތިތައް ހައްލުކުރުމަށާއި، ދިވެހި ސަރުކާރުން އެދިފައިވާ ކަންކަމަށް މެލޭޝިއާއިން ފުރިހަމަ އެއްބާރުލުން ދެއްވާނެ ކަމަށް ބޮޑުވަޒީރު ވަނީ ވިދާޅުވެފައެވެ.
Advertisement
ހާއްސަ ގޮތެއްގައި ތައުލީމީ ދާއިރާއިން ދިވެހި ދަރިވަރުންނަށް ހުރި ފުރުސަތުތައް އިތުރަށް ފުޅާކުރުމަށް މި ދަތުރުފުޅުގެ ތެރޭގައި ވަނީ މަޝްވަރާކުރައްވާފައެވެ. އެގޮތުން މެލޭޝިއާގައި ޑޮކްޓަރުކަން ކިޔަވާ ދިވެހި ދަރިވަރުންނަށް ބޭނުންވާ އިންޓަރންޝިޕްގެ ފުރުސަތުތައް މިހާރަށްވުރެ ފަސޭހައިން ލިބޭނެ އިންތިޒާމު ހަމަޖެއްސުމަށާއި، މަތީ ތައުލީމު ހާސިލްކުރުމަށް މެލޭޝިއާއަށް ދާން ބޭނުންވާ ކުދިންނަށް މަގުފަހިކޮށްދެއްވުމަށް ބޮޑުވަޒީރު އަންވަރު އިބްރާހީމް ހާއްސަ އިސްކަމެއް ދެއްވައިގެން މަސައްކަތްޕުޅުތަކެއް ކޮށްދެއްވާނެކަމުގެ ޔަގީންކަން ވަނީ އަރުވާފައެވެ.
އިގްތިސާދީ ދާއިރާއިން ގުޅުން ބަދަހިކުރުމުގެ ގޮތުން، ދެ ގައުމުގެ ދެމެދުގައި ސޮއިކުރުމަށް ހަމަޖެހިފައިވާ 100 މިލިއަން ޑޮލަރުގެ ކަރަންސީ ސޮވޮޕް އެގްރީމަންޓުގެ މަސައްކަތްތައް އަވަސްކުރުމަށް އިސްކަންދެއްވާނެ ކަމަށް މެލޭޝިއާގެ ބޮޑުވަޒީރު ވަނީ ވިދާޅުވެފައެވެ. އަދި ދެ ގައުމުގެ ދެމެދުގައި ހާއްސަ އިނާޔަތްތަކާއެކު ވިޔަފާރިކުރުމުގެ އެއްބަސްވުން (ޕްރެފެރެންޝަލް ޓްރޭޑް އެގްރީމަންޓް - ޕީޓީއޭ) ގާއިމުކުރުމަށް ބޭނުންވާ މަޝްވަރާތައް ވީ އެންމެ އަވަހަކަށް ފެށުމަށްވެސް ވަނީ ނިންމަވާފައެވެ.
މީގެއިތުރުން، ރާއްޖެއާއި މެލޭޝިއާއާ ދެމެދު އިޖުތިމާއީ އެހީތެރިކަން ފޯރުކޮށްދިނުމާއި، އިންވެސްޓްމެންޓުގެ އާ ފުރުސަތުތައް ހޯދުމުގެ އިތުރުން މޫސުމީ ބަދަލުތަކުން އަރައިގަތުމަށް ކުރެވޭ ބައިނަލްއަގުވާމީ މަސައްކަތްތަކުގައި އެއްބާރުލުން ދިނުމަށް ވަނީ އެއްބަސްވެފައެވެ. މެލޭޝިއާއަކީ ރާއްޖެއަށް ވަރަށް ހާއްސަ ގައުމެއްކަން ފާހަގަކުރައްވަމުން، އެކި ދާއިރާތަކުން ދެ ގައުމުގެ ގުޅުން އިތުރަށް ބަދަހިކުރުމުގެ މުހިންމުކަން ރައީސް ޑރ. މުޢިއްޒު ވަނީ ފާހަގަކުރައްވާފައެވެ.
ދެ ގައުމުގެ ދެމެދުގައި ވެވިފައިވާ އެއްބަސްވުންތަކާއި މަޝްވަރާތައް ހަރުދަނާކޮށް ކުރިއަށް ގެންދިއުމަށްޓަކައި، ހާއްސަ ޖޮއިންޓް ކޮމިޓީއެއް އެކުލަވާލުމުގެ އަމަލީ މަސައްކަތްތައް ދެ ގައުމުގެ ސަރުކާރު ގުޅިގެން މިހާރު ވަނީ ފަށާފައެވެ.
