ތާރީހީ މުހިންމު ދަތުރުފުޅެއްގައި މައްކާގެ މަސްޖިދުލްހަރާމްގެ އިމާމު އަދި ހަތީބު ފަޟީލަތުއްޝައިހު ޑރ. ޔާސިރް އައްދައުސަރީ ރާއްޖެ ވަޑައިގަންނަވާ ގޮތަށް ހަމަޖެހިއްޖެއެވެ.
މިކަން ރަސްމީކޮށް އިއުލާން ކުރެއްވީ ކީރިތި ގުރްއާން ކިޔެވުމުގެ 38 ވަނަ ގައުމީ މުބާރާތުގެ ނަތީޖާ ފާޅުކުރުމަށްޓަކައި ބޭއްވި ހާއްސަ ރަސްމިއްޔާތުގައި ވާހަކަފުޅު ދައްކަވަމުން، އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދުއެވެ.
މި ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ޑރ. ޝަހީމް ވިދާޅުވީ، "މަސްޖިދުލްހަރާމްގެ އިމާމު ޑރ. ޔާސިރް އައްދައުސަރީ ރާއްޖެ ވަޑައިގަންނަވާނެ. އެމަނިކުފާނު ރާއްޖެ ވަޑައިގަންނަވާނެ ތާރީޚު ފަހުން އިއުލާން ކުރާނަން،" ކަމަށެވެ. މިއީ ދިވެހިރާއްޖެއާއި އިސްލާމީ ދުނިޔެއާ ދެމެދު އޮތް ދީނީ ގުޅުންތައް އިތުރަށް ބަދަހިކުރުމަށާއި، ރާއްޖޭގައި ކީރިތި ގުރްއާނަށް ދެވޭ އަހައްމިއްޔަތުކަން ފުޅާކުރުމުގެ މަގްސަދުގައި ހަމަޖެހިގެންދިޔަ މުހިންމު ދަތުރުފުޅެކެވެ.
Advertisement
މިއީ 43 އަހަރުގެ ދިގު މުއްދަތަކަށްފަހު މަސްޖިދުލްހަރާމްގެ އިމާމަކު ރާއްޖެއަށް ކުރައްވާ ފުރަތަމަ ޒިޔާރަތެވެ. ތާރީހުގައި އެންމެ ފުރަތަމަ މައްކާގެ ހަރަމްފުޅުގެ އިމާމަކު ރާއްޖެ ވަޑައިގެންނެވީ މާލޭގެ އިސްލާމީ މަރުކަޒު ހުޅުވުމުގެ ތާރީހީ ރަސްމިއްޔާތަށެވެ. އެ ދަތުރުފުޅުގައި ވަޑައިގެންނެވީ ފަޟީލަތުއްޝައިހު މުހައްމަދު އައްސުބައްޔިލްއެވެ.
މީގެއިތުރުން، ދާދިފަހުން 2025 ވަނަ އަހަރު މަދީނާގެ މަސްޖިދުއްނަބަވީގެ މަޝްހޫރު އިމާމު ފަޟީލަތުއްޝައިހު ޑރ. ސަލާހުލް ބުދައިރުވެސް ވަނީ ރާއްޖެއަށް ވަޑައިގެން، ދިވެހި ރައްޔިތުންނާ ބައްދަލުކުރައްވާ ދީނީ ދަރުސްތައް ދެއްވާފައެވެ.
