މައްކާ އަލް މުކައްރަމާގައި ވައިގެ ނުރައްކަލެއް އޮތްކަމުގެ ކުއްލި އިންޒާރެއް ސައުދީ އަރަބިއްޔާގެ ކަމާބެހޭ އިދާރާތަކުން މިއަދު މެންދުރުފަހުގެ ވަގުތެއްގައި ނެރެފިއެވެ.

މިއަދު (24 ސެޕްޓެމްބަރު 2026) މައްކާ ގަޑިން މެންދުރުފަހު 1:25 ގައި ސައުދީ ސިވިލް ޑިފެންސުން މި އިންޒާރު ނެރުމާ ގުޅިގެން، ރައްކާތެރިކަމުގެ ފިޔަވަޅެއްގެ ގޮތުން އެ ސަރަހައްދުގައި ދިރިއުޅޭ ރައްޔިތުންނާއި މައްކާއަށް ޒިޔާރަތްކޮށްފައިވާ ފަރާތްތަކުން ނުރައްކާ ފިލައިގެން ދާންދެން ގޭތެރޭގައާއި ރައްކާތެރި ތަންތަނުގައި މަޑުކުރުމަށް ވަނީ އަންގާފައެވެ.

ނަމަވެސް، މި އިންޒާރު ނެރުނުތާ ގާތްގަނޑަކަށް 11 މިނެޓު ފަހުން، މެންދުރުފަހު 1:36 ގައި އެ ނުރައްކާ އެއްކޮށް ފިލައިގެން ގޮސްފައިވާކަން ސިވިލް ޑިފެންސުން ވަނީ ރަސްމީކޮށް އިއުލާންކޮށްފައެވެ.

މައްކާގެ ހާލަތު މިހާރު އާންމު ހާލަތަކަށް ރުޖޫއަވެ، ނުރައްކާ ފިލައިގެން ގޮސްފައިވާކަން ކަށަވަރުކޮށްދެމުން، ސިވިލް ޑިފެންސުން ވަނީ އެންމެހައި ފަރާތްތަކުގެ ސަލާމަތާއި ރައްކާތެރިކަމަށްޓަކައި ރަސްމީ އިރުޝާދުތަކަށް ފުރިހަމައަށް ބޯލެނބުމަށް އިލްތިމާސްކޮށްފައެވެ. މީގެއިތުރުން، މިފަދަ ކުއްލި ހާދިސާތަކުގެ ވަގުތުތަކުގައި ބޭރަށް ނުކުމެ އެއްވެ އުޅުމާއި، ވީޑިއޯ އަދި ފޮޓޯ ނެގުން ފަދަ ނުރައްކާތެރި އަމަލުތަކުން ދުރުހެލިވުމަށް ވެސް އާންމުންނަށް ވަނީ ހަނދާންކޮށްދީފައެވެ.

މި ހިނގާ ސެޕްޓެމްބަރު މަހުގެ ތެރޭގައި މައްކާއިން މިފަދަ ވައިގެ ނުރައްކަލުގެ އިންޒާރެއް ނެރުނު މިއީ ދެވަނަ ފަހަރެވެ. މި މަހުގެ ކުރީކޮޅުގައިވެސް މިފަދަ ކުއްލި އިންޒާރެއް މައްކާގެ ސަރަހައްދަށް ވަނީ ނެރެފައެވެ.