1447 ވަނަ އަހަރުގެ ހައްޖުވެރިން ރާއްޖޭން ފުރުމުގެ އިންތިޒާމްތަކުގެ ތެރެއިން، "މައްކާ ރޫޓު އިނީޝިއޭޓިވް" ގެ ދަށުން ހަމަޖައްސަންޖެހޭ ކަންކަން ފުރިހަމަކުރުމަށްޓަކައި ސައުދީ އަރަބިއްޔާގެ އިސް ވަފުދެއް ރާއްޖެ ވަޑައިގަންނަވަން ފައްޓަވައިފި އެވެ.
މި ވަފުދުގެ ތެރެއިން އެންމެ ފުރަތަމަ ރާއްޖެ ވަޑައިގެންފައިވަނީ މައްކާ ރޫޓު އިނީޝިއޭޓިވްގެ އޮޕަރޭޝަންސް މެނޭޖަރު އުމަރު ޢަބްދުލްމަޖީދު އާރް. އައްދައީޖު އެވެ. އޭނާ ރާއްޖެ ވަޑައިގެންފައިވަނީ ރޭގެ ވަގުތެއްގައެވެ. މީގެ އިތުރުން، މި ވަފުދުގައި ހިމެނިވަޑައިގަންނަވާ އިތުރު 18 ބޭފުޅުން މި މަހުގެ 11 ވަނަ ދުވަހު ރާއްޖެ ވަޑައިގަތުމަށް ވަނީ ހަމަޖެހިފަ އެވެ.
މައްކާ ރޫޓު އިނީޝިއޭޓިވްއަކީ ހައްޖުވެރިންގެ ދަތުރުފަތުރުގެ ކަންކަން ލުއިފަސޭހަކޮށްދިނުމަށްޓަކައި ސައުދީ ސަރުކާރުން ކުރިއަށްގެންދާ ހާއްސަ މަޝްރޫއެކެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ކުރެއްވި މަސައްކަތްޕުޅުން، ރާއްޖެ މި މަޝްރޫއުގައި ހިމަނާފައިވަނީ 1446 ވަނަ އަހަރުގެ ހައްޖު މޫސުމުގައެވެ. މި ހިދުމަތް ރާއްޖޭގައި ރަސްމީކޮށް އިފްތިތާހުކޮށްދެއްވީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެވެ.
މި އިނީޝިއޭޓިވްގެ ސަބަބުން ދިވެހި ހައްޖުވެރިންނަށް ވަރަށް ބޮޑެތި ލުއިފަސޭހަތަކެއް ލިބިގެންދެ އެވެ. އެގޮތުން:
- ސައުދީއަށް އެތެރެވުމުގެ ކުރިން ރާއްޖޭގައި ތިބެގެން ސަޢުދީގެ އިމިގްރޭޝަން ކްލިއަރެންސް ނިންމާލެވުން.
- ހައްޖުވެރިންގެ ފޮށިތައް ސީދާ އެ ބޭފުޅުން ތިއްބަވާ ހޮޓަލާ ހަމައަށް ގެންގޮސްދިނުން.
- ޖިއްދާ އެއާޕޯޓުގައި ކިއޫގައި މަޑުކުރަންޖެހޭ ވަގުތު ސަލާމަތްވެ، ދަތުރުގެ ވަރުބަލިކަން ކުޑަވެގެންދިޔުން.
އިސްލާމިކް މިނިސްޓްރީން ފާހަގަކުރި ގޮތުގައި، ރާއްޖެއަށް މި ފުރުސަތު ލިބިފައިވަނީ އެ ވުޒާރާއިން ސައުދީގެ ކަމާބެހޭ އިސްވެރިންނާއެކު ކުރި މުހިއްމު މަޝްވަރާތަކެއްގެ ނަތީޖާއެއްގެ ގޮތުންނެވެ. އަދި މިއީ ސައުދީގެ ރަސްގެފާނު ސަލްމާން ބިން އަބްދުލްއަޒީޒްއާއި، ވަލީއަހްދު މުހައްމަދު ބިން ސަލްމާން ދިވެހި ރައްޔިތުންނަށް ބަހައްޓަވާ ގާތްކަމުގެ ހެއްކެކެވެ.
މި އިންތިޒާމުތައް ފުރިހަމަކުރުމުގައި ރާއްޖޭގައި ހުންނަ ސައުދީ އެމްބަސީއާއި ސަފީރު ހިޒް އެކްސެލަންސީ ޔަހްޔާ ހަސަން އަލްގަޙްތާނީ ދެއްވާ އެއްބާރުލުމަށް އިސްލާމީ ކަންތައްތަކާ ބެހޭ ވުޒާރާއިން ވަނީ ޝުކުރު އަދާކުރައްވާފަ އެވެ.
