މައްކާއަށް އަމާޒުކޮށް ފޮނުވާލި ދެ ބެލިސްޓިކް މިސައިލް ވައްޓާލައިފި ކަމަށް ސައުދީން ބުނެފި

ސައުދީ އަރަބިއްޔާގެ މައްކާ ޕްރޮވިންސަށް އަމާޒުކޮށް ހޫޘީ ހަނގުރާމަވެރިން ފޮނުވާލި ދެ ބެލިސްޓިކް މިސައިލެއް ވައިގެ ތެރޭގައި ދިފާއުކޮށް ވައްޓާލާފައިވާ ކަމަށް އެ ގައުމުގެ ސިވިލް ޑިފެންސް އޮތޯރިޓީން ހާމަކޮށްފިއެވެ.

އަލްޖަޒީރާއިން ރިޕޯޓްކޮށްފައިވާ ގޮތުގައި، ސައުދީގެ ދިފާއީ ބާރުތަކުން ވައްޓާލި މި ދެ މިސައިލްގެ ބައިތައް ވެއްޓިފައިވަނީ މައްކާ ޕްރޮވިންސްގެ ސަބޫހާ ނަމަކަށް ކިޔާ އަވަށަކަށެވެ.

މި ހާދިސާއާ ގުޅިގެން ސައުދީ ސިވިލް ޑިފެންސްގެ ތަރުޖަމާނު ސޯޝަލް މީޑިއާގައި ހިއްސާކުރެއްވި ބަޔާނެއްގައި ވިދާޅުވީ، ޓެރަރިސްޓް ހޫޘީ ހަނގުރާމަވެރިން މައްކާ ޕްރޮވިންސަށް އަމާޒުކޮށް ފޮނުވާލި ދެ މިސައިލް ވައިގެ ތެރެއަށް ގޮއްވާލުމާ ގުޅިގެން، އޭގެ ބައިތައް ސަބޫހާ އަވަށަށް ވެއްޓުމުން ސިވިލް ޑިފެންސްގެ ޓީމުތަކުން އެ ސަރަހައްދުގައި ހަރަކާތްތެރިވެފައިވާ ކަމަށެވެ.

މި ހާދިސާގައި އެއްވެސް މީހަކަށް ގެއްލުމެއް ލިބުނު ކަމެއް ނުވަތަ މުދަލަކަށް ގެއްލުންވި ކަމެއް އަދި މިހާތަނަށް ސައުދީގެ ކަމާބެހޭ ފަރާތްތަކުން ހާމަކޮށްފައެއް ނުވެއެވެ.

ޔަމަނުގެ ހޫޘީން މީގެ ކުރިންވެސް ސައުދީގެ އެކި ސަރަހައްދުތަކަށާއި މުގައްދަސް ބިންތަކަށް އަމާޒުކޮށް މިސައިލާއި ޑްރޯން ހަމަލާތައް ފޮނުވާލާފައިވާއިރު، ސައުދީގެ ވައިގެ ދިފާއީ ނިޒާމުން އަންނަނީ އެފަދަ ގިނަ ހަމަލާތައް ކާމިޔާބުކަމާއެކު ދިފާއުކުރަމުންނެވެ.