ސައުދީގެ އިރުމަތީ ޕްރޮވިންސަށް އަމާޒުކޮށް ފޮނުވާލި ޑްރޯނެއް ގުޅިފައިވާ ކޯލިޝަނުން ވައްޓާލައިފި

ސައުދީ އަރަބިއްޔާގެ އިރުމަތީ ޕްރޮވިންސަށް އަމާޒުކޮށް ވައިގެ މަގުން ފޮނުވާލި ޑްރޯނެއް، ސައުދީ އިސްވެ އޮންނަ އަސްކަރީ ކޯލިޝަނުގެ ބާރުތަކުން ހުއްޓުވައި، ވައްޓާލައިފި ކަމަށް އެ ކޯލިޝަނުން ހާމަކޮށްފިއެވެ.

މި ހާދިސާއާ ގުޅިގެން ކޯލިޝަނުން ނެރުނު ބަޔާނުގައި ބުނެފައިވަނީ، އިރުމަތީ ޕްރޮވިންސާ ދިމާލަށް ދަތުރުކުރަމުން ދިޔަ މި ޑްރޯން ދެނެގަނެވި، ސައުދީ ވައިގެ ދިފާއީ ބާރުތަކުން ވަނީ އެ ޑްރޯން ޖައްވުގެ ތެރޭގައި ހުއްޓުވައި، އެއްކޮށް ހަލާކުކޮށްލާފައި ކަމަށެވެ. އަދި މި ހަމަލާ ނާކާމިޔާބު ކޮށްލުމުގެ ސަބަބުން އެއްވެސް މީހަކަށް ގެއްލުމެއް ލިބިފައި ނުވާ ކަމަށްވެސް ރިޕޯޓުތައް ބުނެއެވެ.

އާންމު ރައްޔިތުންނާއި މަދަނީ ވަސީލަތްތަކަށް އަމާޒުކޮށް ދޭ މިފަދަ ނުރައްކާތެރި ހަމަލާތަކުން ސަލާމަތްވުމަށާއި، ސަރަހައްދުގެ ސަލާމަތާއި ރައްކާތެރިކަން ދެމެހެއްޓުމަށްޓަކައި އަޅަންޖެހޭ އެންމެހައި ފިޔަވަޅުތައް އަޅަމުންދާނެ ކަމަށް ކޯލިޝަނުން ވަނީ ބުނެފައެވެ.