މައްކާގައި ބާއްވާ ދުނިޔޭގެ އެންމެ ބޮޑު ޤުރުއާން ކިޔެވުމުގެ މުބާރާތުގައި، ރާއްޖެ ތަމްސީލުކޮށް، ޤުރުއާން ހިތުން ކިޔުމުގެ ގޮފިން، އަލްޙާފިޡާ ފާޠިމަތު ޝާޔާ ޒާޙިރު، މއ. އަސާސް އަށް 4 ވަނަ ލިބިއްޖެއެވެ.

މިއަހަރުގެ މުބާރާތުގައި 113 ގައުމަކުން ބައިވެރިން ވާދަކޮށްފަވާއިރު، މުބާރާތުގެ ހަތަރު ވަނައަށް ޚާއްސަ އިނާމެއްގެ ގޮތުގައި އެއްލައްކަ ހަތްދިހަ ހާސް ރިޔާލް ކަނޑައަޅާފައިވެއެވެ. އެއީ ދިވެހި ރުފިޔާއިން ހަތް ލައްކަ ރުފިޔާއެވެ.

މިއީ މި މުބާރަތް ބޭއްވި 46 ވަނަ އަހަރު ކަމުގައި ވިޔަސް މިއީ މި މުބާރާތުގެ ތާރީހުގައި އަންހެން ބައިވެރިން މުބާރާތުގައި ވާދަކުރި އެންމެ ފުރަތަމަ އަހަރެވެ.

މުބާރާތުގެ ނަތީޖާ ފާޅުކުރުމަށް ޙަރަމްފުޅުގައި ބޭއްވި ޚާއްސަ ޙަފްލާ ޝަރަފްވެރިކޮށްދެއްވީ މައްކާގެ އަމީރުގެ ނައިބު ހިޒް ރޯޔަލް ހައިނަސް ޕްރިންސް ސުޢޫދު ބިން މިޝްޢަލް ބިން ޢަބްދުލްޢަޒީޒެވެ. މީގެ އިތުރުން މިޖަލްސާގައި ސަޢުދީ ޢަރަބިއްޔާގެ އިސްލާމިކް މިނިސްޓަރާއި ޙަރަމްފުޅުގެ އިމާމު ޝައިޚު ޑރ ޢަބްދުއްރަޙްމާނުއް ސުދައިސް ބައިވެރިވެލެއްވިއެވެ. މި ރަސްމިއްޔާތުގެ ޚާއްސަ މެހެމާނެއްގެ ގޮތުގައި އިސްލާމީކަންތައްތަކާއި އައުޤާފާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވަނީ ބައިވެރިވެލައްވާފައެވެ.

މި ޙަފްލާއަށްފަހު ސަޢުދީ ޢަރަބިއްޔާގެ މިނިސްޓަރ އޮފް އިސްލާމިކް އެފެއާޒް، ދަޢުވާ އެންޑް ގައިޑެންސް، ހިޒް އެކްސެލެންސީ ޑރ. އަބްދުއްލަޠީފް އާލުއްޝައިޚު ވަނީ ޝާޔާއާއި އޭނާގެ ބެލެނިވެރިންގެ ގާތަށް ވަޑައިގެން ތަހުނިޔާ ދަންނަވައި ހިތްވަރު ދެއްވާފައެވެ.