ތިމާވެށި ރައްކާތެރިކުރުމަށް ދެމެހެއްޓެނިވި ގޮތެއްގައި މަސައްކަތްކޮށް، އާމްދަނީ ހޯދޭނެ ފުރުސަތުތައް ފަހިކޮށްދިނުމަށް ސަރުކާރުން ކުރިއަށްގެންދަވާ "ވިލުންވެށި" ޕްރޮގްރާމް ފުޅާކޮށް، ކުރިއަށް އޮތްތަނުގައި ކުންފުނިތަކަށްވެސް ފުރުސަތު ހުޅުވާލަން ނިންމަވާފައިވާކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވަޒީރު އަލީ ޝަރީފު ވިދާޅުވެއްޖެއެވެ. ވަޒީރު މިހެން ވިދާޅުވީ މިއަދު ބޭއްވި ނޫސްވެރިންގެ ބައްދަލުވުމެއްގައެވެ.
މި ޕްރޮގްރާމަކީ އޭޝިއަން ޑިވެލޮޕްމަންޓް ބޭންކް (އޭޑީބީ)ގެ މާލީ އެހީތެރިކަމާއެކު، މޫސުމީ ބަދަލުތަކާ ބެހޭ ވުޒާރާއާއި އެސްއެމްއީ ޑިޖިޓަލް ގުޅިގެން ކުރިއަށްގެންދާ މަޝްރޫއެކެވެ. މިހާރު އަމަލުކުރަމުންދާ އުސޫލުން ވަކިވަކި ފަރުދުންނަށް 100,000 ރުފިޔާއާ ހަމައަށް މާލީ އެހީ ލިބޭއިރު، ކުންފުނިތަކަށް ފުރުސަތު ހުޅުވާލާނީ އެހީގެ އަދަދު އިތުރުކުރުމަށްފަހުގައެވެ.
އީޖާބީ ޕްރޮޖެކްޓުތަކަށް އިސްކަންދެނީ އެކި ކަހަލަ މާލީ އެހީތެރިކަން ނުލިބިގެން މުޖުތަމަޢަށް ނުނުކުމެވިފައި ތިބި ގިނަ ސްޓާޓްއަޕްތަކަކަށް ފުރުސަތު ހޯދައިދިނުމުގެ ބޭނުމުގައި ކަމަށް ވަޒީރު ފާހަގަކުރެއްވިއެވެ. މި ޕްރޮގްރާމަށް ލިބެމުންދާ ތަރުހީބު ރަނގަޅުވުމާއެކު، އިތުރު ޕްރޮޕޯޒަލްތަކަށް އަންނަ އަހަރުގެ ތެރޭގައި ހުޅުވާލުމަށް ވަނީ ހަމަޖެހިފައެވެ.
Advertisement
މިދިޔަ ޖޫން މަހު އިއުލާންކުރި "ވިލުންވެށި ގްރާންޓް ޕްރޮގްރާމް"އަށް ލިބުނު ޕްރޮޕޯޒަލްތަކުގެ ތެރެއިން 150 ޕްރޮޕޯޒަލް އިވަލުއޭޓްކުރުމުގެ މަސައްކަތް މިހާރު ދަނީ ކުރިއަށެވެ. އެ މަރުހަލާ ނިމި، އެންމެ ގާބިލް 50 ފަރާތެއް ހޮވައި، އެ ފަރާތްތައް އަންނަ ނޮވެމްބަރު މަހުގެ ތެރޭގައި އިއުލާންކުރާނެ ކަމަށް ވަޒީރު ވިދާޅުވިއެވެ.
މި ޕްރޮގްރާމްގެ އިވަލުއޭޝަން މަސައްކަތުގައި އެސްއެމްއީ ބޭންކް ބައިވެރިކުރަނީ ރާއްޖޭގެ ބޭންކިންގ ނިޒާމު ގްރީން ކްލައިމެޓް ފަންޑުގައި އެކްރެޑިޓްކޮށް، ވަކި މިންގަނޑުތަކަކަށް ފައްކާކުރުމުގެ ބޭނުމުގައެވެ. މިއީ ބޭންކުތަކުގެ ފެންވަރު މަތިކޮށް، ތިމާވެށީގެ ފަންޑުތަކަށް ވާސިލްވުމަށް އެޅޭ މުހިންމު ފިޔަވަޅެކެވެ.
ވިލުންވެށި ޕްރޮގްރާމުގެ މައިގަނޑު މަގުސަދަކީ މޫސުމީ ބަދަލުތަކުން ތިމާވެއްޓަށް ކުރާ ނޭދެވޭ އަސަރުތަކަށް ވިލުންތެރިވުމާއި، ތިމާވެއްޓާ ރައްޓެހި އުސޫލުތަކުން ކާނާގެ ޔަގީންކަން ކަށަވަރުކުރުމެވެ. އަދި އައު އީޖާދުތަކާއި ޑިޖިޓަލް ވަސީލަތްތައް ބޭނުންކޮށްގެން ދެމެހެއްޓެނިވި ގޮތެއްގައި އާމްދަނީ ހޯދޭނެ މަގުތައް ފަހިކޮށްދިނުމަކީވެސް މި މަޝްރޫއުގެ އަމާޒެކެވެ.
