ހުޅުމާލޭ ފޭސް އެކެއްގެ ރުއްގަނޑު 2 ސަރަހައްދުގައި އޮތް ހުސްބިމުގައި، މުނިފޫހިފިލުވުމަށް ހާއްސަކޮށްގެން ޒަމާނީ ފެންވަރުގެ ބޯލިންގ އެރީނާއަކާއި ގޭމިންގ އާކޭޑެއް ތަރައްގީކުރުމަށް ހައުސިން ޑިވަލޮޕްމެންޓް ކޯޕަރޭޝަން (އެޗްޑީސީ) އިން ނިންމައިފިއެވެ. މި މަޝްރޫއުގެ މައިގަނޑު މަގްސަދަކީ ހުޅުމާލޭގައި ދިރިއުޅޭ އެކި އުމުރުފުރާގެ ފަރާތްތަކުގެ އިތުރުން ޒިޔާރާތްކުރާ ފަތުރުވެރިންނަށްވެސް ބޭނުންކުރެވޭނެ ފަދަ މަގުބޫލު މުނިފޫހިފިލުވުމުގެ ވަސީލަތްތަކެއް ގާއިމުކޮށްދިނުމެވެ.

މި މަޝްރޫއުގެ ދަށުން އެ ސަރަހައްދުގައި 10 ލޭނުގެ ބޯލިންގ އެލީއަކާއި، ގޭމިންގ އާކޭޑެއްގެ އިތުރުން ޕާޓީތަކާއި އިޖްތިމާއީ ތަފާތު ހަރާތްތައް ބޭއްވޭނެ މަލްޓި-ޕާޕަސް ހޯލެއް ގާއިމުކުރެވޭނެއެވެ. މީގެއިތުރުން ކުޅިވަރު ބަލަން ތިބެވޭނެ އިންތިޒާމާއެކު، ލޮކަރު ރޫމާއި، އާންމު ފާހާނާ ބަރިއެއްގެ އިތުރުން، މޫދުން އައިސް ފެންވެރޭނެ އިންތިޒާމާއި ތަނަވަސް ޕާކިންގ އޭރިއާއެއްވެސް މި ތަރައްގީގެ ތެރޭގައި ހިމެނެއެވެ.

އެޗްޑީސީން މައުލޫމާތު ދޭ ގޮތުގައި މި މަޝްރޫއު ކުރިއަށްދާނީ އެ ސަރަހައްދުގެ ތިމާވެއްޓަށާއި، އަތިރިމައްޗަށް އަދި މިހާރު އެތަނުގައި ހުރި ގަސްގަހާގެއްސަށް މާބޮޑު ނޭދެވޭ އަސަރެއް ނުކުރާނެ ގޮތަށް ޑިޒައިން ކޮށްގެންނެވެ. މިއީ ތިމާވެއްޓާ ރައްޓެހި ގޮތަކަށް ސަރަހައްދީ ރީތިކަން ދަމަހައްޓައިގެން ކުރިއަށްގެންދިއުމަށް ރޭވިފައިވާ މަޝްރޫއެކެވެ.

ރުއްގަނޑު 2 ސަރަހައްދަށް މި ގެނެވޭ ބަދަލުގެ ސަބަބުން ހުޅުމާލޭގެ ރަށްވެހިންނާއި، އާއިލާތަކާއި، ޒުވާނުންގެ އިތުރުން އެކި ރަށްރަށުންނާއި ބޭރުގައުމުތަކުން ޒިޔާރާތްކުރާ ފަތުރުވެރިންނަށްވެސް އެކުގައި ވަގުތު ހޭދަކޮށްލެވޭނެ އުފާވެރި، އަމާން މާހައުލެއް ގާއިމުވެގެންދާނެއެވެ. އަދި މީގެ ސަބަބުން މުޖުތަމައުގެ އިޖްތިމާއީ ގުޅުންތައް އިތުރަށް ވަރުގަދަވެގެންދާނެ ކަމަށް ބެލެވެއެވެ.

ހުޅުމާލެއަކީ އެތަނުގައި ދިރިއުޅޭ ރައްޔިތުންނަށާއި، ތަފާތު ބޭނުންތަކަށް އެ ރަށަށް ޒިޔާރާތްކުރާ އެންމެހައި ފަރާތްތަކަށްވެސް ހިތްފަސޭހަ، ރައްކާތެރި އަދި ފުރިހަމަ ވެއްޓަކަށް ހެދުމަށްޓަކައި އެޗްޑީސީން މެދުކެނޑުމެއްނެތި ގިނަ މަސައްކަތްތަކެއް އަންނަނީ ކުރަމުންނެވެ.