ޕެންޝަން އޮފީހުގެ ފަރާތުން ވިލާ އިންޓަރނޭޝަނަލް ހައި ސްކޫލުގެ ދަރިވަރުންނަށް އަމާޒުކޮށްގެން "ކެރިއަރ ކޮމްޕަސް" ޕްރޮގްރާމުގެ ހާއްސަ ސެޝަނެއް މިއަދު ވަނީ ބާއްވަފައެވެ. މި ސެޝަންގެ މައިގަނޑު މަގްސަދަކީ ދަރިވަރުން ސްކޫލް ނިންމައި ވަޒީފާގެ މާހައުލަށް ނުކުތުމަށާއި، އަމިއްލަ ފައިމައްޗަށް ތެދުވެ މާލީ މިނިވަންކަން ހޯދުމަށް ބޭނުންވާ އަމަލީ އަދި އިލްމީއި ހުނަރު ފޯރުކޮށްދިނުމެވެ. އަދި ދަރިވަރުންނަށް މަތީ ތައުލީމަށާއި ވަޒީފާގެ މައިދާނަށް ބޭނުންވާ އަމަލީ ހުނަރުތައް ތަރައްގީކޮށް، އެކުދިންގެ މުސްތަގުބަލު ކާމިޔާބުކަމާއެކު ބައްޓަންކުރުމަށް ބޭނުންވާ މުހިންމު އަސާސީ މައުލޫމާތު ފޯރުކޮށްދިނުންވެސް މި ޕްރޮގްރާމުގެ މަގްސަދުތަކުގެ ތެރޭގައި ހިމެނެއެވެ.

މި ސެޝަންގެ ތެރެއިން ކެރިއަރ ބައްޓަންކުރުމާއި، ކުރިއަށްދާނެ ދާއިރާއެއް އިހްތިޔާރުކުރުމުގެ އިތުރުން ސީވީ ތައްޔާރުކުރުމާއި، އިންޓަވިއުއަށް ބޭނުންވާ މުހިންމު ހުނަރުތަކާ ގުޅޭގޮތުން ދަރިވަރުންނަށް މައުލޫމާތު ދެވުނެވެ. އެގޮތުން، ފުރިހަމަ ސީވީއެއް އެކުލަވާލާނެ ގޮތާއި، ތިމާގެ ހުނަރާއި ތަޖުރިބާ އެންމެ ރަނގަޅަށް ހުށަހަޅައިދޭނެ ގޮތްތަކުގެ އިތުރުން، ވަޒީފާއަށް އެދި ހުށަހެޅުމާއި އިންޓަވިއުއަށް ފުރިހަމައަށް ތައްޔާރުވާނެ ގޮތްތައް ދަރިވަރުންނަށް ވަނީ ދަސްކޮށްދީފައެވެ.

މީގެ އިތުރުން، މޯލްޑިވްސް ރިޓަޔަރމަންޓް ޕެންޝަން ސްކީމް (އެމް.އާރް.ޕީ.އެސް) އާއި ރިޓަޔަރމަންޓަށް ތައްޔާރުވުމުގެ އަސާސީ މައުލޫމާތުތައްވެސް ދަރިވަރުންނާ ހިއްސާކުރެވުނެވެ. އަދި މުސްތަޤުބަލުގައި މާލީ ރައްކާތެރިކަން ކަށަވަރުކުރުމަށްޓަކައި ޒުވާން އުމުރުގައި ރިޓަޔަރމަންޓަށް ފައިސާ ރައްކާކުރަން ފެށުމުގެ މުހިންމުކަމާއި، އެކަމަށްޓަކައި މިއަދު އެޅިދާނެ ފިޔަވަޅުތަކުގެ މައްޗަށްވެސް މި ސެޝަންގައި ވަނީ އަލިއަޅުވާލާފައިވެއެވެ.

މިއީ ޒުވާނުންގެ މެދުގައި މާލީ ހޭލުންތެރިކަން އިތުރުކުރުމަށާއި، ދިވެހިރާއްޖޭގެ ޕެންޝަން ނިޒާމަށް އަހުލުވެރިކުރުވުމަށްޓަކައި ޕެންޝަން އޮފީހުން ކުރިއަށްގެންދާ ހަރަކާތްތަކުގެ ތެރެއިން ކުރިއަށް ގެންދެވުނު މުހިންމު ސެޝަނެކެވެ.