ދިވެހިރާއްޖޭގެ ގުދުރަތީ ރީތިކަމަށް ބިނާކޮށް، ދުނިޔޭގެ ފެންވަރުގެ މަންޒިލެއް ތަރައްގީކުރުމަށްޓަކައި އަބޫދާބީގެ މަޝްހޫރު ކުންފުންޏެއް ކަމަށްވާ އީގަލް ހިލްސްއާ އެކު ދިވެހި ސަރުކާރުން 20 ބިލިއަން އެމެރިކާ ޑޮލަރުގެ އަގުހުރި ވޯޓާފްރަންޓް އަދި މެރީނާ އެއްބަސްވުމެއްގައި ސޮއިކޮށްފިއެވެ.
މި އެއްބަސްވުމުގައި ސޮއިކުރުމަށްފަހު، އީގަލް ހިލްސްގެ ޗެއާމަން މުޙައްމަދު އަލައްބާރު ވިދާޅުވީ، ދިވެހިރާއްޖެއަކީ ދުނިޔޭގެ އެހެން އެއްވެސް ތަނަކާ އެއްވަރުނުވާ ފަދަ ގުދުރަތީ ރީތިކަމެއް ލިބިފައިވާ ހާއްސަ ގައުމެއް ކަމަށެވެ.
"ކުންފުނީގެ އަމާޒަކީ ރާއްޖޭގެ އެ ވަރުގަދަ ސިފަތަކުގެ މައްޗަށް ބިނާކޮށް، ޒިންމާދާރުކަމާއެކު ދުނިޔޭގެ ފެންވަރުގެ ހަގީގީ މަންޒިލެއް އުފެއްދުން"
އެމާރުގެ ބާނީ އަދި ޗެއާމަން މުޙައްމަދު އަލައްބާރު
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން އިސްނަންގަވައިގެން ކުރިއަށްގެންދަވާ މި ބިޔަ މަޝްރޫއު ތަރައްގީކުރުމަށް ހަމަޖެހިފައިވަނީ، ވެރިރަށް މާލެއިން ލޯންޗުގައި ގާތްގަނޑަކަށް 17 މިނެޓުން ދެވޭ ރަސްމާލެ (ފުށިދިއްގަރު ފަޅު) ހިއްކައިގެންނެވެ. މިއީ އެކި ފިޔަވަހިތަކަށް ބަހާލައިގެން ކުރިއަށްގެންދާ ގާތްގަނޑަކަށް 20 ބިލިއަން ޑޮލަރުގެ އިންވެސްޓްމަންޓެކެވެ. މިހާރު ސޮއިކުރެވުނު އެއްބަސްވުމަކީ މައިގަނޑު ވިޔަފާރީގެ އޮނިގަނޑާއި ތަސައްވުރު އެކަށައެޅުމަށް ވެވުނު އެއްބަސްވުމެކެވެ.
Advertisement
މި މަޝްރޫއުގެ ދަށުން ބައިނަލްއަގުވާމީ ފެންވަރުގެ ހޮސްޕިޓާލިޓީ، މަތީ ފަންތީގެ ރެސިޑެންސްތައް، ބްރޭންޑެޑް ރެސިޑެންސްތައް، ދުނިޔޭގެ ފެންވަރުގެ މެރީނާ، ޕްރޮމެނާޑްތައް، ވިޔަފާރި އާއި ކެއިންބުއިމުގެ ހިދުމަތްތައް، މުނިފޫހިފިލުވުމާއި ސިއްހީ އަދި ތައުލީމީ ހިދުމަތްތައް ހިމެނޭ ފުރިހަމަ ސިޓީއެއް ގާއިމުކުރެވޭނެއެވެ.
މިނިސްޓަރ އޮފް ކޮންސްޓްރަކްޝަން އެންޑް އިންފްރާސްޓްރަކްޗަރ ޑރ. ޢަބްދުﷲ މުއްޠަލިބު މި މަޝްރޫއު ސިފަކުރެއްވީ ދިވެހި ތާރީހުގައި ވެސް ހިންގޭ އެންމެ ބޮޑު އިންވެސްޓްމަންޓް ޕްރޮގްރާމްގެ ގޮތުގައެވެ. މިނިސްޓަރު ވިދާޅުވި ގޮތުގައި، ދައުލަތުން ލޯނު ނުނަގައި އަދި ޓެކްސް ލުއިތަކެއް ނުދީ ހިންގާ މި މަޝްރޫއުގެ ސަބަބުން ބޭންކިން ނިޒާމުގެ ތެރެއިން ބޭރުގެ އެތައް ބިލިއަން ޑޮލަރެއްގެ އިންވެސްޓްމަންޓް ރާއްޖެއަށް ވަދެ، 54،000 އަށް ވުރެ ގިނަ ވަޒީފާ އުފެދި، އެތައް ހާސް އާއިލާއަކަށް ބޯހިޔާވަހިކަން ލިބިގެންދާނެއެވެ. މީގެ އިތުރުން މިއީ 2040 ވަނަ އަހަރާ ހަމައަށް ރާއްޖެ މަތީ އާމްދަނީ ލިބޭ ގައުމަކަށް ވުމަށް އެޅޭ މުހިންމު ފިޔަވަޅެއް ކަމަށްވެސް ފާހަގަކުރެއްވިއެވެ.
މި މަންޒިލް ފުރިހަމައަށް ތަރައްގީވެ ނިމުމުން އަހަރަކު އެއް މިލިއަނަށް ވުރެ ގިނަ ފަތުރުވެރިން ޒިޔާރަތްކޮށް، ފަތުރުވެރިކަމުގެ ދާއިރާއިން އަހަރަކު 2 ބިލިއަން ޑޮލަރުގެ އާމްދަނީއެއް ލިބޭނެ ކަމަށް ލަފާކުރެވެއެވެ. އަދި މަޝްރޫއުގެ މުޅި މުއްދަތުގައި ބޭރުގެ އިންވެސްޓްމަންޓްގެ ގޮތުގައި 30 ބިލިއަން ޑޮލަރު ލިބޭއިރު، އޭގެ ތެރެއިން 18 ބިލިއަން ޑޮލަރަކީ ރާއްޖޭގެ އިގްތިސާދަށް ސީދާ ވަންނާނެ ފައިސާ ކަމަށް އަންދާޒާކުރެވެއެވެ.
އީގަލް ހިލްސް އަކީ ދުނިޔޭގެ 18 ގައުމެއްގައި މަޝްރޫއުތައް ހިންގަމުން އަންނަ އަދި 45 ހޮޓާ ހިންގާ ކުންފުންޏެކެވެ. މީގެ އިތުރުން މުޙައްމަދު އަލައްބާރަކީ ދުބާއީގެ މަޝްހޫރު އީމާރު ޕްރޮޕަޓީސްގެ ވެސް ބާނީއެވެ. މި މަޝްރޫއު ކުރިއަށް ގެންދިއުމަށް ހަމަޖެހިފައިވަނީ ރާއްޖޭގެ ނާޒުކު ތިމާވެއްޓާއި ކަނޑުގެ މާހައުލަށް ހާއްސަ ސަމާލުކަމެއް ދީގެން ދެމެހެއްޓެނިވި އުސޫލުތަކުގެ މަތިންނެވެ.
