ރަސްމާލެ މަޝްރޫޢުގެ ދަށުން އެއްވެސް ފަރާތަކަށް އިސްލާމީ ޝަރީޢަތާ ޚިލާފު ކަންކަން ކުރުމުގެ ފުރުޞަތު ނޯންނާނެ ކަމަށާއި، އެ ސަރަޙައްދުގައި ޖުވާ ކުޅުމާއި އެހެން ދީންތަކުގެ ޝިޢާރު ފާޅުކުރުން ފަދަ އެއްވެސް ކަމެއް ނުކުރެވޭނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރާއްޖޭގެ ޤާނޫނުތަކަށް ރިޢާޔަތް ކުރައްވައި ރައީސް ވިދާޅުވީ، ރާއްޖޭގެ ޤާނޫނުތަކާއި ޤަވާޢިދުތަކަށް ހުރަސްއެޅޭ އެއްވެސް ކަމެއް މާސްޓަރ ޑިވެލޮޕަރަށް ނުކުރެވޭނެ ކަމަށެވެ. އަދި އެފަދަ އެއްވެސް ކަމެއް ކުރުމުގެ ފުރުޞަތު ދީގެން ނުވާނެ ކަމަށް ވެސް އެމަނިކުފާނު ފާހަގަކުރެއްވިއެވެ.
އެގޮތުން، ރާއްޖޭގެ ސިޔާދަތާއި އިސްތިޤްލާލަށް ގެއްލުންވާ ފަދަ އެއްވެސް ކަމެއް އެއްވެސް ފަރާތަކުން ކޮށްގެން ނުވާނެ ކަމަށާއި، އެއްވެސް ފަރާތަކަށް އެފަދަ ފުރުޞަތެއް ދީގެން ނުވާނެ ކަމަށް ޤާނޫނުގައި ސާފުކޮށް ބަޔާންކޮށްފައިވާނެ ކަމަށް ރައީސް ވިދާޅުވިއެވެ. ހަމައެއާއެކު، ދަޢުލަތުގެ ޤާނޫނީ ޒިންމާތަކަށް ހުރަސްއެޅޭ ފަދަ އެއްވެސް ކަމަކަށް ޖާގަ ނުދެވޭނެ ކަންވެސް ޤާނޫނުގައި ބަޔާންކޮށްފައިވާ ކަމަށް އެމަނިކުފާނު ވިދާޅުވިއެވެ.
Advertisement
މީގެއިތުރުން ރައީސް މުޢިއްޒު ވިދާޅުވީ، އިސްލާމީ ޝަރީޢަތުގައި ކަނޑައެޅިގެން މަނާކޮށްފައިވާ ޖުވާ ކުޅުމާއި، އިސްލާމްދީން ފިޔަވައި އެހެން ދީންތަކަށް އަޅުކަންކުރުމާއި ދީނީ ޝިޢާރު ފާޅުކުރުން ފަދަ އެއްވެސް ކަމެއް ކުރުމަކީ ޤާނޫނީ ގޮތުން މަނާކަމެއް ކަމަށެވެ.
ރައީސުލްޖުމްހޫރިއްޔާ އިތުރަށް ވިދާޅުވީ، ޤާނޫނުތަކުގައި މިފަދަ ވަރަށް ގިނަ ކަންކަން ސާފުކޮށް ބަޔާންކޮށްފައި އެބަހުރި ކަމަށެވެ. އަދި މިއިން އެއްވެސް ޤާނޫނަކަށް ނުވަތަ އުޞޫލަކަށް ހުރަސްއެޅޭ ފަދަ އެއްވެސް ކަމެއް އެއްވެސް ފަރާތަކުން ކޮށްފިނަމަ، އިދާރީ ގޮތުން އަޅާ ފިޔަވަޅުތަކުގެ އިތުރުން ޖިނާއީ އަދަބުވެސް ދެވޭނެ ކަމުގެ އިންޒާރު އެމަނިކުފާނު ދެއްވިއެވެ.
