ރާއްޖެއަށް ދިމާވެފައިވާ ޕްލާސްޓިކް ކުނީގެ ނުރައްކާތެރި މައްސަލައަށް ދެމެހެއްޓެނިވި ހައްލެއް ހޯދުމުގެ ގޮތުން، ތަފާތު މޮޑެލްތަކުގެ ދިރާސާތައް ކުރަމުންދާ ކަމަށް މޫސުމީ ބަދަލުތަކާއި ތިމާވެއްޓާއި ހަކަތައާ ބެހޭ ވުޒާރާއިން ހާމަކުރައްވައިފިއެވެ.
އެއްފަހަރު ބޭނުންކޮށްފައި އުކާލާ ޕްލާސްޓިކުން ތިމާވެއްޓަށް ލިބޭ ގެއްލުންތައް ކުޑަކުރުމަށްޓަކައި، އެކްސްޓެންޑެޑް ޕްރޮޑިއުސަރ ރެސްޕޮންސިބިލިޓީ (އީޕީއާރު) ތައާރަފްކުރުމަށް ބޭނުންވާ ޤައުމީ ފްރޭމްވޯކެއް އެކުލަވާލުމުގެ މަސައްކަތް މިހާރު ދަނީ ކުރައްވަމުންކަމުގައިވެސް އެ އިދާރާއިން ހާމަކުރެއްވިއެވެ.
ޕީއެސްއެމް ނިއުސްގެ "ރާއްޖެމިއަދު" ޕްރޮގްރާމްގައި ވާހަކަދައްކަވަމުން ޑިރެކްޓަރ ޖެނެރަލް ވޭސްޓް މެނޭޖްމަންޓް އެންޑް ޕޮލޫޝަން ކޮންޓްރޯލް އަހުމަދު މުރުތަލޯ ވިދާޅުވީ، އީޕީއާރު ނިޒާމު ގާއިމުކުރުމުން ވަކި ސައިޒެއްގެ ޕްލާސްޓިކް ފުޅި މަނާކުރުމުގެ ބަދަލުގައި، ހަރުދަނާ ކަލެކްޝަން ސެންޓަރުތަކެއް އުފެދި އުކާލެވޭ ޕްލާސްޓިކްގެ އަދަދު ވަރަށް ބޮޑަށް މަދުކުރެވޭނެ ކަމަށެވެ. އަދި ރާއްޖެ ފަދަ ޖަޒީރާ ޤައުމަކަށް މިފަދަ ނިޒާމެއް ތަންފީޒުކުރުމަކީ ގޮންޖެހުންތަކެއް ހުރި ކަމެއް ނަމަވެސް، އެކުލަވާލެވޭ ފްރޭމްވޯކުގެ ދަށުން ވަކި ސައިޒުތަކުގެ ޕްލާސްޓިކާއި ތިމާވެއްޓަށް ނުރައްކާތެރި މާއްދާތައް ހިމެނޭ އުފެއްދުންތައް މި ނިޒާމުގެ ތެރެއަށް ގެނެވޭނެ ކަމަށް އޭނާ ފާހަގަކުރެއްވިއެވެ.
Advertisement
ރާއްޖޭގައި އީޕީއާރު ތަންފީޒުކުރުމުގައި ބޭނުންކުރުމަށް މައިގަނޑު ދެ މޮޑެލެއް ވަނީ ފާހަގަކޮށްފައެވެ. އެއީ:
- ޓޭކްބެކް ސިސްޓަމް: ރާއްޖެއަށް އެތެރެކުރާ ތަކެތީގެ ބޭނުންހިފޭ މުއްދަތު ހަމަވުމުން، އެ ތަކެތި އުފެއްދި ފަރާތުން އަނބުރާ ޤައުމުން ބޭރުކުރުމުގެ ނިޒާމެކެވެ.
- ކޮންޓެއިނަރ ޑިޕޮސިޓް ސްކީމް: މުދާ އެތެރެކުރާ ވަގުތު ނެގޭ ޑިޕޮސިޓް އަގެއް، ބޭނުންކޮށް ނިމުމުން އެ ފުޅި ނުވަތަ ކޮންޓެއިނަރ އަނބުރާ ހަވާލުކުރުމުން ކޮންސިއުމަރަށް އަނބުރާ ލިބޭ ނިޒާމެކެވެ. މިއީ މީގެ ކުރިން ކޮކާކޯލާ ބިއްލޫރި ފުޅިއަށް ގެންގުޅުނު ފަދަ، ދިވެހިންނަށް ފަރިތަ މޮޑެލެކެވެ.
ސަރުކާރުގެ މައިގަނޑު އަމާޒަކީ މި ނިޒާމުތަކަށް ބޭނުންވާ ޤާނޫނީ އަދި އިދާރީ އޮނިގަނޑު ފުރިހަމަކޮށް، ރާއްޖޭގެ ތިމާވެށި ރައްކާތެރިކުރުމަށްޓަކައި އަމަލީ ގޮތުން ހަރުދަނާ ފިޔަވަޅުތަކެއް އަވަސް މުއްދަތެއްގެ ތެރޭގައި އެޅުމެވެ.
