މެދުކެނޑުމެއްނެތި ދެކުނުގެ އަތޮޅުތަކަށް ކުރި ގަދަ ވިއްސާރައިގައި ފެންބޮޑުވެ ގެއްލުންވުމުގެ ސަބަބުން ރައްކާތެރިކަމަށްޓަކައި ހުސްކުރި ގެތަކަށް މީހުން އަނބުރާ ބަދަލުކޮށް، އެ އާއިލާތަކަށް ބޭނުންވާ އެހީތެރިކަން ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ)އިން ފޯރުކޮށްދޭން ފަށައިފިއެވެ.

އެންޑީއެމްއޭއިން މައުލޫމާތު ދޭގޮތުގައި، ގއ، ގދ، ފުވައްމުލައް އަދި އައްޑޫ ސިޓީއަށް ކުރި ވިއްސާރަ މިހާރު ވަނީ އަލިކުރަން ފަށާފައެވެ. މިއާއެކު، މެދުކެނޑިފައިވާ އާންމު ހިދުމަތްތައް އަލުން އިއާދަވެ، ނަރުދަމާއަށް ދިމާވި މައްސަލަތައް ވެސް މިހާރު ވަނީ ގިނަ ރަށްރަށުގައި ހައްލުކުރެވިފައެވެ. އަދި ގެއްލުންވި ގެތައް ސާފުކުރުމުގައި އަމަލުކުރަންވީ ރައްކާތެރި ގޮތްތައް ހެލްތު ޕްރޮޓެކްޝަން އޭޖެންސީ (އެޗްޕީއޭ)އާ ގުޅިގެން އަންނަނީ އާންމުންނަށް އަންގައިދެމުންނެވެ.

މި ވިއްސާރައިގެ އަސަރު އެންމެ ބޮޑަށް ކޮށްފައިވަނީ އައްޑޫ ސިޓީ ފޭދޫއަށެވެ. އެރަށުގެ 95 ގެއަކަށް ފެން ވަދެފައިވާއިރު، މީހުންނަށް ދިރިނޫޅެވޭ ވަރަށް 7 ގެއަކަށް ގެއްލުންވުމުން އެ އާއިލާތައް ވަނީ ވަގުތީ ބޯހިޔާވަހިކަމަށް ބަދަލުކޮށްފައެވެ. ފޭދޫގެ އިތުރުން މަރަދޫގެ ދެ ގެއަކަށާއި، ފުވައްމުލަކުގެ ބޮޑު ސަރަހައްދެއްގައި ފެންބޮޑުވެ، ބައެއް ގޭބިސީތަކުގެ ނަރުދަމާގެ ހޮޅިތައް ބެދުމުގެ މައްސަލަވެސް ކުރިމަތިވިއެވެ. ފޭދޫ ކައުންސިލުން ފާހަގަކުރާ ގޮތުގައި މޫސުން ރަނގަޅުވި ނަމަވެސް، ފެންވަން ގެތަކުގެ ހާލަތު އަދިވެސް ގޯހެވެ.

ފޭދޫ ކައުންސިލް މެމްބަރު ޒަހާ ވިދާޅުވީ، ރިޕޯޓު ނުކުރާ ގެތައް ވެސް ހުރުމުން ގެއްލުންވި ގެތަކުގެ އަދަދު 95 އަށްވުރެ އިތުރުވުމަކީ އެކަށީގެންވާ ކަމެއް ކަމަށާއި ފުރިހަމަ ތަފްސީލު ލިބޭނީ އެސެސްމަންޓް ނިމުމުން ކަމަށެވެ. އަދި މިފަދަ ކަންކަމަށް ދާއިމީ ހައްލެއް ގެނެވެން އޮތީ ފޭދޫގެ ފެން ހިންދާ ނިޒާމު ރަނގަޅު ފެންވަރަކަށް ތަރައްގީކުރެވިގެންކަމަށްވެސް އޭނާ ފާހަގަކުރެއްވިއެވެ. މޫސުމާ ބެހޭ ގައުމީ އިދާރާއިން މައުލޫމާތު ދޭގޮތުގައި، ބުރާސްފަތި ދުވަހުން ފެށިގެން މޫސުން މުޅިން ރަނގަޅުވާނެއެވެ. ލިބުނު ގެއްލުންތައް ބަލައި ވަޒަންކުރުމަށްފަހު، އެންޑީއެމްއޭއިން ދަނީ ކައުންސިލްތަކާ ގުޅިގެން ސަރުކާރުގެ އެހީތެރިކަން ރައްޔިތުންނަށް ފޯރުކޮށްދިނުމުގެ މަސައްކަތް ވިލަރެސްކުރަމުންނެވެ.