ސަރުކާރުން އަޅަމުންދާ ހަރުދަނާ އަދި ހަރުކަށި ފިޔަވަޅުތަކުގެ ސަބަބުން، ކަޅު ބާޒާރުގައި ޑޮލަރުގެ އެކްސްޗޭންޖް ރޭޓް ވަރަށް ބޮޑަށް ތިރިވެ، މާލީ ނިޒާމަށް ބޮޑު ހަމަޖެހުމެއް ލިބެން ފަށާފައިވާކަން އިކޮނޮމިކް މިނިސްޓަރު މުޙައްމަދު ސަޢީދު، ރައީސުލްޖުމްހޫރިއްޔާގެ އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ވިދާޅުވެއްޖެއެވެ.
މިނިސްޓަރު ސަޢީދު ވިދާޅުވީ، މިހާރު ބާޒާރުގައި ޑޮލަރުގެ ރޭޓް ހުރީ މި ސަރުކާރުން ވެރިކަމާ ހަވާލުވިއިރު، އަދި އިންތިޤާލީ މަރުޙަލާގައި ހުރި މިންވަރަށްވުރެ ވެސް ދަށުގައި ކަމަށެވެ. ބޭންކިންގ ނިޒާމުގެ ބޭރުން ޤަވާއިދާ ޚިލާފަށް ހިންގާ ބޭރު ފައިސާގެ މުއާމަލާތްތައް ހުއްޓުވުމަށް ފެށި މަސައްކަތުން ބޮޑު ކާމިޔާބީއެއް ލިބެމުންދާކަން ވަޒީރު ފާހަގަކުރެއްވިއެވެ.
މި ބައްދަލުވުމުގައި ހޯމް މިނިސްޓަރު ޢަލީ އިޙްސާން ވަނީ ޤަވާއިދާ ޚިލާފަށް ބޭރު ފައިސާގެ ބްލެކް މާކެޓް ހިންގާ ފަރާތްތަކާ މެދު ސަލާމަތީ ބާރުތަކުން ހިންގަމުންދާ ޚާއްޞަ އޮޕަރޭޝަންތަކުގެ ތަފްޞީލު ޙިއްޞާކުރައްވާފައެވެ. މިގޮތުން، ލައިސަންސް ނެތި ޑޮލަރުގެ ވިޔަފާރި ކުރަމުންދިޔަ 12 ބިދޭސީއެއްގެ މައްސަލަ ބަލަމުންދާއިރު، އޭގެ ތެރެއިން 9 ބިދޭސީއަކު މިހާރު ވަނީ އިމިގްރޭޝަންގެ ބަންދަށް ގެންގޮސްފައިވާކަން ވަޒީރު ހާމަކުރެއްވިއެވެ. މީގެ އިތުރުން، ބޭންކުތަކުން ބޭރަށް ފޮނުވާ ބޮޑެތި ޓީޓީ ތަކުގެ ސައްހަކަން ކަށަވަރުކޮށް، މުދާ އެތެރެނުވާ މައްސަލަތައް ހުއްޓުވުމަށް ކަސްޓަމްސްއާ ގުޅިގެން ހަރުދަނާ ފާރަވެރިވުމުގެ ނިޒާމެއް ޤާއިމްކުރަމުންދާކަން ވެސް ފާހަގަކުރެއްވިއެވެ.
Advertisement
ބަންޑާރަނައިބު އަޙްމަދު އުޝާމް ވިދާޅުވީ، ކަޅު ބާޒާރުގެ ރޭޓްތައް މިހާރު ތިރިވެފައި އޮތް އޮތުން ދާއިމީ ގޮތެއްގައި ހިފެހެއްޓުމަށްޓަކައި، ބޭރު ފައިސާގެ ޤަވާއިދުތަކަށް ގެންނަންޖެހޭ ޤާނޫނީ ބަދަލުތައް ގެނައުމުގެ މަސައްކަތް ބާރުމިނެއްގައި ކުރިއަށްދާ ކަމަށެވެ. ޚާއްޞަކޮށް، މޯލްޑިވްސް މޮނިޓަރީ އޮތޯރިޓީގެ ހުއްދައެއް ނެތި ޑޮލަރުގެ އަގުތައް މަތިކޮށް އިޝްތިހާރުކުރާ ފަރާތްތަކާ މެދު ޤާނޫނީ ގޮތުން ހަރުކަށި ފިޔަވަޅު އެޅުމަށް މުއައްސަސާތައް ގުޅިގެން ފްރޭމްވޯކެއް އެކުލަވާލަމުންދާކަން ހާމަކުރެއްވިއެވެ.
ދައުލަތުގެ ތިން ވުޒާރާ ގުޅިގެން އަޅަމުންދާ މި ފިޔަވަޅުތަކުގެ ސަބަބުން ރާއްޖޭގެ ރަސްމީ މާލީ ނިޒާމު އިތުރަށް ވަރުގަދަވެ، ދިވެހި ވިޔަފާރިތަކަށް ފުރިހަމަ ރައްކާތެރިކަން ލިބިގެންދާނެ ކަމަށް ވަޒީރުން ވިދާޅުވިއެވެ.
