ރޭ ސިނަމާލެ ބްރިޖަށް އުރުނީ، ގަވާއިދާ ޚިލާފަށް ރާއްޖެއަށް ވަދެ އުޅުނު މައްސަލައިގައި ގިނަދުވަސްތަކެއް ވަންދެން ނަގިލި އަޅާފައި އޮތުމަށްފަހު، ވިއްސާރައިގައި އޮޔާ ދިޔަ ބޭރުގެ ދެތެޔޮޓޭންކަރު ކަމަށާއި އެއީ ދައުލަތަށް ނަގަން ވާހަކަދެކެވޭ ދެއުޅަނދުކަން އެނގިއްޖެއެވެ.

މި އުޅަނދުތައް ރާއްޖެ އައުމަށް އެޖެންޓުގެ ގޮތުގައި ހޯކްސް އިން ކުރިން މަސައްކަތް ކުރަން އުޅުނު ކަމުގައި ވިޔަސް، އެކުންފުނިން ކުރިން ބުނެފައި ވަނީ މި ދެއުޅަނދު ރާއްޖެ އަށް ވަދެފައި ވަނީ ހޯކްސް އަށް ނޭނގި ކަމަށް ވާތީވެ، އޭގެ އެޖެންޓުކަން ކުރަން ބޭނުން ނުވި ކަމަށެވެ.

ރޭގެ ހާދިސާއާއި ގުޅިގެން އޭގައި ތިބި ފަޅުވެރިން މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން ވަނީ ސަލާމަތްކޮށްފައެވެ. ސޯޝަލް މީޑިއާގައި ދައުރުވަމުންދާ ވީޑިއޯތަކުން ފެންނަ ގޮތުގައި އެ ދެ ބޯޓަށްވެސް ވަނީ އެކި ވަރުގެ ގެއްލުންތައް ލިބިފައެވެ. ނަމަވެސް އެ ހާދިސާގައި ލިބުނު ގެއްލުންތަކުގެ ތަފްސީލެއް މިހާތަނަށް އެއްވެސް އިދާރާއަކުން ރަސްމީކޮށް ހާމަކޮށްފައެއް ނުވެއެވެ.

އެމްއެންޑީއެފުން މައުލޫމާތު ދެއްވި ގޮތުގައި، ހާދިސާ ހިނގުމާއެކު އެ މުއައްސަސާއިން އެންމެ އިސްކަމެއް ދީގެން ކުރިއަށްގެންދިޔައީ ބޯޓުގައި ތިބި މީހުން ސަލާމަތް ކުރުމުގެ މަސައްކަތެވެ. އެގޮތުން ބޯޓުގައި ތިބި އެންމެން ސަލާމަތްކުރުމަށްފަހު، އެ މީހުން މޯލްޑިވްސް ކަސްޓަމްސް ސާރވިސްއާ ހަވާލުކުރުމުގެ މަސައްކަތް އެމްއެންޑީއެފުން ވަނީ ކުރިއަށްގެންގޮސްފައެވެ.

އެނގިފައިވާ ގޮތުގައި އެ އުޅަނދުތަކަށް ސަޕްލައި ކުރުމަށް އެންޓްރެކް ކުންފުންޏަށް ވަނީ ހުއްދަ ދީފަ އެވެ. އޭގެ އެޖެންޓުކަން ކުރުމަށް އިތުރު ކުންފުނިތަކުން ވެސް މަސައްކަތް ކުރިކަން ޚުލާސާ އަށް ވަނީ ކަށަވަރު ވެފައެވެ. ނަމަވެސް މިހާތަނަށް އެންޓްރެކް ފިޔަވައި އިތުރު އެއްވެސް ފަރާތަކަށް އެ ބޯޓާއި މުއާމަލާތް ކުރުމަށް ފުރުސަތު ސިފައެއް ނުވެއެވެ