މާލެ ސަރަހައްދުގައި ނުވަތަ އެހެން ސަރަހައްދެއްގައިވެސް ޓްރެފިކް މައްސަލަތައް ހައްލުކުރުމުގެ ބޭނުމުގައި ޓްރެފިކް މޮނިޓަރިން ސެންޓަރެއް ޤާއިމުކުރުމަށް ސަރުކާރުން ނިންމައިފިއެވެ. މިކަން ހާމަކުރެއްވީ ރައީސުލްޖުމްހޫރިއްޔާގެ އޮފީހުގައި ބޭއްވެވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން އިޤްތިސާދީ ތަރައްގީއާއި ދަތުރުފަތުރާއި ވިޔަފާރިއާ ބެހޭ ވަޒީރު މުޙައްމަދު ސަޢީދެވެ. ވަޒީރު ވިދާޅުވީ، މުޅި ސަރުކާރު ގުޅިގެން މާލޭގެ ޓްރެފިކް މައްސަލައަށް ދާއިމީ ހައްލެއް ހޯއްދަވައިދެއްވުމުގެ ހާއްސަ ވިޝަންއެއް ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ އެބައޮތް ކަމަށެވެ.

އެ ވިޝަންގެ ދަށުން މާލޭގެ މަގުތައް ޒަމާނީ ފެންވަރަށް ތަރައްގީކުރުމުގެ މަސައްކަތް ކުރަމުންދާއިރު، އޭގެ ހެއްކެއްގެ ގޮތުން މާލޭގެ ބޭރުމަގު ވަނީ ޒަމާނީ ރީތި މަގެއްގެ ގޮތުގައި ތަރައްގީކޮށްފައެވެ. އަދި މާލޭގެ އެހެން ހުރިހާ މަގުތަކެއްވެސް ޗައިނާ ސަރުކާރުގެ އެހީގައި މިއަހަރުގެ ތެރޭގައި ހަދަން ފެށުމަށް ނިންމާފައިވާކަން ވަޒީރު ފާހަގަކުރެއްވިއެވެ.

މަގުތައް ޒަމާނީ ފެންވަރަށް ތަރައްގީވެގެން އަންނައިރު ޓްރެފިކް މައްސަލައަށްވެސް ޒަމާނީ ހައްލެއް ބޭނުންވާނެތީ، މުޅި މާލެ ސަރަހައްދަކީ "ރެޖިސްޓްރޭޝަން ކޮންޓްރޯލް ޒޯން" އަކަށް ހެދުމަށްޓަކައި ގާނޫނުގެ ތެރެއިން ޖާގަ ހޯއްދަވާފައިވާ ކަމަށް ވަޒީރު ވިދާޅުވިއެވެ.

މި ގާނޫނާ ގުޅޭގޮތުން ވިޔަފާރިވެރިންނާއި، އާންމު ރައްޔިތުން، ސަރުކާރުގެ މުއައްސަސާތައް އަދި ކައުންސިލްތަކަށް ހުށަހެޅިފައިވާ މައްސަލަތައް ބަލައި ދިރާސާކޮށް ގިނަ މަޝްވަރާތަކެއް ކުރެވިފައިވާ ކަމަށް ވަޒީރު ވިދާޅުވިއެވެ. މި ބަދަލުގެ އެންމެ ބޮޑު ބޭނުމަކީ އާންމު ފަރުދުންގެ ރައްކާތެރިކަން ކަށަވަރުކުރުންކަމުގައި ސަޢީދު ވިދާޅުވިމެވެ. މާލެ ސަރަހައްދު ރެޖިސްޓްރޭޝަން ކޮންޓްރޯލްޑް ޒޯނަކަށް ހެދުމަކީ އުޅަނދު ރެޖިސްޓަރ ނުކުރެވުން ނޫން ކަމަށާއި، އެއީ ވަކި މިންގަނޑުތަކަކާއި އިންތިޒާމްތަކެއްގެ ތެރެއިން އެކަން ކުރުން ކަމަށް ވަޒީރު ފާހަގަކުރެއްވިއެވެ. އަދި ޤާނޫނުގައިވާ ގޮތުން މާލޭގެ އިތުރުން އެހެން ސަރަހައްދެއްވެސް ރެޖިސްޓްރޭޝަން ކޮންޓްރޯލް ޒޯންއަކަށް ހެދުމަށް އެއްވެސް ހުރަހެއް ނެތްކަމަށް ވަޒީރު ވިދާޅުވިއެވެ.