އައްޑޫ ސިޓީ ހިތަދޫގައި އަލަށް އިމާރާތްކުރި ޕޮލިސް އެކޮމޮޑޭޝަން ބިލްޑިންގ ރަސްމީކޮށް ހުޅުވައިފި

އައްޑޫ ސިޓީ ހިތަދޫގައި އަލަށް އިމާރާތްކުރެވުނު ފުލުހުންގެ އެކޮމޮޑޭޝަން ބިލްޑިންގ (ފުލުހުންގެ އެކޮމަޑޭޝަން އިމާރާތް) ރަސްމީކޮށް ހުޅުވައިފިއެވެ.

މި އިމާރާތް ރަސްމީކޮށް ހުޅުއްވައިދެއްވީ ކޮމިޝަނަރ އޮފް ޕޮލިސް އަހްމަދު މުހައްމަދެވެ.

ތިން ފަންގިފިލާއަށް ޢިމާރާތްކޮށްފައިވާ މި ޒަމާނީ ފެސިލިޓީއަކީ 40 ފުލުހުންނަށް އެއްފަހަރާ ތިބެވޭ ގޮތަށް ފަރުމާކޮށްފައިވާ ތަނެކެވެ. މީގެއިތުރުން، މި ޢިމާރާތުގައި އޮފީސް ޖާގަތަކާއި، ކޮންފަރެންސް ރޫމަކާއި، އާންމުކޮށް ބޭނުންކުރާ ސަރަޙައްދުތަކުގެ އިތުރުން ދިރިއުޅުމަށް ބޭނުންވާ މުހިންމު އެންމެހައި ހިދުމަތްތައް ވަނީ ފުރިހަމަކޮށްފައެވެ.

މި އައު އިމާރާތާއެކު، އައްޑޫ ސިޓީއާއި ދެކުނުގެ ސަރަހައްދުގައި ހިދުމަތްކުރާ ފުލުހުންގެ ދިރިއުޅުމުގެ ޙާލަތާއި މަސައްކަތުގެ މާހައުލު އިތުރަށް ހަރުދަނާވެ، ފުރިހަމަވެގެންދާނެއެވެ.

މި އިމާރާތް ހުޅުވުމަށް ބޭއްވި ރަސްމިއްޔާތުގައި ޑެޕިއުޓީ ކޮމިޝަނަރ އޮފް ޕޮލިސް ފަރުހާދު ފިކުރީގެ އިތުރުން ދިވެހި ފުލުހުންގެ ހިދުމަތުގެ އިސް އޮފިސަރުން ބައިވެރިވެވަޑައިގެންނެވިއެވެ.