ސޯޝަލް މީޑިއާގެ އެކި މަންސަތައް މެދުވެރިކޮށް ހުޅުމާލެއިން ދުވަހު ކުއްޔަށާއި މަހު ކުއްޔަށް އެޕާޓްމަންޓް ދޫކުރާ ކަމަށް ބުނެ، މަކަރާއި ހީލަތުން ފައިސާ ހޯދަމުންދާ މައްސަލަތަކެއް ފާހަގަކުރެވިގެން ދިވެހި ފުލުހުންގެ ޚިދުމަތުން އެކަމަށް ސަމާލުވުމަށް އިލްތިމާސްކޮށްފިއެވެ.

ފުލުހުންގެ ތަހުގީގުތަކުން އެނގިފައިވާ ގޮތުގައި، މިފަދަ ޖަރީމާތައް ހިންގާ ފަރާތްތަކުން ދަނީ ސޯޝަލް މީޑިއާގައި ފޭކް އެކައުންޓްތައް ހަދައިގެން އޮޅުވާލުންތައް ހިންގަމުންނެވެ. އެގޮތުން "Hulhumale Daily Rent Apartment" (@hulhumaleapartment) ނަމުގައި ހަދާފައިވާ ޓިކްޓޮކް އެކައުންޓަކާއި، 9607217905+ ނަންބަރު ބޭނުންކޮށްގެން މިފަދަ އަމަލުތައް ހިންގާކަން ވަނީ ފާހަގަކުރެވިފައެވެ. އަދި މި މައްސަލަތަކުގައި ފައިސާ ޓްރާންސްފަރ ކުރެވޭ އެކައުންޓްތަކުގެ ވެރިފަރާތްތަކުގެ ބައިވެރިވުމެއް މި އޮޅުވާލުންތަކުގައި ނޯންނަކަންވެސް ފުލުހުންގެ ތަހުގީގަށް ވަނީ ހާމަވެފައެވެ.

މިފަދަ ސްކޭމްތައް ހިންގާ މީހުން އާންމުން އޮޅުވާލުމަށް ބޭނުންކުރާ މޯޑަސް އޮޕަރަންޑީ (އަމަލުކުރާ ގޮތަކީ) ފުލުހުން ވަނީ ތަފްސީލުކޮށްދީފައެވެ. އެގޮތުން، މީހުންގެ ޝައުގުވެރިކަން ދަމައިގަތުމަށް އެހެން ތަންތަނުގެ އެޕާޓްމަންޓްތަކުގެ ފޮޓޯއާއި ވީޑިއޯ ވަގަށް ނަގައިގެން، ނުކުރެވޭނެފަދަ ހެޔޮ އަގުތަކުގައި އިޝްތިހާރު ކުރެއެވެ. މެސެޖިންގ އެޕްތަކުން މުއާމަލާތްކުރަން ފެށުމުން، އެހެން ކަސްޓަމަރުންވެސް އެ ތަން ހޯދަން އެދެމުންދާ ކަމަށް ބުނެ އަވަސްއަރުވާލައިގެން ބުކިންގ ކަށަވަރުކުރުމަށް އެޑްވާންސް ފައިސާ ދެއްކުމަށް ޑިމާންޑްކުރެއެވެ. އިތުބާރު ހޯދުމުގެ ގޮތުން ވަގަށް ނަގާފައިވާ އައިޑީ ކާޑާއި ސައްހަނޫން ލިޔެކިޔުންތައް ފޮނުވައި، ވަކި ބޭންކް އެކައުންޓްތަކަކަށް 2،550 ރުފިޔާއާއި 10،000 ރުފިޔާއާ ދެމެދުގެ އަދަދަކުން ފައިސާ ޖަމާކުރަން އެދެއެވެ. ނަމަވެސް، ފައިސާ ޓްރާންސްފަރ ކުރި ސްލިޕް ފޮނުވުމާއެކު، އެމީހުންގެ މުއާމަލާތްތައް ވަގުތުން ހުއްޓާލައި، އެޕާޓްމަންޓް ހަވާލުނުކޮށް އަދި ފައިސާވެސް އަނބުރާ ނުދީ މަކަރުހަދައެވެ.

މިފަދަ އޮޅުވާލުންތަކުން ރައްކާތެރިވުމުގެ ގޮތުން، އެޕާޓްމަންޓަށް އަމަލީގޮތުން ގޮސް ތަން ބަލައި، އިމާރާތުގެ ވެރިފަރާތް ނުވަތަ ހުއްދަ އޮތް އެޖެންޓާ ބައްދަލުނުކޮށް އެއްވެސް އެޑްވާންސް ފައިސާއެއް ނުވަތަ ބުކިންގ ފީއެއް ޓްރާންސްފަރ ނުކުރުމަށް ފުލުހުން އިލްތިމާސްކުރެއެވެ. އަދި ކުއްޔަށް ހިފުމުގެ އެއްބަސްވުން ހެދުމުގެ ކުރިން ތަނުގެ މިލްކުވެރިކަން ސާބިތުކޮށްދޭ ސައްހަ ލިޔުމެއް ނުވަތަ ރަސްމީ ހުއްދަ އޮތްކަން ޔަގީންކުރުމަށާއި، ވަގުތު ކުޑަތަންވެފައިވާ ކަމަށް ބުނެ އަވަހަށް ފައިސާ ދެއްކުމަށް މަޖުބޫރުކުރާ ހާލަތްތަކުގައި ފައިސާ ނުދެއްކުމަށް ވަނީ އަންގާފައެވެ. މީގެ އިތުރުން ސައްހަކަން ކަށަވަރުނުވާ ސޯޝަލް މީޑިއާ ޕްރޮފައިލްތަކާއި ޕްރައިވެޓް މެސެޖިންގ އެޕްތައް މެދުވެރިކޮށް އެކަނި މާލީ މުއާމަލާތްތައް ނުހިންގުމަށް ފުލުހުން އިރުޝާދު ދެއެވެ.

ދިވެހި ފުލުހުންގެ ހިދުމަތުން ވަނީ މި އޮޅުވާލުމުގެ ޝިކާރައަކަށްވެފައިވާ ފަރާތްތަކާއި، ފޯނު ނަންބަރު 9607217905 އަށް ފައިސާ ޓްރާންސްފަރ ސްލިޕް ފޮނުވާފައިވާ ފަރާތްތަކުން، ނުވަތަ މިފަދަ އެއްވެސް މަކަރާއި ހީލަތުގެ އަމަލެއް ފާހަގަކުރެވިއްޖެނަމަ ލަސްނުކޮށް ފުލުހުންގެ ހޮޓްލައިން 3322111 އަށް ގުޅުއްވައި ނުވަތަ ފުލުހުންގެ އެންޓި-ސްކޭމް ސެންޓަރަށް ރިޕޯޓުކުރެއްވުމަށް އެދިފައެވެ.